2Samiyel 15 - Bible en GuidarAbsalom aslak əmõh məlyã 1 Təŋ səza aski, Absalom akay mawteɗ gəm pilseŋge, də ngaɓa net məzəlpaŋ kaklaw sle', məzunzoŋ abani. 2 Absalom əsilyen pumu, əsan ama tive na memeŋgle ɗewi. An ɗəf tay ətoŋ əka dolgoy ana məlĩ da nawtawa, Absalom iyani, ənah sən na: «Ɗəf na walaŋgəla-metiŋ mawan kənan di?» Ndən ənah sən na: «Balam nok na taka səddəv gebbet ɗiy na Israyel yi.» 3 Absalom ənah sən na: «Lewi, wən nokəŋ moggoni, də tiveni, ya ɗəf tay naprəm wən nok aza məlĩ ɓa.» 4 Absalom ənəh na: «Eh! Miy dəɗiyu mətawwən aka dəlvəŋ na, kəta azaw ɗiy pak adawkinən dolgoy gəm wən nawtaw pakə, wanətaw sit wən nani!» 5 An ɗəf van adek ɓe' afuŋ abani, ndən kãw ərma van le'gən slakat ərmani. 6 Vaski Absalom adaɗɗa dit ɗiy en dədazzoŋ də wən nawtaw ana məlĩ da pakə, agəmək maɗɗuleɗ ɗiy na Israyel. 7 Ama əgrak na əzva makaklaw poɗoni, Absalom aɓsən məlĩ na: «Apəl su tive kamə nəmbatgən a hebron əfaɗ an maw aynə nawgəɗ sən Yawe. 8 Vi balam nok aynanək man gala asan a Gesur aka dələv na Aram. Amna: “An Yawe amndawək a Yerusalem, asna wanəgəɗ sən wəza sən Yawe.”» 9 Məlĩ aɓsən na: «Dok zayə.» Ndən le' tek a Hebron. 10 Absalom nak aslin gewleɗ nan aza mahəlfaɗe net ɗiy na Israyel pak də wənah sit na: «An kəprəmənək əffo gozloro, kənahaŋgən na: Absalom asanək aka məlĩ a Hebron.» 11 Ɗiy sə Yerusalem səkat sula məyeti, yaŋ ambataŋ də Absalom. Addoŋ dəka slamma neti. 12 Absalom slən aza Ahitofel mə Gilo mətawan wən na Davit, sə walaŋgəla nan a Gilo, gala adawtaw wəla zəga amatuya. Wəslerma ambatək abe, ɗiy diyɗa dəddoŋ ammba Absalom. Davit anzanək sə Yerusalem 13 Məbay alabara payə, aprəman wənəs sən Davit dawnəh na: «Mekret ɗiy na Israyel aka Absalom yi.» 14 Davit anah sit ɗiy gugriɗ nan nazan a Yerusalem pak na: «Misili mənzamsəmə, vi tive nawkõh nam səba Absalom tay ɓa. Məgəm zukum, vi adazzan də kakara kawrufəm ɓa, waggbo' wəray akam, wabey ɗiy na walaŋgəla-metiŋ də masalam ɗarə.» 15 Gewleɗ na məlĩ aɓɗaŋ na: «Məlyã, va makra daya nam məlĩ awel pak belemɗe nok yeŋki.» 16 Məlĩ agilik dit ɗiy nan pak ambataŋgək də tilti. Məlĩ mbək gil gəreŋgiɗin kəlaw, vi dəganəngən gəla. 17 Məlĩ agilik dit ɗiy nan pak də tilti, aziweŋ go'o də gəla na ma poho faɗə. 18 Gewleɗ nan dəwənnet pak tahəŋ əddoŋ ɗakɗak abani, mə Keretɗe, mə Peletɗe, mə Gitɗe dit ɗiy səkat sləre məs dəzbanən məlĩ sə Gat. 19 Məlĩ aɓsən Ittay mə Gat na: «Vimi kədazzok də mənam tam di? Amndok dok əsok də məlyã. Vi molhõyõ kənani, əɗam kəde səka dələv noko'e. 20 Na dəfɗaŋga kəde, yaŋ dəpaŋ nədagdohõk də mənam ɗar in sən kiyu nəsən təki an nədaddaw ɓa. Amili, amndeget milmiŋgiɗko. Yawe dəɗɗa suk moggon nan də wəzaɓ nani!» 21 Ittay azlan sən məlyã, amna: «Va Yawe asan madarani, va məlĩ asan də zeŋgileni, sessel a təki daya naw məlĩ asani, adaki nədawsawa, a təki namtay awaniɓa nawsan madarani pak na, adak gawla nok adawsani.» 