2Samiyel 13 - Bible en GuidarAmnon dət Tamar 1 An dəgəɗ dərɓaga as yaŋka. Absalom wətən Davit, məlmən tat lalawkə, iya nat na Tamar. Amnon, wətən Davit aŋglutəka. 2 Maɗɗula Amnon afayə̃k aka wən nat Tamar məlməni, azgək gbəgba' aka wən nata. Dəsən va adawgəɗ sət ɓa, vi goruk ŋgbuɓɓo tə. 3 Bayna Amnon tay adawyaŋ na Yonadab, wətən Simeya məlmən Davit. Yonadab məspepeti diyɗa. 4 Aɓsən na: «Wətən məlyã, vimi də pummo pak zuk zamzam di? Kəprəman su na ɓa sa?» Amnon aɓsən na: «Nəŋglutək Tamar məlmən məlmu Absalom.» 5 Yonadab aɓsən na: «Avoŋ aka zəga nawvoŋ noko, kəsokgən va məs gbagba'a. Pay afuk adazzan uluk na, kənah səngən na: Kamə məlmu Tamar tədegəni, təzəmgugən peŋ, tədagən əzəm van ama haraw nulagən nəzəmgən səvata.» 6 Yaŋ Amnon avoŋ firik gəɗe va məsgbəgba'. Məlĩ pay ulani, Amnon aɓsən məlĩ na: «Kamə Tamar məlmu tədegən əgəɗ su gatoɗe sula ama haraw aŋka, nəzəmgən səvata.» 7 Davit slən azat Tamar eŋgil də wənah sət na: «Kamə, dok ana məlmuk Amnon da ɗa, agəɗ sən zəga nawzəma.» 8 Tamar tek ana məlmət Amnon da, tay ɗuffo. Ndət gəpa gəm slãhslãh əslahni, ndət tawtawgən gato nak ama harani, ndət de'de' ədani. 9 Ndət kasli gəm təggbar abani, ya ndən ɓoŋ dawzəmən. Amnon amna: Migilgit ɗiy pak səzawa, ɗiy vit vit pak səzani. 10 Amnon aɓsət Tamar na: «Aki su əzəm van egziŋ nəzəmgən səvoko.» Tamar gəm gatoɗe təgəɗ neki, toŋgən sən Amnon məlmət egziŋ. 11 Ndət təl sən dəzəmgən naka, ndən kãw ərməta, aɓsət na: «Ade avoŋ səmə məlmuwa.» 12 Yaŋ təɓsən na: «Awwo! Vaski ɓa məlmuwa, kəraygu ɓa! Vi aɗɗa vas a Israyel ɓa. Kəgəɗ zəga na dərwas ɓa! 13 Ya naw aŋga nədawka ərbet wil naw di? Is zəknok va ɗəf mətemuk kədawsok a Israyel. Kakaŋ na, kamə ɗaɗah apel sən məlyã, aɓoŋ na dəpsuwu suk ɓa.» 14 Dəŋgəm əprəm mat ɓa. Armətək aska wəlata, asəntəka. 15 Yaŋ Amnon nak azelta, azelət dərwadərwa day ki əŋgla aŋgluwət naka, Amnon aɓsət na: «Asil dok səŋka.» 16 Təɓsən na: «Awwo, vi ərɓahawəŋ mbərayni metiŋgin day ki an kəgəɗ suwa.» Dəŋgəm əprəm mat ɓa. 17 Yaŋ aya gawla naka wəza nani, amna: «Kamə məgilgət waŋkəŋ səzaw appaka. Akəɗəsl su maddamba sə dərɓagata.» 18 Tat də lukut məs van azata, vi lukutɗe məs vaskiŋ gorɗeŋge ŋgbuɓɓo kirtin məlĩ adawguloŋgu. Məgəɗ wəza nan nak vitgət appaka, ndən maddamba kəɗəsl dərɓagata. 19 Tamar moŋglo akat pipik, lukut nazat məs van nak ŋgar əŋgarni. Vat akat seki, ziwgən vaŋvəl dawmbata. 