2Milyeŋge 5 - Bible en Guidar

Ənzaɗ na kokolo na Na'aman

¹ Na'aman daya net məzəlpaŋ na məlĩ na Aram, daya nan aŋgluwək diyɗa, ɗəf gagdaki yi, vi dəndəni Yawe apsən əska wəla sən Aram. Ɗəf nan gambara nalpay hara ya məs məskokoloy yi.

² Mə Aramɗe agilyoŋguk dula, akiyaŋgək waŋ muzliyak sə Israyel ka məfərsənakə, təsatək məgəɗ wəza abat ga Na'aman.

³ Tənah sət ga Na'aman nak na: «Eh! Va nawka daya naw aba məskəleŋ na Samari tay kəta na! Wabbur sən kokolo səzani.»

⁴ Na'aman pay aboton sən daya nan dawnəh na: «Yaŋ an waŋ məkiyət səka dələv na Israyel kəŋ tənahə.»

⁵ Məlĩ na Aram amna: «Asil doko! Nəsləngən ɗerewel sən məlĩ na Israyel.» Ndən teki, agəm təbəz babar gap kilo səkat hoku, təbəz na meleŋge kilo kaklaw sləre, lukutɗe na sləma kəlaw avani.

⁶ Aki sənək ɗerewel sən məlĩ na Israyel, amna: «Pay ɗerewel nəver sukəŋ agapko, asən na, gawla naw Na'aman nəslənsuk kubbur səngən kokolo nani.»

⁷ Adan məlĩ na Israyel aŋɗan ɗerewel naka, ndən lukutɗe nan ngarngargit səzani, amna: «Maŋgəlva nan, nawbay ɗəfa, may nawmbəlgən ɗəfa, ka ɗəfəŋ dəslən sugən ɗəf nabbur kokolo səzan sa? Haya kamə mula va adarma mama azawa!»

⁸ Adan Elisa ɗəf na Maŋgəlva aprəm na, məlĩ na Israyel eŋgeretik lukutɗe səzani, aslən aza məlyã, amna: «Vimi kəŋgeret lukutɗe nok di? Dəde azawa, dəsəngən na, məskəleŋ tay a Israyel!»

⁹ Na'aman adek dit pilseŋge nan gəm mawta nani, pay ziw a meŋgle na Elisa.

¹⁰ Elisa aslən metive azan ənah sən na: «Doko! Aslslay gap təl buhul a məlpa na Yurden: gəɓa zuk watiliɓi, wakubburu.»

¹¹ Gədəv Na'aman adək diyɗa, ndən teki, amna: «Azaw na: “Wagil sənanda, pay ziw əkkaman Yawe Maŋgəlva nani, wappayan təki nan də vani, kanzaɗ məskokolo tiliɓi.”

¹² Abana, də Parpar məlpeŋge gugirɗe na Damas, dədayaŋ kiyit iŋkile na Israyel pak ɓa sa? Nəɓap na əslslay addəvit nəbburgən tiliɓ ɓa sa?» Ndən buryok tek net herɗe.

¹³ Gewləɗ nan azzoŋ anahaŋ sənən na: «Əbba! Va məskəleŋ anah sukuk zəga naɗɗa tatwãh na, kəɗɗa na kəta ɓa sa? Ya ənah anah suk aslslay kaka' kənzaɗgəni.»

¹⁴ Yaŋ asərehi, atəp a Yurden təl buhul va ɗəf na Maŋgəlva nak anah səni. Gəɓa zən akkpaŋ va na wiyən musɗuko, abburko.

¹⁵ Ndən buryok aza ɗəf na Maŋgəlva nak dit ɗiy nan pakə. Ndən toŋ ziw abani, amna: «Kakaŋ nəsənək na, dələv gboŋ maŋgəlva tay abbər ki a Israyel ɓa. Ya kamə ataf əvəl na gawla nok yaŋka.»

¹⁶ Amna: «Va Yawe məs nədawziw aban asan madarani, tay va nədawtafən ɓa!» Na'aman tələn tək dətafgəni, yaŋ aɓoŋgu.

¹⁷ Na'aman amna: «Ya an vaski na, kamə dəpsənən dələv naŋ gap koropilseŋge sula, vi gawla nok adawda əvəl nawzla kurmbuɗuku gəm əzaɓ-Maŋgəlva nawrəh zazay sit meŋgilveɗ meɓɓet əmpa an sən Yawe yi ɓa ɓa.

¹⁸ Vi wənaŋkəŋ na, kəta Yawe dəvvuyon sən balam noko: an daya naw awtoŋ addəv gəla na Rimmon, kagduko: aka vaw adawges dagduko, də in məstaka mədogduko, wəɗɗa nədaɗɗa vaskəs na, kamə Yawe dəvvuyon sən zəgas sən balam noko.»

¹⁹ Yaŋ anah sən na: «Dok zayə!» Adan ambat səza Elisa ɓuhho,

Heslep na Gehazi

²⁰ Gehazi, gawla na Elisa ɗəf na Maŋgəlva, amna: «Yaŋ daya naw appan Na'aman mə Araməŋ aɓoŋ dawtaf an akiyə. Va Yawe asan madarani, sessel wanənzaw ammbani, nətafgən zəga səvani!»

²¹ Gehazi azbanək Na'aman. Adan Na'aman awla ənzan ammbani, ndən pirik səka mawta net pilseŋge nan kawmbat ələmsəni, amna: «Zay yi lahə?»

²² Amna: «Zay yi! Daya naw dəslənu dawnəh na: “Kakaŋ kakaŋ məskəleŋɗe sula naka mossorgo metiŋ na Efrayim azzoŋgu; kamə, avay sit təbəz babar kilo kaklaw hoku, gəm lukutɗe na sləma sula.”»

²³ Na'aman amna: «Ataf kilo kaklaw sləre», ampak tələn dətafgəni, asok təbəz babar kilo kaklaw sləre nak addəvit gabalɗe sula; dit lukutɗe na sləma sula; ta' sən gewleɗ nan sula akasənən abani.

²⁴ Adan agap a Ofel, Gehazi atefik gabalɗe nek səveti, azi ananda, ataw sit tive, yaŋ addoŋgu.

²⁵ Ndən kan pay ziw ana daya nanda. Yaŋ Elisa aɓsən na: «Səŋga kəde di Gehazi?» Yaŋ amna: «Gawla nok təki tay ambat ɓa.»

²⁶ Yaŋ aɓsən na: «Zeŋgilew tay adak pay ɗəf van aprik səka mawta nan də kakara, ade wələm sukuŋ ɓa sa? Pay nawtaf təbəz babara, lukutɗe, heremeɗi, megezlembirkeɗi, timeŋgiɗ dit wasliɗe, gəm belemɗe mezeŋgleket dit muguluŋgiti sa?

²⁷ Kokolo na Na'aman wagor azok də mazlalwõk hã faɗə.» Yaŋ agil səzan də kokolo bar va ɓeɓrezlerizze.