2Samiyel 11 - Bible en Guidar

Davit dət Batseba ( 11:1—12:25 ) Davit agəmtək Batseba

¹ Dukki nan də mənziya, pay milyeŋge adawmbataŋ əlpa, Davit aslənək Yo'ab dit gewleɗ nan dəndəni, dit mə Israyelɗe baymeti. Abeyninik mə Ammonɗe, ndəɗaŋ Rabba sərŋgəslə. Davit sən kiyən asanək a Yerusalem.

² Də moskoyo, Davit asilik səka zəga nawvoŋ nani, tay əbbal aka təgbalka na məlyã. Ndən təm guluk səka gəla tat əslslaya. Guluk vat Lalawəktə diyɗa.

³ Davit aslən əssõh akat guluk vatə; mənəh na: «Batseba tə, wətən Eliyam, ga Uri mə Hitti ɓa sa?»

⁴ Davit slən maslənɗe əgəmta. Ndət pay azani, asəntəka, far təslslay səzet koɗɗe nat ɓa, yas təmndat eŋgili.

⁵ Guluk nak təgəmək daway. Təprəman sən Davit, təmna: «Də daway nani.»

⁶ Davit slən aza Yo'ab, amna: «Aslən su Uri na Hitti.» Yo'ab slən əslən Uri sən Daviti.

⁷ Uri pay azani, Davit assohõn zay na Yo'ab dit məzəlpaŋgə, gəm va mbari əgay adawtoŋ di.

⁸ Davit aɓsən Uri na: «Dok eŋgil anokda effeten zuko.» Uri vit səŋgil ana məlĩ da, məlĩ aslən sən əvəl na makaryam.

⁹ Yaŋ Uri avoŋ a meŋgle na məlĩ dit gewleɗ na daya nan pakə, dəmbat eŋgil ananda ɓa.

¹⁰ Mənah sən Davit na: «Uri dəmbat eŋgil ananda ɓa.» Davit aɓsən Uri na: «Sə malaka kəde, vimi kəmbat anokda ɓa di?»

¹¹ Uri aɓsən Davit na: «Akoti na Yawe, dit məzəlpaŋ na Israyel dit en na Yuda, a gizlirkeŋ, Yo'ab daya net məzəlpaŋ dit ɗiy gugriɗ net məzəlpaŋ appakaŋ kporu. In kan nəmbatgən eŋgil əzəma, wəsa, gəm kawvoŋ dət ɗak nawa? Va kəsoko, zeŋgilok madarani, nəgəɗ na zəga vas kpak ɓa!»

¹² Davit aɓsən Uri na: «Asok aŋ dəpaŋka, mazayən na nəppokgən kəlgəni.» Uri asanək a Yerusalem dəpas hã gap mazayən nani.

¹³ Davit dah iyan tasən əzəma gəm mbazla, hã mbazla bay əbayni. Ndən vit moskoy ədda əvoŋ aka zəga nawvoŋ naffet nan dit gewleɗ na daya nani, ya dəmbat eŋgil ananda ɓa.

¹⁴ Də pummo nani, Davit aver ɗerewel sən Yo'ab, aslən ammba va Uri.

¹⁵ Aver addəv ɗerewel van dawnəh na: «Məɗi Uri abe də təki wəgay asan vak vakə, vasna kəmu'oŋgən səmmbani. Kawbayni wamtə.»

Əmta na Uri zələt Batseba

¹⁶ Yo'ab, məzuga walaŋgəla-metiŋ məsərŋgəslən naka, yas aɗi Uri a təki asən na adaki məzəlpaŋ gembereɗ net meseŋgiɗit assoŋgu.

¹⁷ Ɗiy na walaŋgəla-metiŋ, agilyoŋ əgay də Yo'ab. Abayaŋgək səret ɗiy gəm məzəlpaŋ na Davit. Uri mə Hitti pak amtəka.

¹⁸ Yo'ab slən əprəman wən nawgay pak sən Davit.

¹⁹ Aɗi wən nan sən maslən, dawnəh na: «Pay kədagrak əprəman sən wən nawgay sən məlyã,

²⁰ an gədəv məlĩ adək anah sukuk na: “Vimi kəzaraŋ go'o ama walaŋgəla-metiŋ van əgay di? Kəsənnən na, kawhũkumi sə disiŋ ki zlava ɓa sa?

²¹ Naway dəbay Abimelek wətən Yerubbeset na Tebes di? Guluktə təzgan buwən nawsər ki zlava akan amtə a Tebes ɓa sa? Vimi kəzaraŋ go'o aza zlava di na?” Kənahgən na: “Uri, gawla nok mə Hitti pak amtəka.”»

²² Maslən mbatə, səza agapə, aprəmanək an Yo'ab aslən aka wən nan sən Davit.

²³ «Maslən aɓsən Davit na: Ɗiy vet tahəŋ əkaŋ səməni. Agilyoŋguk akam awra, məgayək dənɗaŋ hã gap a memeŋgle.

²⁴ Məhõtin herɗe ahõtinik belemɗe nok ki zlava. Məzəlpaŋ na məlĩ amtaŋka, gawla nok Uri mə Hitti pak amtəka.»

²⁵ Davit aɓsən maslən na: «Vaŋ kədawnah sən Yo'ab: “Kədawla wənəs va wən mbərayən ɓa. Addəv əlpa pak masalam dahã dahã adawbay ɗiyi. Amndok awaksən walaŋgəla-metiŋgin van zuk soksok kəɓzlugəni.” Asɓan makrani.»

²⁶ Adan guluk na Uri təprəm na, zələt amtəka, təhəmək ammba zəlta.

²⁷ Gəlabay atoŋko, Davit slən əkiyta. Asapatək ananda, təkkpaŋgək ɗak nani, ndət bok sən wiyin mizilin. Ya zəga an Davit agəɗəs tay lew ama hara Yawe ɓa.