20 Absalom, məlmət amna: «Amnon məlmuk asanək də is sa? Kakaŋ na məlmuwa, amsan moko kədawpel wən nan ɓa, məlmuki yi, kədawɗi maɗɗulok aka wən nan ɓa.» Tamar təsatək va guluk məzuɗəka ana məlmət Absalom da. 21 Məlĩ Davit aprəmək wənəs pakə, adan sənək gədəvən diyɗa. 22 Əpel təttaka tay Absalom apel sən Amnon ɓa, dəpel mbərayən ɓa, dəpel moggon ɓa, vi Absalom azelik Amnon aka batam araygət Tamar məlməni. Əmta na Amnon 23 Wəzva sula dərɓagani, ətaw zeŋze net timeŋgiɗ na Absalom tay ananda, a Ba'al-Hasor, go'o də Efrayim, Absalom ayek kirtin məlĩ pakgiti. 24 Absalom pay aza məlyã, amna: «Tay ətawaŋ zeŋze net timeŋgiɗ ana gawla nok da. Kamə, məlĩ dədegən dit gewleɗ nan a wəzləra ana gawla nan da.» 25 Məlĩ aɓsən Absalom na: «Kamə vaski ɓa wətuwa, adawsan suk gədak an mələk pakə.» Ampak tələn azani, dəngəm əmbat adak ɓa yaŋ asokoni. 26 Absalom amna: «Asna kamə məlmu Amnon dəmbat də mənamə.» Məlĩ aɓsən na: «Vimi dəlgən də is di?» 27 Absalom ampak tələn təkə, Yaŋ məlĩ aslən Amnon dəndəni gəm kirtin məlĩ pakgiti. 28 Absalom aɗi wən nan sit gewleɗ nani, amna: «Kamə mula an mbazla abayək Amnon, wanənah sukum na: “Məbay Amnon!” Kəbaynəngəni kədawgeslne'eŋ ɓa. Intə nəɗi sukum wən nan ɓa sa? Məsok zukum, məssoŋ guromɗe!» 29 Gewleɗ na Absalom aɗɗaŋ sənənək Amnon va Absalom aɗi sit wən nani. Kirtin məlĩ hirr pakə, naway pak peŋ aka koropələs nan anzoŋgu. 30 Tak tahəŋ aka tive ləŋgə, alabara agap Davit, dawnəh na: «Absalom abeyik kirtin məlĩ pakgiti. Tay dəpəl səmmbet taka ɓa.» 31 Məlĩ le' ŋgarŋgargit lukutɗe səzani, ndən ɗuf afuŋ. Məɗɗaŋ wəza nan nazan adak eŋgeretinik lukutɗe neti'e. 32 Yonadab, wətən Simeya, məlmən Davit amna: «Kədawnəh na, məbeyti gewleɗ kirtin məlĩ pakə ɓa, daya nawa. Amnon takərgən məbayən kaka'ə. Vi wən nan tay ama Absalom kawwã təŋ səza Amnon araygət Tamar məlməni. 33 Kakaŋ na daya məlĩ naw adawɗiyən a makran dawnəh na: Kirtin məlĩ pak amtaŋka ɓa. Owwo! Amnon dəmtə kaka'ə.» 34 Absalom ɓakə. Gawla məgə memeŋgle le'gən haran na, awla vanday net ɗiy ɗəkɗək aka tive dərɓagan dəba gərma. 35 Yaŋ Yonadab anah sən məlĩ na: «Kirtin məlĩ azzoŋguk va balam nok anah naka.» 36 Tay əgrak əpel nani, kirtin məlĩ nek derzehi. Aslanənək wəlet aza wəhəma. Məlĩ dit məɗɗaŋ wəza nan baymet ahəmaŋgək heret pirreŋgi. 37 Absalom ɓak tek ana Talmay, wətən Ammihur, məlĩ na Gesur da. Davit anziyək aka əhəm kigəbay wətən Amnon. 38 Absalom ɓak ambat a Gesur, asanək adak əzva hoku. 39 Məlĩ Davit appanək Absalom sə makrani, vi makran affetik səka əmta na Amnon. |
All right reserved
Bible Society of Cameroon