2Piyer 2 - Bible en Guidar

Mərbaŋ tepelke ( 2:1-22 ) Mərbaŋ zəga na tepelke

¹ Va məskəleŋɗe məwaŋ tepelke azzoŋ aweleŋgit ɗiy lahəŋka, vaski yi'e mərbaŋ wən na tepelke adazzoŋ a waloŋkum. Wakiyaŋ zəga narba na tepelke məs nawkan a təki nawza, wazelenən Daya məs dəkõhgiti, vi vaski əza warihe.

² Də as pak ɗiy diyɗa wazbetin addəv ɗarɗar neti, aka wən neti, ɗiy wapeleŋ mbərayən aka gegesiŋ.

³ Addəv əsim deleɗ neti, wawaŋ sukumən tepelke vi kappətkumənən. Far mətawwən aketi, əza net aliy na ɓa.

⁴ Vi Maŋgəlva dəppet maslayɗe məs dəɗɗaŋ mambray ɓa, tahəŋ miynət aket ngiyamɗe məzget addəv guzli əga pay nawtaw wəna.

⁵ Dəppan ənziya egge an far ɓa, abbər Nuwe ɗəf təstəs akõhgən dit ɗiy nan buhul aka aki buwən məvekeveke aka ənziya egge net ɗiy mbəreyti.

⁶ Gəm azet walaŋgəlaɗe gugriɗ na Sodom də Gomorra azlak kpaŋ moŋglo, vi məɗɗaŋ mambray pak dulanəngən an dədazzan aket tamə.

⁷ Akõhgənək Lot, ɗəf təstəsə, məs ədaw na polkoyo net məɗɗaŋ mbərayən adassan sən makran pay pakə.

⁸ Vi Lot, ɗəf təstəs dəsan a walaŋgit tay uleti gəm tay əprəmti: pay pak, megenenen tay əzəmsahã vi wəza net mbərayən.

⁹ Daya asənək va adawkõhgit ɗiy təstəs səma əzəmsahã, ya tay əppet məɗɗaŋ mambray vi pay nawtaw wəna.

¹⁰ Sasak ɗiy en məɗɗumoŋ aka əsim na gəɓa zit mbərayən dit məzuzelenən gagdak na Maŋgəlva. Məɗiyən ki zitiski, tahəŋ əɓaygənən ki zit diyɗa, awgeslne'eŋ sitin ɗiy gagdakɗe ɓa, tahəŋ əretini.

¹¹ Ya maslayɗe məs də gbogboŋgo gəm də əɓap diyɗa dərəŋ awkaŋ dolgoy aket də əret aba Daya ɓa.

¹² Ya ɗiyiski tahəŋ va zəgeɗ memeyẽɗi, kiyit tay ɓa, muwet vi karmet kawbeyti, tahəŋ wəranən an məs dəsənən ɓa, wazaŋ va zəgeɗ memeyẽɗ adawzaŋgə.

¹³ Wazəmaŋ sahã a gəla mbərayən neti. Tahəŋ ənnekenən zit də əknahan əsim zəga na gəɓa zit mbərayən a maheret ɗiyi, tahəŋ əzəmaŋ də munokum, tahəŋ ənnekenən zit də əɗɗa vurum neti.

¹⁴ Heret sekke aka əkuh a gizbe, awyaŋ daɗɗa mambray ɓa. Tahəŋ əmbəɗet ɗiy en dəsɓaŋ ɓa. Aɗiyənək mekret aka əsim nawrəh deleɗi. Kirin məreygitiŋ.

¹⁵ Yaŋ appanən tive moggoni, azaŋka, azbanənək tive na Balam wətən Bosor məs dəŋglu ərəh na əɗɗa mambraya,

¹⁶ ya arahək əhay vi wəza nani. Vi koro zəga məza awpel ɓa, yaŋ apel sən va ɗəfa, atakək wəza na məskəleŋ mətemnəska.

¹⁷ Net tahəŋ va vov net iŋkile dəkkpa'aŋgə, tahəŋ va buwən miyman məs səmyã adawka, guzli titir tay əgeti.

¹⁸ Tahəŋ əpeleŋ wən nawɗi kiy zit ɗarə. Tahəŋ əmbəɗetin ɗiy də əsim zəga na gəɓa ziti gəm polkoyo, vi karme ɗiy məs dəgilyoŋ səzet ɗiy məɗɗaŋ mambraya.

¹⁹ Tahəŋ iynanən met dəssoŋgən na kiyti, mbaraka ndəɗaŋ vet belemɗe na əzaŋgə. Vi zəga məs dəska wəla ɗəf pak akkpaŋganək balam nani.

²⁰ Vi an ɗiy akõhoŋguk səza mambray naka dələv də əsən Daya nam Məzukõhgəm Yesu Kristu, yaŋ amsakaŋ ətoŋgoŋ addivit zəgeɗ nek əmpa askanən wəleti, əgrak net wasan mbərayən day ki an lahəŋka.

²¹ Ɗəɗah sit va dəsənən tive an təstəs ɓa, ki asənəni, amzlahaŋ səka mahenziŋ an salala məpsiti.

²² An naddəv wənməkkpaŋga nak arihik gesiŋ: Kəra aparka amilik əzəm əpar nani, vedem aslayka amndan əvoŋ ara ndərɓa.