2Milyeŋge 4 - Bible en GuidarElisa tay əbbah sət gagəbaya 1 Taka səret gil net məskəleŋɗe təde wəhəm sən Elisa, təmna: «Zəlu gawla nok amtəka, kəsənək gawla nok məgeslne' sən Yawe yi. Yaŋ məzəzban dəmən adek kawnde kirtu sula ka dəssoŋgən belemɗe nani.» 2 Elisa aɓsət na: «Miy kəŋgəl nəgəɗgən viyuk di anah suwa, miy nok eŋgil di?» Təɓsən na: «Zəga tay anat balamək nok da kpak ɓa, an bəbər na mẽli ɓa ɓa.» 3 Amna: «Agil aŋgəl bəbərɗe də met avet meggeŋgiɗuko, məza siɗikke ɓa, 4 vasna, əmnda nok eŋgil na, kəmpangən maddamba akok dit kirtuko, kəzigən mẽl van addəvit bəbərɗe veti; an dəknah pak aɗi a maŋgava.» 5 Ndət tek səzani, maddamba kpuɓ akat dit kirtita. Ndəɗaŋ əpsətən bəbərɗe, ndət əknihti. 6 Səza bəbərɗe aknahaŋgə, təɓsən wətət na: «Avay bəbər maɓɓan əmpa!» Aɓsət na: «Tay əmpa ɓa.» Yaŋ mẽl nak arslə. 7 Ndət pay botbotgən sən ɗəf na Maŋgəlva naka, aɓsət na: «Doko, avəl mẽl vani, afaɗ dəmən noko, də an dəmbər na kəzəmgənəgən kiyuk is dit kirtuko.» Elisa dət mə Sunemkə 8 Pay mbərən Elisa toŋ a Sunem. Guluk məs aryak tat adak təzəmsãhã ammban dəzəmgən waya. Təŋ səza dəpaska, Elisa an tay ətoŋ kəla dak pak ndən əmzlah adak əzəm waya. 9 Yaŋ təɓsən zələt na: «Gesiŋ, nəsənək na, ɗəf məzəzzan əzəm anamda ɗayɗayəŋ ɗəf salala na Maŋgəlva yi. 10 Kamə, arkə səm sən gələk aka təgbalka; məɗi səngən zəga nawvoŋ adaka, tabəl, mazaŋga gəm lalam; pay adazzan anamda na, dəsangən adaka.» 11 Pay maɓɓan, yaŋ ade adaka; abit addəv gəla naka təgbalka naka, avoŋ adaka. 12 Yaŋ aɓsən gawla nan Gehazi na: «Ayət suwət mə Suneməkəŋ ɗa!» Ndən dah iyəta, təde pay ziw aba gawla naka. 13 Yaŋ anah səni: Anah səta kamə: «Awle va kətəwəl vimə, zev ətəwəl kətəwel gbaŋkəŋka. Miy naɗɗa viyuk kandi? Hara wən nok tay nawpel sən məlĩ awaniɓa sən daya net məzəlpaŋ sa?» Yaŋ təmna: «Aweleŋgit ɗiy naw nəsawa.» 14 Yaŋ amna: «Miy naɗɗa viyət kandi?» Gehazi amna: «Dərəŋ na! Tat də muzliya ɓa, ya zələt agalka.» 15 Amna: «Ayət ɗa!» Ndən dah iyəta, ndət pay ziw a maddamba. 16 Amna: «Dukki vaŋ na, wakərəm wiyən avoko.» Yaŋ təmna: «Owwo! Daya naw ɗəf na Maŋgəlva, kedawmas akat balamək nok ɓa!» 17 Guluk nak ta' daway, tuwə wiyən dukki nan də pay va Elisa anah sət naka. Elisa tay əmbəlgən wətət mə Sunemkə 18 Muzliya aɓayka. Pay mbərən ambat aza afən ammbet məzubəlaŋgə. 19 Yaŋ aɓsən afən na: «Kiywa! Kiywa!» Afən anah sən gawla nan na: «Aka sət mani!» 20 Yaŋ aslan aka sət mani. Wiyən asanək gap tataŋ pay aka tələt mani, sissiŋ ndən zamə. 21 Yaŋ təpeŋ, təl əvoŋgən aka zəga nafna na ɗəf na Maŋgəlva naka, ndət maddamba kpuɓ mbatə. 22 Təya zəlta, təmna: «Kamə aslən su gawla taka gəm koro mugolun taka! Nənzawgən aza ɗəf na Maŋgəlva, nəmilgəni.» 