2Samiyel 1 - Bible en Guidar

Əzəm məlĩ na Davit aka Yuda ( 1:1—4:12 ) Əmta na Sawlu

¹ Dərɓaga əmta na Sawlu, səza Davit aska wəla Amaleki, Davit amndan a Siklag. Asan əsɓəta sula.

² Aka pay mahokon na, ɗəf adek sə dibirgidik na Sawlu. Lukutɗe nan pak məŋgereti, burɗuk aka kiyən kpu' kpu'u. Adan agap aba Daviti, appu'uk afuŋ abani.

³ Davit aɓsən na: «Səŋga kəde di?» Azlan sən na: «Sə dibirgidik na Israyel nənzawa.»

⁴ Davit amna: «Kamə aboton su an dətoŋ ɗa.» Ɗəf nak amna: «Məzəlpaŋ na Israyel anzoŋguk səma wəgaya, məbay yi səret məzəlpaŋ diyɗa. Sawlu də Yonatan wətən dayday amtaŋka.»

⁵ Davit anah sən gawla nak na: «Də tive mi kəsən na, may Sawlu də Yonatan wətən amtaŋka di?»

⁶ Gawla məki alabara nak amna: «Daka' in tat aka gərəm na Gilbo'a, nawla Sawlu ɓe'e aka tulhõ nani, mawteŋɗe nawgay dit deyeɗe net pilseŋge tahəŋ ne'ne' nawrufnəni.

⁷ Ndən kpaŋgən haran dərɓe təm uluwa, yas ayuwa. Nəmna: “In yakəŋkə.”

⁸ Aɓsu na: nawa kənan di? Nəɓsən na: Mə Amalek nani.

⁹ Yaŋ aɓsu na: Kamə azar azaw aŋ abaywa, vi də nəsaw madaraw tagay zlaŋ na, kiyu viwwe yi.

¹⁰ Yaŋ nəzar azan nəbaya, vi nəsənək na, wambəl dərɓaga askotuŋ ɓa. Yaŋ nəgəm kulpupu na məlĩ səkani gəm gavi naka vani, yas nəki sən daya naw aŋka.»

¹¹ Davit arme lukutɗe nan aŋgereti, ɗiy en dəssoŋ dəndən pak aɗɗaŋgək va nani.

¹² Askaŋ morkoyo, ahəmaŋ gəm aɗɗaŋ meme hurruɓ ammbet may Sawlu də Yonatan wətəni, ammbet ɗiy na Yawe gəm mə Israyelɗe, vi məbeyti də masalam.

¹³ Yaŋ Davit anah sən gawla dəki sən alabara nak na: «Səŋga kənan di?» Yaŋ amna: «Wətən molhõyõ mə Amalek nani.»

¹⁴ Davit aɓsən na: «Mbari kəgeslne' dawslan vok aka mesiya na Yawe ɓa, kəzanəŋ di?»

¹⁵ Davit dah taka səret gewleɗi, amna: «Ade abaya!» Yaŋ abay amtə.

¹⁶ Davit aɓsən na: «Mbel nok dəmndoŋ akoko, vi mok dəkayan suk dawnəh na: In nəbay mesiya na Yawe.»

Əska morkoyo na Davit ammba Sawlu də Yonatan

¹⁷ Yaŋ Davit aɓap wəla gəlyaŋ naska morkoyo, gəlya naska morkoyo ammba Sawlu də Yonatan.

¹⁸ Amna: (Kawyagan bəle sit mə Yudeɗi. Məverni addəv ɗerewel na ɗəf təstəsə.)

¹⁹ Məmboktiŋ guromɗe nok is Israyel aket mossorgoɗe noko, mbar məs mekret nok askotoŋ kana!

²⁰ Kədabbalanən wən nan a Gat ɓa, kədawtrayanən aket tiveɗ na Askelon ɓa, ka gorɗeŋge net mə Filistiɗe adannekenən zit ɓa, gorɗeŋge net ganyẽɗ adawpepɗekeŋ nannek ɓa.

²¹ Gərmeŋge na Gilbo'a, minɗe də buwən aziyaŋ na akokum ɓa, gulyeŋge nabokum assoŋ na də ba'ar ɓa. Vi adaki mərnoket barayɗe net məs mekreti, məppay səni mẽl sən baray na Sawlu ɓa,

²² abbər mbel net ɗiy məbeyti, səlhã net gambereɗi, bəle na Yonatan adder dərɓe ɓa gəm masalam na Sawlu amndan bartata ɓa.

²³ Sawlu də Yonatan aŋgluwənək ziti, addəv əssa neti, addəv əmta neti, dəgohoŋ ɓa, kakara net day ki na gazla, makra net day ki net ɓooliɗi.

²⁴ Gil na Israyel, məhəm ammba Sawlu! Ndəni dədawgul sukum lukutɗe na sləma ɗiwɗiwi, ndən dədawbay gawla də meleŋge azet lukutɗe nokum.

²⁵ Mbar məs mekret amtaŋ addəv əlpa di? Mbar Yonatan amtə aket mossorgoɗe nok di?

²⁶ Makraw tay əssaw ammboko, Yonatan, məlmuwa, maybay naw kənan sawɓa. Əŋgla nok azaw tay va nawnəhĩ ɓa, adayək ki əŋgla net gil azawa.

²⁷ Mbar məs mekret askotoŋ vaŋka! Zəgeɗ nalpa azaŋka!