2Samiyel 19 - Bible en GuidarTatwãh na Davit 1 Məlĩ akker zloŋzloŋ yas apeŋ addəv gəla məzarŋgasla naka maddamba na memeŋgle na walaŋgəla-metiŋ əhəma. Tay ədaw də əpel vaŋka: «Aw, wətu Absalom, wətuwa, wətuwa, aw, Absalom nawa! Kəta in nəmtə agulok ɓa sa? Absalom, wətuwa, wətuwa!» 2 Mənah sən Yo'ab na, məlĩ tay əhəma, tay əɓuh man ammba Absalom. 3 Əska wəla dəgəɗ dəpas akkpaŋgək əhəm na gəlabay viyit məzəlpaŋ pakə, vi məzəlpaŋ aprəmən dəpas na, makra məlĩ assanək diyɗa ammba wətəni. 4 Məzəlpaŋ atoŋgoŋ a walaŋgəla-metiŋ suluh suluh dəpaska, va məzəlpaŋ dənzoŋ səma wəgay dit wil areti. 5 Məlĩ tay haran sərətə, tay əŋzla vaŋvəl wəlan koɓo' koɓo'u: «Aw wətu Absalom, aw Absalom wətuwa, wətu nawa!» 6 Yaŋ Yo'ab ade aza məlĩ nak eŋgili, aɓsən na: «Kərbə sitik wil sit məzəlpaŋ nok en dəkõhgənən zeŋgilok dit kirtuk mezeŋgleket dit muguluŋgiti, gil nok dit gəreŋgiɗko. 7 Ɗiy en dəzelkun kəŋgələ is əzel en dəŋglukun dərəŋgə. Is tat ərban dəpaŋ na, deyeɗe net məzəlpaŋ nok dit məzəlpaŋ dəgapaŋ zəga azok ɓa. Vi nəsənək dəpaŋ na: Va məmtək pak mbagən Absalom egge madaran na, wasan lew azoko. 8 Kakaŋ asil agili, apel sit wən nenek nawsokon mekret məzəlpaŋgə. Vi də iya na Yawe nəsway suko, an kəgil ɓa na, ɗəf təttaka tay naddaŋ təki də is dəpaŋ ɓa, wəray ɓetteŋɗeŋ dədawrəhuko, an dəruhuk ɗah ɓa va səka gawla nok hã pay dəpaŋka.» 9 Ndəni məlĩ asil ade wəsan go'o də maddamba na walaŋgəla-metiŋ. Məprəman siti ɗiy na, məlĩ yaŋ ɗewwe a ma maddamba, ɗiy pak azzoŋ akkalaŋ aba məlyã. Mə Israyelɗe anzoŋguk naway pak a gizlirke nani. Tay əyanən Davit namdan a Yerusalem 10 Addəv mahəlfa na Israyel pak ɗiy tahəŋ əŋzlaŋ ma a walaŋ zit dawnəh na: «Məlĩ akõhgəmək səvet məzuzelɗe namə, sasak səvet mə Filistiɗe, yaŋ kakaŋ anzanək səka dəlvəŋ vi Absalom. 11 Absalom məs məɗi akam amtək ama wəgaya. Ya kakaŋ na vimi kəssoŋ ɓata' ɓata' də əki məlĩ di?» 12 Yaŋ məlĩ Davit aslən azet may Sadok də Abiyatar məsdəlveŋge, dawnəh na: «Mənah sit ɗiy məsɓet na Yuda, dawneh sit na: “Vimi nokum kəssoŋ dirɓe faɗ dawki məlĩ ananda di? Əpel net mə Israyelɗe pak agapək aza məlĩ də gəla nani. 13 Milmiŋgiɗwa, mənokumtə milmiŋgiɗu net mbeli. Vimi nokum kəsoŋ dirɓe faɗ addəv əmndagan məlĩ di?” 14 Kənah sənəngən Amasa na: “Məlmu net mbel kənan ɓa sa? Vasna Maŋgəlva dəgəɗ su an naɗɗa pak an nəɗiyuk daya net məzəlpaŋ naw a gəla Yo'ab ɓa!”» 15 Asapanək mekret ɗiy na Yuda pak va ɗəf taka. Ndəɗaŋ slən ənah sən məlyã: «Amndok ade is dit məzəlpaŋ nok pakə!» 16 Məlĩ amndan kana, ndən gap a Yurden. Ɗiy na Yuda azzoŋ a Gilgal, wələm sən məlĩ vi kaggargən məlĩ ki Yurden. Davit dəbay Simey ɓa 17 Simey, wətən Gera, mə Benyamin na Bahurim, agəmək zən əmbat dit ɗiy na Yuda, vi kawləm sən məlĩ Davit. 18 Adek dit mə Benyaminɗe gabal, gəm Siba, gawla neŋgil ana Sawlu da, kirtin kəlaw kiyit sle'i, gewleɗ nan kaklaw sula. Agapaŋ daabəŋ ki məlĩ a Yurden, 19 bəlay toŋ naggargən gəla na məlyã, gəm kaɗɗa an adawla moggon arani. Simey wətən Gera guduk aba məlĩ gala adaggar ki Yurden, 20 aɓsən məlĩ na: «Kəŋɗan heslepe naw ɓa daya nawa! Kədaɗɗum aka an balam nok araygən suk pay daya naw məlĩ agil sə Yerusalem, hara ka məlĩ dəɗigən a makran ɓa. 21 Vi in balam nok nəsənək na nəgəɗək mambraya. Yaŋ dəpaŋ nədek daabəŋ ki gəla na Yosef pak kawləm sən daya naw məlyã.» 