23 Amna: «Vimi kədaŋgla əddok dəpaŋ ana ɗəf na Maŋgəlva da təla ama gərmi ɓa, pay naffeti yi ɓaŋ di?» Təzlan səni, təmna: «Də moggoni yi!» 24 Tiynan mazaŋga na koro, tənah sən gawla nata: «Akuwa, adaw gu'u kədawziwgu aka tive məza nənah suk ɓa ɓa!» 25 Təmbatək aza ɗəf na Maŋgəlva aka gərəm na Karmel. Səza ɗəf na Maŋgəlva awlət səka faraɗa ləŋgə, anah sən gawla nan Gehazi na: «Mə Sunemək nak yakədəkə! 26 Anzok aləm səta, anah sət na: “Zay kənan ɓa sa? Zəluk zay yi ɓa sa? Muzliya pak zay yi sa?”» Yaŋ təmna: «Zay yi!» 27 Adan təgap aza ɗəf na Maŋgəlva aka gərəm naka, ndət tələn kãw ərmani. Gehazi pay kawslaŋgəta, yaŋ ɗəf na Maŋgəlva aɓsən na: «Appata, vi addəv tatwãhtə, Yawe aɗaman suwəka; dəprəman su ɓa.» 28 Təmna: «Nəssõhuk muzliya ava daya naw sa? Nənah suk dəpas na: “Kədawmakaw ɓa ɓa sa?”» 29 Anah sən Gehazi na: «Aynan dadakko, agəm zleŋ naw avoko, doko! An kələm sənək ɗəfa, kədasɗan ɓa; an ɗəf asɗokuko, kədawzlan sən ɓa. Kəɗigən zleŋ nawəŋ aka hara muzliya vani.» 30 Yaŋ ma wiyən nak tənahə: «Va Yawe asan madarani gəm va zeŋgilok asan madarani, nəppok na kpak ɓa!» Ndən le' tek ammbata. 31 Gehazi alək daabəŋ kiyti; aklakək zleŋ aka hara wiyən naka, əmpəs tay aprəm ɓa, zəga tay dərbə na madarani ɓa. Ya ndən pay kawləm səni, aprəman səni, amna: «Wiyən dəfɗah ɓa.» 32 Elisa gap eŋgili, wiyən yaŋ ɗuffo məmtən aka zəga nawvoŋ nani. 33 Ndən toŋ maddamba kpuɓu, akkaman Yawe. 34 Sissiŋ avoŋ aka wiyna, aɗiman aka ma wiyna, haran aka harani, van dahã dahã aka an na wiyna; ndən akan mbiriɓɓe: təki kakãh arma zə wiyən naka. 35 Aprik atiwil addəv gəla, amndan avoŋ aka wiyən nak əmpa. Yaŋ wiyən nak aɗi heresseme təl buhulu, ndən haran kolu. 36 Elisa aya Gehazi, amna: «Ayət mə Sunemək nakə!» Ayətəka; tələk aza Elisa, anah sət na: «Aslan wutuko!» 37 Ndət pay ngom abani, mirbizit afuŋ nisi. Ndət wətət himbit viti. Teɓ məza nawzəməŋ ɓa 38 Elisa, amndan a Gilgal. May agəɗək aka dəlva. Adan məskəleŋɗe tahəŋ gurom gurom abani, anah sən məgəɗ wəza nan na: «Akrək mozgoy metiŋgini, kədə sitgən teɓ sit məskəleŋɗe.» 39 Taka səret ambatək awra əkay teɓi. Arah tassaka na bekne, ahor addəv lukut nan raɗraɗə. Ade eŋgil apraslet pərasl pərasl a mesteɓe, gbo' əgbo'it, məsənni yi lahəŋ na zəga vana yi ɓa. 40 Ndəɗaŋ lot sit ɗiy nek kaslɓeti. Adan adeslɓetin teɓ neki, aŋzlaŋ vaŋvəla, aɓɗaŋ na: «Əmta tay a mesteɓe, ɗəf na Maŋgəlva!» Dəɓap əslɓenin ɓa. 41 Yaŋ amna: «Məki gəpa!» Andol a mesteɓe adaka, amna: «Akret sit ɗiy dəslɓenini!» Zəga mbərayən tay a mesteɓe əmpa ɓa. Elisa tay əzəmgit ɗiy səkatə 42 Ɗəf maɓɓan pay sə Ba'al-Salisa, aki peŋ net dadabyeɗ kaklaw sula sən ɗəf na Maŋgəlva: peŋ na haykəmari dadabya, də an haykəmari babar meleketet addəv gabal nani. Elisa amna: «Apsit ɗiy dəzəməni!» 43 Məgəɗ wəza nan azlani: «Mbarmbari nədawɗakan sit ɗiy səkatiŋ di?» Anah sən na: «Awɗeken sit ɗiy dəzəməngəni! An Yawe anah yaŋka: “Wazəmaŋ kpe' kpe', hã mbəkə.”» 44 Yaŋ aɗi abeti, ndəɗaŋ namnamə; appaŋgək va əpel na Yawe anahə. |
All right reserved
Bible Society of Cameroon