2Samiyel 12 - Bible en Guidar

Natan aza məlĩ Davit

¹ Yawe tay əslən Natan aza Davit. Ndən tek gas ərəhni, aɓsən na: «Ɗiy sula tahəŋ a walaŋgəla-metiŋ taka, taka məsarya, taka məs sahã.

² Məsarya tay dit timeŋgiɗ gəm wasliɗe diyɗa.

³ Na məssãhã nan zəga tay ta'sa avan adəbər kiyət zagarak muzliyak təttaka albah avan ɓa. Tay əzgəlta, təɓayək ananda sap dit kirtini. Way an adawzəm tədawzəma, an adawsa tədawsa, aban tədawvoŋgo. Təkkpaŋgək azan va waŋkə.

⁴ Malaka pay ana məsarya da naka. Dəŋger əgəm səret timeŋgiɗ nan may səret wasliɗe nan kawfot sən malaka məs dəde ananda nak ɓa; yaŋ agəmət zagarak na məssãhã nak afot sənət ɗəf dəde ananda naka.»

⁵ Gədəv Davit adək diyɗa aka ɗəf naka, aɓsən Natan na: «Va Yawe asan madarani, ɗəf dəɗɗa zəgas adahək namta!

⁶ A gəlat zagarak kəskə wafaɗ va ndət va ndət təl poɗo, adan aɗɗa zəga nan vas dula sãh ɓa.»

⁷ Natan aɓsən Davit na: «Istə ɗəf vani! An Yawe Maŋgəlva na Israyel anah yaŋka: Intə nəɗiyuk ka məlĩ aka Israyel, intə nəkõhguk səva Sawlu.

⁸ Nəpsukuk gəla na daya noko. Nəpsukik gil na daya noko. Nəpsukuk ɗəf titir na Israyel də an na Yuda pakə. An agəska wanəpsuk məday ki aska'e azani.

⁹ Vimi kəzelen əpel na Yawe kaɗɗa mbərayən ama haran di? Kəbayək Uri mə Hitti də masalam, is gəm əgəmət guluk nan ka guluk noko, ndən sən kiyən is bay əbayən də masalam net mə Ammonɗe.

¹⁰ Kakaŋ na masalam abew na səŋgil anokda ɗah ɓa, vi kəzelewək də wəgəmət ga Uri mə Hitti təsatgən ka guluk noko.

¹¹ Vaŋki Yawe anahə: Go'o nan aza əsilgin tatwãh akok səddəv gəla noko. Wanigim gil nok korok koroko, kepsin ɗəf nok tusso, wavoŋgit kapay kapaya.

¹² Vi nok də mahaɗamma kəɗɗa, naw kapay kapay nədaɗɗa suk a maheret ɗiy na Israyel pakə.»

¹³ Davit azlan sən Natan na: «Nəgəɗək mambray aza Yawe.» Natan aɓsən Davit na: «Yawe avvuyonək mambray noko; Kəmtə na ɓa.

¹⁴ Də as pak hara na, kədanək gədəv Yawe də wənəŋ diyɗa. Vini wutuk muwan kakaŋkəŋ wamtə.»

¹⁵ Natan amndanək ananda. Yawe azganək wiyən məs Batseba ga Uri tuwə sən Davit nak gbəgba'a.

Əmta na wətət Batseba

¹⁶ Davit akayək əbbah aza Maŋgəlva ammba muzliya naka, agəɗək meme, aza dəfəɗ pak an alək eŋgil ananda, ndən əvoŋ ɗuffo.

¹⁷ Ɗiy məsɓet nananda ampanənək tilit azan vi dəsilgən səfuŋ, ndən ɓoŋ, awzəm way ndənɗaŋ ɓa.

¹⁸ Dərɓaga lumu taka, muzliya nak arayə. Məɗɗaŋ wəza na Davit ageslne'eŋgik də wənah sən wən nan na, muzliya arayka, vi əɗɗum net na: «Gala muzliya asan madarani, mənah sənəka dəprəm mam ɓa, mbarmbar mədawnah sən na: Wiyən nak amtəka di? Wagəɗ wən soko!»

¹⁹ Davit awle gewleɗ nan əseske'eŋ aka weleŋti, asənək na muzliya nak dərayə. Davit anah sit gewleɗ nan na: «Muzliya van arayək sa?» Aɓɗaŋ na: «Arayka.»

²⁰ Davit le' səfuŋ, ndən tek po' po' mẽl faɗ faɗə, lukutɗe nan dədəɗgiti; ndən toŋ addəv gəla na Yawe, yaŋ appu'u. Səza amil eŋgili, assohẽt dəki sənəngən waya, ndən nam namə.

²¹ Gewleɗ nan aɓsənən na: «Mə zəga miy kəgəɗəŋ di? Aka muzliya dəray ɓa dərəŋgə, is tat əɗɗa meme, əhəma, yaŋ muzliya aray na, is le' way nam namə!»

²² Yaŋ amna: «Ya pay muzliya asan madaran nədaɗɗa meme gəm nədahəm na: “Əɗɗum naw na kuzuŋ Yawe wawla sasãhũ, muzliya wambələ.”

²³ Ya kakaŋ na amtək səkay, sən miy nədaɗɗa meme sam di? Wanəmilgən əmpa sa? Intə nədaddaw dəzan ɓa na, ade na kəlazaw ɓa!»

Uwa na Salomoŋ

²⁴ Davit azzayan sət makrat Batseba ɗak nani, alək azata, asəntəka. Ndət bok wiyna, alvanən matak na, Salomoŋ. Yawe aŋgluka

²⁵ ndəni Yawe aslən əprəman sən Davit. Alvan wiyən nak də ma məskəleŋ Natan na Yedidya, va wənəh na, məs Yawe aŋgələ.

Əfãya gəm tatwahã ( 12:26—20:26 ) Davit amõhək walaŋgəla-metiŋ na Rabba

²⁶ Yo'ab awaksənək Rabba, walaŋgəla-metiŋ net mə Ammonɗe, amõhũk walaŋgəla-metiŋ na məlyã.

²⁷ Yo'ab aslənik maslənɗe aza Davit, yaŋ amna: «Nəgayək a Rabba, nəmõhũk walaŋgəla-metiŋ net iŋkile.

²⁸ Kakaŋ na, asapet madembirgit məzəlpaŋ kəsərŋgəslgən walaŋgəla-metiŋ vani, kəmõhgən is sən kiyko. Vi nədawmõhən ka kawyan də iya naw ɓa.»

²⁹ Davit asapetik məzəlpaŋ baymeti, ndən tek a Rabba, awaksəni, amõho.

³⁰ Yaŋ apoŋ kulpupu na məlĩ net səkani, gagdak na kulpupu na meleŋges tay day ki kilo kaklaw hoku, kulpupu van tay də gərəm na sləma akani, məɗup səni Davit akani. Akək zəgeɗ nawrəh na ma wəgay diyɗa sə walaŋgəla-metiŋ.

³¹ Agilgitik ɗiy en naddəvən azi əɗɗa wəza dit slohoŋɗe nantar wəleŋɗe, təbəzɗe nawziyan təkiya gəm zlimbeɗi. Akek əbay menekeɗe. Vaski adaɗɗa dit walaŋgəleɗe gugriɗ net mə Ammonɗe meɓɓet pakə. Davit amndanək dit məzəlpaŋ nan pak a Yerusalem.