22 Abisay, wətət Seruya azlani, amna: «Aski kan nawtak əbay Simey va aran məlĩ mesiya na Yawe əŋ sa?» 23 Davit amna: «Miy nokum də in mənokum kirtət Seruya di? Vimi kədawɓoŋgoŋ akaw di? Dəpaŋ na ɗəf tay nawbay a Israyel ɓa. An nəsən dəpaŋ na, intə məlĩ na Israyel.» 24 Məlĩ aɓsən Simey na: «Kəmtə na ɓa, məlĩ asway sənəka.» Davit tay əsler də Mefiboset 25 Mefiboset dəhən Sawlu, adek kawləm sən məlyã. Dəɗa ɗah tələn ɓa, dəɗi ɗah slambər aza man ɓa, dəskoɓ lukutɗe nan ɗah ɓa təŋ səza məlĩ ambat hã gap pay amndan zayə. 26 Gala ade a Yerusalem kalma də məlyã, məlĩ aɓsən na: «Vimi kəmbat də in ɓa di Mefiboset?» 27 Yaŋ amna: «Daya naw məlyã, balam naw dəfãyãwa, vi balam nok anahək dərəŋ na: Waniynan mazaŋga na koro nawa, wanəpeŋ kaddaw də məlyã. Vi balam nok vədali. 28 Yaŋ gawla naw ambat əzəm kiyu aza daya naw məlyã. Va maslay na Maŋgəlva kənani, agəɗ an kəwəl lew pakə. 29 Səddəv gəla na dəhu Sawlu na, ɗəf tay məza amtəna kəta ɓa ɓa daya naw məlyã, də as pak, kətafwək aret ɗiy məzuzəmaŋ anokda. Tive tay abaw nəttokokgən mbəlembəle mbərən ɓa məlyã.» 30 Məlĩ aɓsən na: «Vimi kədawpel əmpa di, nənahək na: Is də Siba kuɗekningin gulyeŋge pakə.» 31 Mefiboset amna: «An Siba aŋgələk na, dəgəm dəwənnani. Adan daya naw məlĩ ade ananda zayə.» Davit tay əpsən zəga na va Barzillay 32 Barzillay na Rogelim mə Galad, adek aggar ki Yurden də məlyã, appan ama Yurden. 33 Barzillay mazza yi diyɗa, wəzva nan tay kaklaw dodopoɗo, ndən dərma va məlĩ gala asan a Mahanayim, vi ɗəf metiŋgini diyɗa. 34 Məlĩ aɓsən Barzillay na: «Azbaw a Yerusalem, nərmagən voko.» 35 Barzillay aɓsən məlĩ na: «Wəzva naw gbamgbar dəpəl əmpa hara nəmbatgən də məlĩ a Yerusalem di? 36 Wezva naw dəpaŋ kaklaw dodopoɗo yi, kakaŋ wanəsən əgohon moggon də mbərayən sa? Wanəsən nenek na zəga an nədawzəm də an nədawsa sa? Wanəɓap uɗakan wəlet zel dit gil miyaŋ gəlya əmpa sa? Vimi balam nok adaddan zlineh aka daya naw məlĩ ɗar di? 37 Gawla nok siɗikke adalhan məlĩ dəggar ki Yurden kaka'ə, vimi məlĩ adawvay zəga na vaw zev askəs di? 38 Kamə balam nok dəmndan nəmtəgən a walaŋgəla-metiŋ nawa, a maŋgava magamas net may əbba dət əmma. Gawla nok Kimham yaŋ hara, dəmbat də isi daya naw məlyã, agəɗ sən an kəwəl lew ama horoko.» 39 Məlĩ amna: «Kimham dəggar də iyna, wanəgəɗ sən va mokrok adaŋgla. An məs mok akan pak wanəɗɗa suko.» 40 Ngaɓa net ɗiy pak aggarək ki Yurden. Məlĩ aggar arma Barzillay slakatə, asokoni, ndən buryok ananda. 41 Məlĩ toŋ a Gilgal də Kimham. Ɗiy na Yuda dəwənnet də pəɗak net mə Israyelɗe'e, aggargənənək məlyã. Wəgay a weleŋgit mə Yudeɗ dit mə Israyelɗe 42 Ɗiy na Israyel pak azzoŋguk aza məlyã, anahaŋ sənənək məlĩ na: «Vimi məlmiŋgiɗəm ɗiy na Yuda agəmkuni, aggargukun is məlĩ Davit də gəla nok ki Yurden gəm məzəlpaŋ nok pak də is di?» 43 Ɗiy na Yuda azlan sitin ɗiy na Israyel na: «Vi məlĩ həlfəmi na gogo day kiykum! Vimi kədawdaŋ gədəv aka wən nan di? Tay an məzəm seva məlĩ sa? Tay an aki səm sa?» 44 Mə Israyelɗe azlan sitin ɗiy na Yuda, aɓɗaŋ na: «Mənamtə na gogo day kiykum, gap təl kəlaw aza məlyã; aza Davit dayday, mənamtə day kiykum! Vimi kədawramən vaŋ di? Mənamtə dərəŋ mənah daabəŋ na, waməki məlyã ɓa sa?» Əpel net ɗiy na Yuda asanək ɓəl day ki an net ɗiy na Israyel. |
All right reserved
Bible Society of Cameroon