2Samiyel 2 - Bible en Guidar

Məɗini Davit ka məlĩ na Yuda a Hebron

¹ Dərɓaga asna, Davit sosõhgən Yawe, amna: «Nəmbat addəv taka səret walaŋgəleɗe na Yuda sa?» Yawe aɓsən na: «Doko» Davit amna: «Aŋga nədaddaw kandi?» Yaŋ aɓsən na: «Dok a Hebron.»

² Davit apeŋgik adak dit gil nan sulegiti, Ahino'am na Yizrel, dət Abigayel ga Nabal na Karmel.

³ Davit apeŋgitik ɗiy nan də gəla neti, assoŋguk də gəla addəvit walaŋgəleɗe gugriɗ na Hebron.

⁴ Yaŋ ɗiy na Yuda azzoŋ appay sənən mẽl sən Davit ka məlĩ na Yuda adaka. Məprəman sən Davit dawnəh na: «Ɗiy na Yabes na Galad, dəndəknən Sawlu.»

⁵ Davit slən metiveɗ azet ɗiy na Yabes na Galad, aɓsit na: «Yawe dəzaɓokum, vi kəɗɗaŋgək moggon sən daya nokum Sawlu, kəndəknəni.

⁶ Kakaŋ na, kəta Yawe dəgəɗ sukum moggon də gegesiŋ. Naw pak wanəgəɗ sukum moggoni, vi kəɗɗanən zəga vaska.

⁷ Ya Kakaŋ na, məsok zukum, məssoŋ ɗiy gboŋgboŋgu. Vi daya nokum Sawlu amtəka, ya anawi mə Yudeɗ aɗiyaŋ tam ka məlĩ aketi.»

Isboset məlĩ na Israyel

⁸ Abner, wətən Ner, daya net məzəlpaŋ na Sawlu, agəmək Isboset wətən Sawlu, aka a Mahanayim.

⁹ Aɗiyək ka məlĩ aka va na Galad, na Asiri, na Yizrel, na Efrayim, gəm na Benyamin, aka Israyel baymani.

¹⁰ Isboset wətən Sawlu agəɗək əzva kaklaw poɗo gala məɗiyən aka məlĩ a Israyel, azəmək məlĩ əzva sula. Mə Yudeɗ hara na, Davit azbaŋgə.

¹¹ Ənziya na Davit aka məlĩ aka Yuda, a Hebron agəɗək əzva buhul də təla sləre.

Wəgay a walaŋ Yuda də Israyel a Gabawən

¹² Abner, wətən Ner dit gewleɗ na Isboset wətən Sawlu, agilyoŋguk sə Mahanayim, addoŋ kəla Gabawən.

¹³ Yo'ab wətət Seruya, dit gewleɗ na Davit, agilyoŋguk tamə. Almaŋ a ma bobok na Gabawən, eŋ a ma bobok dahã, eŋ tam a man dəda.

¹⁴ Abner aɓsən Yo'ab na, kamə appet səm gewlet nam dəslbaŋ abamə, Yo'ab amna lewi yi dəsilyoŋgu.

¹⁵ Gewleɗ asilyoŋko yaŋ məŋɗa na Isboset wətən Sawlu kəlaw kiyit sula səddəv mahəlfa na Benyamin, kəlaw kiyit sula tam səret gewleɗ na Daviti.

¹⁶ Məzəlpa pak tay ərma ki galani ndən gəm zlif əmpan də masalam aka tukzlumun, ndəɗaŋ yəmak afuŋ. Miya təki vanəs na, guli net milɓeɗi. A Gabawəni yi.

¹⁷ Əgay van agəɗək vakvak dəpaska. Gewleɗ na Davit askanənək wəla Abner dit ɗiy na Israyel.

¹⁸ Kirtət Seruya hokogit tahəŋ adaka, Yo'ab, Abisay, gəm Asayel. Asayel tələn petpeti day ki mune nawra.

¹⁹ Asayel arɓahanək Abner, avrok dəka dəzəŋ may dəka zlaɓay səmmba Abner ɓa.

²⁰ Abner hõlõkko dərɓe, amna: «Istə Asayel əŋ sa?» Amna: «Intə.»

²¹ Abner aɓsən na: «Ɗaɗah anzok agay arəm taka səret gewleɗ dəka dəzəŋ an ɓa dəka zlaɓay kəmõhgin zəgeɗ nawgay nani.» Asayel dəŋgəm kappan ərɓahan ɓa.

²² Abner amsak əpel sən Asayel dawnəh na: «Nok na amil səmmbawa! Vimi nədawbayuk ɓuloh afuŋ di? Ya mbar nədawzi haraw aka Yo'ab məlmuk di?»

²³ Aɓoŋguk də wəmilyen səmmbani. Abner ambokuk sə dərɓagan də tulhõ aza gədəvni; təlhõ vit nzol dəka gəɓani, ndən sukot ləŋ zam a gəlan eskiŋ. En dəgapaŋ a təki Asayel asan ɓulohoŋ pak əziweŋ adaka.

²⁴ Yaŋ Yo'ab də Abisay, asilyoŋ arɓahanən Abner. Pay tay ətəpa gala agapan a Gibeyat-Amma nammba pay nampum na Giya, aka tive na kapta-muyã na Gabawən.

²⁵ Yaŋ mə Benyaminɗe arɓəzlaŋ ammba Abner rimiɗ rimiɗi, aziweŋ aka dadwar ki mossorgo.

²⁶ Abner aya Yo'ab, amna: «Masalam dəsan faɗ aka əbay ɗiy sa? Kəsən na, wənəŋ wasan tərãh abe ɓa sa? Hã pay gbəŋgbar kədawneh sit ɗiy nok dəmilyoŋgən səmmbet milmiŋgiɗit di?»

²⁷ Yo'ab amna: «Də Maŋgəlva madarani, va kəpel vas ɓa, ɗiy naw appanən na ərɓehet milmiŋgiɗit an mazayin də pumo yi ɓa ɓa.»

²⁸ Yo'ab affonək gozloro. Məzəlpaŋ nan pak homsos də ərɓehet mə Israyelɗe, dəzbanən əgay əmpa ɓa.

²⁹ Abner dit ɗiy nan kim dəfəɗ nan ədawaŋ a kapta-muyã na Araba. Aggaraŋ ki Yurden, abbalanənək Bitron dəwənnani, agapaŋ a Mahanayim.

³⁰ Adan Yo'ab amil səmmba Abner, ndən kakelgit ɗiy pakə. Məzəlpaŋ kəlaw kiyit vaytak tahəŋ səret gewleɗ na Davit ɓa gəm Asayel.

³¹ Gewleɗ na Davit abayaŋgək ɗiy səkat hoku də kaklaw sləre səret mə Benyaminɗe gəm məzəlpaŋ na Abner.

³² Akiynən kigəbay Asayel, andəknən addəv magamas na afən a Bet-Lehem. Səɓɓani Yo'ab dit ɗiy nan avoŋgoŋ kim aka wədawa, agapaŋ a Hebron pay birndisse.