2Milyeŋge 9 - Bible en Guidar

Yehu aka məlĩ na Israyel

¹ Yaŋ məskəleŋ Elisa ayə taka səret məskəleŋɗe, anah sən na: «Aynan dadakko, agəm bəbər na mẽləŋ avoko, dok a Ramot na Galad.

² An kəgapək adaka, kəkayangən Yehu wətən Yosafat, dəhən Nimsi. Kətoŋgəni, kəsilgingən sə waleŋgit milmiŋgiɗni, kəkagən a tuzoŋ.

³ Kəgəmgən bəbər na mẽl nak kəman səngən aka kini, kənahgən na: “An Yawe anah yaŋka: Də mẽl nədawman suk aka kikuŋki nədawɗiyuk məlĩ aka Israyel!” Kəkolgən maddamba kan kənzokgən məza sosoko ɓa.»

⁴ Gawla məskəleŋ nak mbat a Ramot na Galad.

⁵ Yaŋ agap adaka, deyeɗe net məzəlpaŋ na Israyel yeŋ gurom guromu; yaŋ amna: «Wən tay amaw nawnah suko daya!» Yehu amna: «Sən nawa səram pakəŋ di?» Amna: «Suk anok is daya!»

⁶ Yehu le' toŋ eŋgili. Gawla məskəleŋ nak pəla' sən mẽl aka kini, amna: «Yaŋ an Yawe Maŋgəlva na Israyel anahə: Də mẽl nədawman suk aka kikuŋki nədawɗiyuk məlĩ aket ɗiy na Yawe, aka Israyel.

⁷ Kəzangən gəla na Akab daya noko, wanəmpəl kiyit mbel net məɗɗaŋ wəza naw məskəleŋɗe gəm kiyit mbel net məɗɗaŋ wəza na Yawe pak səvat Izabel.

⁸ Gəla na Akab dədawza kakãhə, wanəzan ɗəf mizilin neŋgil ana Akab da pakə, belemɗe dit en na kiyit na Israyel pakə.

⁹ Wanəɗɗa ka gəla na Akab dəsangən va na Yerobo'am wətən Nebat gəm va gəla na Ba'esa, wətən Ahiyya.

¹⁰ Nat Izabel tamə, kirɗe wampərtən a guli na Yizrel, ɗəf tay nawndəkət ɓa.» Ndən maddamba kol ɓakə.

¹¹ Yehu vit azet belemɗe na daya nani. Aɓsənən na: «Zay yi kpakə? Vimi mitemnəs ade azok di?» Azlan sit na: «Munokum zəknokum, kəsənənək ɗəfəs də nzukumnzukum nani.»

¹² Aɓɗaŋ na: «Wən kədawwa, kamə anah səmə!» Amna: «An anah su yaŋka, amna: Vaŋ Yawe anahə: Də mẽl nədawman suk aka kikuŋki nədawɗiyuk məlĩ aka Israyel.»

¹³ Ndəni naway pak agəm zən əgəm lukut nan də kakara, apeknin ammba tələn aka hara tive, affonən gozloro, aɓɗaŋ na: «Yehu məlĩ yi!»

Yehu tay ətuvur wən aka Yoram məlĩ na Israyel

¹⁴ Yehu wətən Yosafat, dəhən Nimsi, atuvuruk wən ammba Yoram gala Yoram dit ɗiy na Israyel pak adawgayaŋ wətak Ramot na Galad səva Hazayel, məlĩ na Siri.

¹⁵ Məlĩ Yoram, amilik a Yizrel, iynet huwweɗ na vaŋvi an mə Aramɗe aɗiyaŋ sənən pay adawgay də Hazayel məlĩ na Aram. Yehu amna: «Adan kəsapaŋ azawa! Ɗəf adawgilyen sə walaŋgəla-metiŋ kawka alabara a Yizrel ɓa!»

¹⁶ Yehu apeŋ aka mawta nawgay nan, ambat a Yizrel. Yoram tay adak ɗuffo də gbəgba' nani, Akaziya məlĩ na Yuda adek ula Yoram.

¹⁷ Məgə təki tay ziwwe aka gəla nawga na Yizrel, awla ngaɓa net məzəlpaŋ na Yehu əzzoŋgu, amna: «In tat ula ngaɓa.» Yoram amna: «Agəm məpeŋ pəlsa, aslən ələmsiti, dənahgən na: Zay yi vani?»

¹⁸ Məpeŋ pələs nak ambatək ələmsəni, amna: «Məlĩ amna: zay yi van sa?» Yehu azlan səni, amna: «Məssok də zay nan di? Amili, azbawa!» Məgə təki amna: «Maslən nak agapək azet dərəŋ, ya dəmndan ɓa.»

