2Milyeŋge 6 - Bible en GuidarZlimbe dəzə məmnda ərəhni 1 Məskəleŋɗe, anahaŋ sənən Elisa na: «Kamə awle, təki məsam abokuŋ ngesse yi day azamə. 2 Kamə, appam məmbat hã a Yurden, məgəmgən naway pak bəlaŋ taka taka məgəɗgən təki nassa addəvni.» Yaŋ amna: «Məddoŋgu.» 3 Taka səret amna: «Kamə dok dit gewleɗ noko.» Amna: «In tat əzzawa.» 4 Yaŋ al dənɗaŋgə. Ndəɗaŋ gap a Yurden, abəlaŋ wəleŋɗe. 5 Yaŋ taka net adawkel wəlaŋga nani, zlimbe nan pendeleŋ aret iŋkile. Aɓuhuk man: «Aw! Daya nawa, dəŋgle nəŋgluwa!» 6 Ɗəf na Maŋgəlva amna: «Aŋgay abət di?» Arban sən gəlani. Elisa abəl wəlaŋkə, azgat adaka; tisilgin zlimbe nak koŋgoŋ aket iŋkile. 7 Amna: «Agəm kana!» Ɗəf nak van təl gəm əgəmni. Elisa tay ərme məzəlpaŋ na Siri 8 Məlĩ na Aram tay əgay də Israyel. Pay adawtawan wən nan dit ɗiy nan na, amna: «Dibirgidik naw a təki vana adawsani», 9 ɗəf na Maŋgəlva slən aza məlĩ na Israyel də wənah na: «Asla zuk kədaddok kəla təki nan ɓa, vi mə Aramɗe aprikeŋgik adaka»; 10 məlĩ na Israyel aslənək ɗiy də təki an ɗəf na Maŋgəlva aŋgəɗ sən naka. Assak sənək dəslagən zən sədaka: təl taka ɓa, təl sula ɓa. 11 Makra məlĩ na Aram assanək aka wənəska. Ayek məɗɗaŋ wəza nani, aɓsit na: «kərban suwən na ɗəf neret ɗiy nam məzəbbah sən məlĩ na Israyeləŋ ɓa sa?» 12 Taka səret məɗɗaŋ wəza nan azlan na: «Owwo daya naw məlyã, Elisa məskəleŋ na Israyel yi, nan waɓap ənah sən əpel nok kədawpel a giziŋ anokda sən məlĩ na Israyel.» 13 Yaŋ amna: «Məddoŋgu! Mula tay aŋga di, nəsləngən ərmani!» Yas mənah sən na: «Tay a Dotan.» 14 Yaŋ aslən pilseŋge adak dit mawteɗ gəm məzəlpaŋ diyɗa agapaŋ də dəfɗa, asərŋgəslnən walaŋgəla-metiŋ vani. 15 Gawla na məskəleŋ na Maŋgəlva, agilik pumu: awle məzəlpaŋ ki walaŋgəla-metiŋ tərwəsl dit pilseŋge gəm mawteɗi. Anah sən Elisa na: «Aw, daya nawa! Mbar mədaɗɗa di?» 16 Yaŋ amna: «Kəgeslne' ɓa! En dəssoŋ də mənam adayaŋgək kiyit en dənɗaŋ də əŋɗa.» 17 Elisa akkamə amna: «Yawe akol sən hara gawlaŋ dəwəlgəni!» Yawe hara gawla nak kolu, dəwəl na, ki mossorgo metiŋ pak yaŋ məknəhən dit pilseŋge gəm mawteɗ noffo tərwəsl ki Elisa. 18 Mə Aramɗe aprikeŋgik aza Elisa, yaŋ akkaman Yawe, amna: «Atip heret ɗiyiŋki!» Yawe atip heret va Elisa anahə. 19 Elisa aɓsit na: «Tive aŋki yi ɓa, walaŋgəla-metiŋgin van aŋki ɓa. Məzbawa, nəkukum aka ɗəf kədawkayanən vani.» Ake a Samari. 20 Səza atoŋgoŋ a Samari, Elisa amna: «Yawe akol sit heret ɗiyiŋ kana dulaŋgəni!» Yawe heret kolu, awlanən na, addəv Samari əŋgə. 21 Adan məlĩ na Israyel adawlet na, aɓsən Elisa na: «Nəbey sa əbba?» 22 Yaŋ amna: «Kəbey ɓa! Kəssərəkək əbey en kədarma ka məfərsəneɗ də masalam nok gəm də bəle nok sa? Apsit way dit iŋkile; dəzəmaŋgə, dəsaŋ dəmbataŋgən aza daya neti.» 23 Məlĩ adə sitik waynabaya; azəmaŋka, asaŋka; yaŋ appet addoŋ aza daya neti. Məzəlpaŋ na Aram dəzbanən əzzoŋ aka dələv na Israyel əmpa ɓa. May aka dələv na Samari 24 Dərɓaga asna, Ben-Hadad məlĩ na Aram, akkeletik məzəlpaŋ nan pakə, al əsərŋgəsl Samari. 25 May agəɗək a Samari diyɗa. Walaŋgəla-metiŋ məsərŋgəslni, hã gap əlbəh na ki koro dayday, koɓeɗ na təbəz babar kaklaw dodopoɗo, pəlwit biŋgeɗ na maha, wəɗak na kilo taka tay əlbəh deleɗ na təbəz babar sle'i. 26 Pay mbərən, məlĩ na Israyel, tay ədaw aka zlava, guluk təŋgəsl sən vaŋvəla: «Aw, daya naw məlyã, abbah suwa!» 27 Amna: «Owwo! Yawe dəbbah suko ɓa na, də mi nədabbah suk di? Də zəga na kelle may də zəga nawsa sa?» 28 Yaŋ məlĩ anah sət na: «Miy kəŋgəl di?» Təmna: «Guluk kəŋ tənah su na: “Aki wutuk, məmpərgən dəpaŋka, wətu tam mazayni.” 29 Mədak wətu məzəməka, yaŋ nəɓsət mazayən nan na: “Aki wutuk məzəmgən tamə”, yaŋ təɗaman wətəta.» 30 Adan məlĩ aprəm əpel nat guluk naka, aŋgaretik lukutɗe nazani, adan dəka zlava adawdawa, ɗiy awlanən na, məlĩ tay də lukut na sak azani. 31 Amna: «Maŋgəlva dəgəɗ su an naɗɗa pak an dəpaŋ ki Elisa, wətən Safat, asanək akani!» Elisa tay əpel wən nagrak na mayã 32 Elisa tay ɗewwe ananda, ɗiy məsɓet tahəŋ ndəndən ɗewɗewi, aka məlĩ aslən ɗəf səbani. Tak maslən dəɓəl əgap ananda ɓa ləŋgə, Elisa nak anah sit ɗiy məsɓet nek na: «Kulanənək va məbay gəbayəs, aslən ɗəf karsla kiywa. Wəgap na maslənəŋka, məmpan maddamba! Məslaŋgən də maddamba. Ya as ɓaɓəlma daya nani ambanəs ɓa sa?» 33 Tay əpel dənɗaŋ tagay, maslən nak agap azani, yaŋ amna: «Ya ərayəŋ səza Yawe ade! Miy nədawga səva Yawe əmpa di?» |
All right reserved
Bible Society of Cameroon