22 Davit aɓsən Ittay na: «As lewi atoŋ abe.» Ittay mə Gat atoŋguk abe dit ɗiy nani gəm kirtit pakə. 23 Ɗiy naka dələv nan pak tay əhəmaŋ heret pəreŋgi, ɗiy pak tahəŋ ətoŋgoŋgu. Məlĩ tay ətoŋ də məlpa na Kedron, ɗiy pak tahəŋ ətoŋgoŋ dəka tive na kapta-muyã. 24 Sadok pak tayi gəm mə leviɗe məslaŋ akoti na wənmiyna na Maŋgəlva pak dəndəni. Yaŋ aɗinən akoti na Maŋgəlva, məsdələv Abiyatar azaɓək-Maŋgəlva hã gap ɗiy dədazzoŋ sə walaŋgəla-metiŋ aggaraŋ gərakə. 25 Məlĩ anah sən Sadok na: «Amndan akoti na Maŋgəlva a walaŋgəla-metiŋ. An Yawe wagəɗ su moggon na, wamndaw kawlani gəm təki nassa nani. 26 An anahək na: “Maw tay akok ɓa,” asna in yakəŋ dəgəɗ su va aŋgələ.» 27 Məlĩ aɓsən məsdələv Sadok na: «Is tat ulani? Amil a walaŋgəla-metiŋ zayə. Ahima'as wətuko, Yonatan wətən Abiyatar, kirtukum suleŋ də mənokumu. 28 In sən kiyu wanənziy də wətoŋ kiy kapta-muyã, hã gap pay alabara səzokum adagapwa.» 29 Sadok də Abiyatar, amndaganən akoti na Maŋgəlva a Yerusalem, assoŋ adaka. Davit tay əslən Husay kakkes naza Absalom 30 Davit tay əpeŋ dəka mossorgo net heremeɗ də wəhəma. Kiyən sərətta ədaw tələn mekeleŋ. Ɗiy en dəndən pak asərətənək kiyti, əpeŋgeŋ də wəhəma. 31 Davit anahə, amna: «Ahitofel tay aret ɗiy en dəslerin met də Absalom.» Davit amna: «Yawe, in tat əkkamoko, adərwa'an pepet na Ahitofel!» 32 Davit agap aka dadwar ki mossorgo, adaki adagdukoŋ sənən Maŋgəlva, gala Husay mə Arki ade kawləm sən Davit, lukut nan məŋgaran də burɗuk akan kpu' kpu'u. 33 Davit aɓsən na: «An kəmbatək də in na, wasan su gədakə. 34 Ya an kəmndokuk a walaŋgəla-metiŋ “akəttepet pepetɗe na Ahitofel ambawa.” Dok aza Absalom anah sən dərəŋ na: Gawla nok nani, aw! Məlyã. Lahəŋ sən afuk nəgəɗ sən wəza, ya kakaŋ na, suki nədaɗɗa wəza kana. 35 May Sadok də Abiyatar məsdəlveŋge assoŋ na azok adak kaŋ ɓa sa? An kədaprəm səŋgil ana məlĩ da pak na, kənah sitgin məsdələv Sadok də Abiyatar. 36 Kirtit sulegit tahəŋ dənɗaŋ adaka, Ahima'as, wətən Sadok gəm Yonatan wətən Abiyatar; kəslinningin əkiy su əpel an kəprəmaŋ pakə.» 37 Husay bayna Davit, həmndak a walaŋgəla-metiŋ gala Absalom adawtoŋ a Yerusalem tamə. |
All right reserved
Bible Society of Cameroon