¹⁹ Məlĩ aslən məpeŋ pələs masulani, nan pak agapək azeti, amna: «Məlĩ amna: aka zay yi sa?» Yehu azlan səni, amna: «Məssok də zay nan di? Amili azbawa!»

²⁰ Məgə təki amna: «Agapək azeti, ya dəmndan ɓa. Wədaw nan ndak na, va na Yehu wətən Nimsi yi, vi wədaw nan va na ɗəf mitemni.»

²¹ Yoram amna: «Miynan su mawta ammbet pilseŋge!» Mətok səni mawta nani. Yoram məlĩ na Israyel də Akaziya məlĩ na Yuda, agilyoŋguk naway pak aka mawta nan addoŋ ələm sənən Yehu, addəv guli na Nabot na Yizrel.

Əmta na Yoram məlĩ na Israyel

²² Səza Yoram, awla Yehu, amna: «Zay yi vaŋkəŋka Yehu?» Yaŋ azlan sən na: «Zay miy kan adan mok Izabel tat əzban əɗɗa polkoyeɗ dit garzlawɗe məza meŋge net ɓaŋ di?»

²³ Yoram, adoɗuk wawar na pələs nan, anzanəka; anah sən Akaziya dəŋzla vaŋvəl na: «Akaziya asla zuko, wəni yi!»

²⁴ Yehu agəmək bəle nani, ahõ Yoram, har ateh aka seŋken, pay dadawan pəraslə, də gabban pirfif addəv mawta nani.

²⁵ Anah sən Bidkar, mərəm baray nan na: «Agəma, azgan addəv guli na Nabot na Yizrel lahəŋka. Aɗɗumoni: pay məsam matak aka mawta nawgaya, is də in mədazban Akab afəni, Yawe apelik wən akani:

²⁶ “Gesiŋ nulek mbel na Nabot dit en net kirtin nosuŋgo, Yawe aɗiymani. Wanəfaɗguk aka guli vanəska, Yawe aɗiymani!” Kakaŋ kan na, agəma, azgan addəv guliyəs, va Yawe anahə.»

Əmta na Akaziya məlĩ na Yuda

²⁷ Adan Akaziya, məlĩ na Yuda, awla vasna, ndən tive na Bet-Gan pəŋgləŋgə. Yehu amban, amna: «Nan pak məbaya!» Aɗi sənənək vaŋvi səka mawta nani, nawpeŋ a Gur, go'o də Yible'am. Anzanək a Megiddo, amtə adaka.

²⁸ Gewleɗ nan aslanənək addəv mawta nani, akanən a Yerusalem, məndəkən addəv magamas nan dit efiŋgiɗni, a walaŋgəla-metiŋ na Davit.

²⁹ Aka wəzva makəlaw kiyən taka na Yoram, wətən Akab aka məlĩ yi, Akaziya agəm məlĩ a Yuda.

Əmta nat Izabel

³⁰ Yehu agapək a Yizrel, Izabel təprəmək wən nani. Ndət harat verver əvereni, muhur kiyət munu'munu'gəni, ndət də təkifoŋgo məppan aza gəla ɓe' ula afuŋgu.

³¹ Gala Yehu, adaggar ki maddamba na walaŋgəla-metiŋ, təmna: «zay yi, vaŋkəŋka Zimri məs dəbay daya nani?»

³² Ndən haran le'gən ula a təkifoŋgo məppa naza gəla, amna: «Naway dəŋgəl əsan də in di?» Yaŋ ɗiy mətawaŋkoyom sula awaniɓa hoku naddəv gəla na məlĩ sədak aɓe'eŋ kəlazan də təki məppan foŋgo aza gəla naka.

³³ Anah sit na: «Məzgat afuŋ!» Azgatənka. Mbel səzat Izabel, aɗɗaŋgək zẽhe aza gəla gəm aket pilseŋge; Yehu adaw dəkat də mawta nani.

³⁴ Ndən toŋ ana məlĩ da, azəmə, asə, siske anahə: «Məgəmət məraygət kəskə, məndəkta, vi wətən məlĩ tə.»

³⁵ Ambataŋ kawndəkət na, dərahaŋ zəga, adəbər ki, bəbər kiyta, tələt nawɗi afuŋ gəm dagragay vat ɓa.

³⁶ Ndəɗaŋ buryok, ənahsən Yehu, anah na: «Vaski Yawe anah lahəŋ də ma məskəleŋ Eliya na Tisbe na: Addəv guli na Yizrel kirɗe adampərtən Izabel,

³⁷ kigəbayət Izabel wakkpaŋ ba'ar addəv guli na Yizrel, kawɓapi ənəh na: akəŋ Izabel tə ɓa.»