2Piyer 3 - Bible en Guidar

Əzza an bayma faɗ na Kristu ( 3:1-18 ) Daya wamili

¹ Bayneŋgiɗwa, letər masula'ən nədawver sukum yaŋ ləŋgə, addiviti, nəŋgəl kafɗahan sukum əɗɗum moggon addəv maɗɗulokum.

² Vi kəɗɗumonəngən əpel məs məskəleŋɗe salala apeleŋ lahəŋka gəm net maslənɗe nokum, ana mahenziŋ na Daya məzukõhgəmə.

³ Məsən tagay na, pay əgrak dəlva, ɗiy məmasaŋ aka ɗəf wazzoŋgu, wadawaŋ addəv əŋgla na gəɓa ziti.

⁴ Wanahaŋ na: Ŋgay iynama naka əzza nan nak di? Vi va səza efiŋgiɗim amtaŋgə, zəga pak tay va aka məzəməɗən!

⁵ Asgətaŋgək wa' na, disiŋ də dəlvafuŋ tahəŋ farə, dəlvafuŋ səret iŋkile agili, aziw aket iŋkile də əpel na Maŋgəlva.

⁶ Ndəndit vani azan dəlvafuŋ an far dit iŋkile, asulupnəni.

⁷ Ya disiŋ də dəlvafuŋ an kakaŋkiŋki, məɗiti ta' sən offo də wəpel vani. Məzeɓeti vi pay nawtawwəna gəm pay nawza net ɗiy mbəreyti.

⁸ Ya zəga tay taka, kədazgətaŋ kiyən ɓa bayneŋgiɗwa, aza Daya na pay taka tay va əzva gabal, əzva gabal va pay taka.

⁹ Daya tay əlya də əknahan iynama nan va ɗiy meɓɓet adaɗɗumoŋ ɓa. Ya tay əɓəs sukum vi dəŋgəl ɗiy meɓɓet dəzaŋgən ɓa, kəta ɗiy pak dəgapaŋgən aza əɗi marava.

¹⁰ Də as pak na, pay na Daya wade va məhala. Dəpas na disiŋ wazə də gogoyo metiŋgini, zəgeɗ dərmaŋ offo pak walyuɓoŋgu, dəlvafuŋ dit zəgeɗ nakan pak assoŋ na ɓa.

¹¹ Adan zəgeɗ pak wazaŋ vaska, kəsənənək va kədassoŋ. Məssoŋ addəv salala, məzban Maŋgəlva də gegesiŋ.

¹² Ka pay nazza na Maŋgəlva məs kədawgaŋgən dəgapgən gu'u, pay nani disiŋ adawzla gəm adawza, ŋgirzleɗ wewwereŋ sən offo.

¹³ Disiŋ meleketen də dəlvafuŋ meleketen mədawga va aza iynama nani, adak təstəs asani.

¹⁴ Vi vaski bayneŋgiɗwa, dawga payəska, məsok zukum kəssoŋgən salala, məza də heslepe azokum ɓa aba Maŋgəlva, məssoŋ zay dəndəni.

¹⁵ Məsən na əɓəs na Daya nam akol sukumək tive ka kəkõhoŋgəni, va məlməm na makram Pol aver sukum də maɗɗula məs Maŋgəlva apsəni.

¹⁶ Va aver addivit letərɗe nan pak an tay əpel aka wənəŋka. Wən temtem tuwãh aza əprəm tahəŋ diyɗa. Məs ɗiy məs əsən tay aket ɓa gəm en məddekit adawslokoronən əprəm nan va adaɗɗaŋ də gəla təki naddəv Əver maɓɓan temtemi. Vas adawkiyən əza aketi.

¹⁷ Ya nokum bayneŋgiɗwa, kəsənənək wən nan daabəŋ. Məzi zukum, vi ɗiy məza mahenziŋ ɓeŋ adawzokumən kəskotoŋgən səka əziw ɓəlɓəl nokum ɓa.

¹⁸ Məɓay addəv mbəlembəle də əsən Daya nam məkõhgəmə, ndəni Yesu Kristu. Gagdak nani təŋ kakaŋka hã faɗə. Amen.