2Samiyel 17 - Bible en Guidar

Husay tay əraygən pepet na Ahitofel

¹ Ahitofel aɓsən Absalom na: «Kamə, nəwel ɗiy gabal kəlaw kiyit sula, nəsil nəzban Davit də dəfɗəŋka.

² Nəmbatgən girzik akan pay ayə zən baybayə, wanəgeslne'gəni; məzəlpaŋ nan wanzoŋ pakə, vasna nəbaygən məlĩ pay adassan takərgəni.

³ Vasna wanəmndet ɗiy pak azoko. Va amndoŋ pak aza ɗəf an kədawkayani: Vasna ɗiy pak wassoŋ zayə.»

⁴ Əpel nan asanək təstəs ama hara Absalom dit ɗiy məsɓet na Israyel pakə.

⁵ Absalom amna: «Kamə əŋga aya Husay mə Arki ɗa, məprəmgən miy adawpel səman tam di?»

⁶ Husay mbat aza Absalom, Absalom anah səni, amna: «An Ahitofel apel yaŋka. Məgəɗ va anahəŋ sa? An vaski ɓa, apel tamə.»

⁷ Husay aɓsən Absalom na: «Pepet Ahitofel akiyəs na, moggoni əmpa ɓa.»

⁸ Husay amna: Kəsənək afuk dit ɗiy nani, məzəlpaŋ məs mekret kãhəŋgə, tərãhəŋ va zəga darawən məs muɗakan dit kirtin awra. Afuk ɗəf nalpay avoŋ na a təki taka dit ɗiy ɓa.

⁹ Wasan aɗamək kakaŋ a vovu, awaniɓa təki maɓɓani. Də wətəŋ nan an əmta agəɗək a weleŋgit məzəlpaŋgə, ɗəf dədaprəmni, wanah na: Məskani wəlet ɗiy na Absalom!

¹⁰ Ɗəf gambara məs makran vakvak va ɓoolu zlaŋ dayday wagəɗ zimbi'i, vi mə Israyelɗe pak asənənək afuk na məs makrani nawgaya, ɗiy nan gambereɗiŋ.

¹¹ Pepet naw yaŋka, ɗiy na Israyel pak təŋ sə Dan hã gap a Ber-Seba dəkkalaŋ diyɗa azok va hoyoŋko na məlpa; is sən kiyuk kəlgəŋ ama əgay vani.

¹² Wamərəh a təki asan pakə, məskotgən akan va minɗe aka dəlvafuŋ. Tay nawkõh səzan dit ɗiy en dəndən təttaka dayday ɓa.

¹³ An a walaŋgəla-metiŋ maɓɓan addoŋ əɗamaŋgə, mə Israyelɗe baymet dəkiyaŋgən helegeɗi, məgdəhgən sə walaŋgəla van a lolohõ, hã gərəm təttaka dayday adawsan adak ɓa.

¹⁴ Absalom dit mə Israyelɗe pak aɓɗaŋ na: «Pepet na Husay əŋ mə Arki moggoni day ki an na Ahitofel!» Yawe dəɗi wən nan ka pepet na Ahitofel moggonəŋ dəraygəni, vi Yawe dəkigən əray aka Absalom.

Davit tay əggar ki Yurden

¹⁵ Husay anah sit may məsdələv Sadok də Abiyatar na, pepet yaŋ an Ahitofel anah sən Absalom dit ɗiy məsɓet na Israyel, naw tam pepet naw yaŋ an nəpsəni.

¹⁶ Ya kakaŋ na, məslən də kakara ənah sən Davit, mənokum na: «Kədawvoŋ a təki məpəliyya na kapta-muyã ɓa. Kətoŋgəni, vas ɓa na, kasɗəkni məlĩ dit ɗiy en nammban pakə.»

¹⁷ Yonatan də Ahima'as tahəŋ ziwziw a En-Rogel. Balamək tek əssak siti, ndəɗaŋ mbataŋ əssak sən məlĩ Davit tamə. Vi adarbanən zit dawtoŋ addəv walaŋgəla-metiŋ ɓa.

¹⁸ Yaŋ wiyən maɓɓan awle, anah sən Absalom. Maslənɗe sula nek agəmən zit ambataŋ ana ɗəf maɓɓan da a Bahurim, vov net iŋkile tay a daŋgla ananda, ndəɗaŋ səreh addəvni.

¹⁹ Guluk təgəm hubu, təpak aka ma vov net iŋkile naka, ndət hay akan weɗweɗi, awsən ɓa.

²⁰ Gewleɗ na Absalom atoŋgoŋ azat ɗak nakə, aɓɗaŋ na: «Ngahəŋ may Ahima'as də Yonatan di?» Ɗak nak təɓsit na: «Atoŋgoŋguk dəka batemit iŋkileska.» Akeyetinik sam dərihin ɓa; ndəɗaŋ buryok a Yerusalem.

²¹ Dərɓaga wəmbat neti, ndəɗaŋ vit səddəv vov net iŋkile nak teki, aboton sənən məlĩ Davit; aɓsənən Davit na: «Misil məggar kiyit iŋkile gu'u, vi pepet yaŋ an Ahitofel atawan aka wən nokum.»

²² Davit le' dit ɗiy nani, ndəɗaŋ dəgar ki Yurden, hã təki pasak də pummo na, ɗəf taka tay dəpəl məza dəggar ki Yurden ɓa ɓa.

²³ Adan Ahitofel awla pepet nan an atawan mulani va wən ɓa, aynan mazaŋga na koro nani, amndan ananda, a walaŋgəla-metiŋ; yaŋ aman man sit ɗiy neŋgil ananda, ndən zən lawə, zamə. Məndəkni addəv magamas na afəni.

Davit a Mahanayim

²⁴ Davit agap a Mahanayim na, Absalom tay əggar ki Yurden dit məzəlpaŋ na Israyel beymet dəndəni.

²⁵ Amasa yi Absalom aɗi a gəla Yo'ab aket məzəlpaŋgə. Amasa, wətən mə Israyel maɓɓan adawyaŋ na Yitra, məs dəɗiyət Abigayel wətət Nahas, məlmət Seruya, ma Yo'ab.

²⁶ Mə Israyelɗe də Absalom, aɗiynən dibirgidik net aka dələv na Galad.

²⁷ Gala Davit agap a Mahanayim, Sobi wətən Nahas na Rabba walaŋgəla-metiŋ net mə Ammonɗe, Makir wətən Ammiyel na Lodebar, gəm Barzillay mə Galad na Rogelim,

²⁸ akiyaŋgək zəgeɗ nawvoŋgo, ŋgefleŋɗe, mesteɓeɗi, haykəmari, toksor, gəpa, mideɗi, hĩyna net zeli, hiyna gəm moryoŋgo,

²⁹ amama, moŋvo məŋgboŋgən, moŋvo na wasli muya'ən gəm net gilew sən Davit dit ɗiy nammbani. Vi aɗɗumoŋgək na: məzəlpaŋ ayaŋgək diyɗa gəm may dit meme tay ədenin a kapta-muyã.