2Samiyel 14 - Bible en GuidarƏmnda na Absalom a Yerusalem 1 Yo'ab, wətət Seruya asənək na maɗɗula məlĩ azelik Absalom. 2 Yas Yo'ab van aslən əkayat ɗak məs maɗɗulat sə Tekowa, aɓsət na: «Kamə kəssãhangən zuk va ɗəf nok tay dərayə: kiynəgən gomboɗok azoko kamə, kədappay mẽl ɓa, kəɗigən zuk va ɗak məs tənzi aka əhəm kigəbaya. 3 Sissiŋ na Kəlgən aza məlyã, kəpel səngən vaŋka.» Yo'ab arban sətək an tədawnəha. 4 Guluk sə Tekowa nak tənah sən məlyã, ndət kiyit tək afuŋ təppu'u, təmna: «Atərwa! Aw, məlĩ nawa!» 5 Məlĩ aɓsət na: «Miy dəruhuk di?» Yaŋ təmna: «Aw! Məlĩ nawa, gagəbay nani, zəlu amtəka. 6 Balamək nok tat dit kirin mezeŋgleket sula; agayaŋgək awra, ɗəf tay nawtəret ɓa, arganən ziti, yaŋ maɓɓan abay məlməni. 7 Məlma pak asilik akawa, aɓɗaŋ na: aki məs dəbay məlmənəŋ məbaygən a gəla məlmən abayəŋka. Məzangən məzəmgəla van tamə. Vasna wazanən an taka dəpəl nəɗi haraw akani, ka sləma zəlu adawsan aka dəlvafuŋ ɓa yi.» 8 Məlĩ aɓsət guluk nak na: «Dok eŋgili, wanəgəm wən nokəs, ka wəna.» 9 Ɗak na Tekowa təɓsən məlĩ na: «Mbərayən nan akawi daya naw məlyã gəm aka gəla na əbba! Məlĩ də mazaŋga nan met bartatay yi.» 10 Məlĩ aɓsət na: «Ɗəf an dədawpel suko, aki suwa, atəpsən na ɗah wərəŋguk əmpa ɓa!» 11 Təmna: «Kamə kəta məlĩ dəɗɗumon iya na Yawe Maŋgəlva nani, vi məmpəlkiya adawwan əbay gəbay əmpa, ka kawzanən wətu ɓa.» Amna: «Sessel va Yawe asan madarani, muhur ki wutuk təttaka abət na afuŋ ɓa.» 12 Guluk təmna: «Balamək təpel taka sən daya naw məlyã kamə.» Amna: «Apeli!» 13 Guluk təmna: «Ya vimi kəɗɗum vas aket ɗiy na Maŋgəlva di? Də wəpel vaskəs na, məlĩ awlak kiyən na, araygənəka, vi dəmndagan ɗəf məs arɓahəŋ ɓaŋki. 14 Vi waməmtə, va iŋkile məggbo'it aka dəlvafuŋ, kamnday əmbeɗit əmpa ɓa, vas mənani. Maŋgəlva adə na gədəv aka ɗəf ɓa, aɗi wən nan na karɓahan ɗəf an mərɓahan faraɗa səzani ɓa. 15 Zəga an dəkiyu kakaŋ ənah sən wənəŋ sən daya naw məlĩ na, ɗiy dədawzlahgənən makrawa. Balamək nok təɗɗum na: Nəkkaman məlyã, kuzuŋ məlĩ waɗɗa an balamək nan tənah sənəŋ soko. 16 Vi məlĩ atafək əmõhũ səva ɗəf dədaŋgla əzaw də wətu pak səka dələv an Maŋgəlva apsəmə. 17 Balamək nok təmna: Kamə kəta əpel na daya naw məlĩ dəbbah aza əffeten wən nani. Vi məlĩ agilik va maslay na Maŋgəlva, awpak sləman ammba wən moggon də mbərayni pakə, Kəta Yawe Maŋgəlva nok dəsan də isi!» 18 Məlĩ azlan sət guluk nakə, amna: «Kamə kəɗaman su əpel təttaka an nəssohõkuk ɓa.» Guluk təmna: «daya naw məlĩ dəpeli!» 19 Məlĩ amna: «Va Yo'ab dətoŋ addəv wən kədawpeləŋ lah ɓa?» Guluk təzlan təmna: «Va zeŋgilok asani, daya naw məlyã, tay nawzi kevile akan səza an daya naw məlĩ apelis ɓa. Gawla nok Yo'ab dəɗi su wən nani, dəpsu əpeləs amaw pak ka nənoh sukgəni. 20 Vi kakkpaŋgan wən nani yi balam nok Yo'ab aɗɗa vaska. Maɗɗula daya naw va maɗɗula maslay na Maŋgəlva yi: nawsən zəga səka dəlvafuŋ pakə.» 21 Məlĩ anah sən Yo'ab na: «Wən azaɓka, dok əki gawla Absalom.» 22 Yo'ab atəkək kiyən afuŋ appu'u, asokon məlyã. Yo'ab amna: «Dəpaŋ balam nok asənək na, arahək ulasãh ama hara daya nan məlyã, adan məlĩ aɗɗa an balam nan apel sən pakə.» 23 Yo'ab asil ambat a Gesur, aki Absalom a Yerusalem. 24 Məlĩ amna: «Dəmndan ananda, haraw adawlan abaw ɓa!» Ndəni Absalom azar al eŋgil ananda, məza təmsa hara məlĩ ɓa. Davit aslerik də Absalom 25 Va dələv na Israyel asan dəwənnani, ɗəf tay lelew məɗi kiyən va Absalom ɓa, təŋ səza gədəv tələn gap aka dadwar kini, heslepe tay azan ɓa. 26 Ama wəzva pak tay əfaɗ kini, vi gədaki akani. An tay əslanən muhur kini, tay əday ki kilo sula, kilo va məlĩ aɗiyə. 27 Absalom awək kirin mezeŋgleket hoku, muguluŋgut taka, iya nat na Tamar. Guluk lallawəktə diyɗa. 28 Absalom asanək əzva sula a Yerusalem, məza ula hara məlĩ ɓa. 29 Absalom slən aza Yo'ab, vi kawslənən aza məlyã, ya dəŋger əzzan ɓa. Ndən slən masulan əmpa, dəŋger əzzan ɓa. 30 Aɓsit gewleɗ nan na: «Kulanənək guli na haykəmari pepreŋ na Yo'ab na maŋgavan naw ndak ɓa sa, məddoŋ məbaŋ sən offo!» Gewleɗ na Absalom abaŋ sənən offo sən guli naka. 31 Yo'ab le' mbat aza Absalom eŋgili, aɓsən na: «Vimi gewleɗ nok abaŋ sənən offo sən guli naw di?» 32 Absalom aɓsən Yo'ab na: «Vi nəslənək azok dawnəh na: “Ade nəŋgəl kawslənuk aza məlĩ na, vimi nəde sə Gesur di? Ɗaɗah va adak nəsaw zəga nawa.” Kakaŋ maw aka ula məlyã, an heslepe tay azaw na, dəbayugəni!» 33 Yo'ab ade aza məlĩ aboton səni. Məlĩ ayak Absalom, anzan ade, aɓe'ik kiyən afuŋ tək aba məlyã. Məlĩ armak Absalom təwəɗə. |
All right reserved
Bible Society of Cameroon