2Milyeŋge 3 - Bible en Guidar

Yoram, məlĩ na Israyel

¹ Yoram, wətən Akab, asanək məlĩ aka Israyel a Samari, aka əzva na Yosafat makəlaw kiyən dodopoɗon aka məlĩ na Yuda, azəm məlĩ wəzva kəlaw kiyən sula.

² Agəɗək mbərayən a mahara Yawe, va na afən dət mani yi ɓa hara, vi aptuwək serek na Ba'al, məs afən agəɗə.

³ Ya azbanək əɗɗa mambray na Yerobo'am wətən Nebat, məs atoŋgit ɗiy na Israyel əɗɗa mambray dəndənəŋka; dəppan gabban ɓa.

Wəgilye net məzəlpaŋ nawgay də Mo'ab

⁴ Mesa, məlĩ na Mo'ab, məzgəl zəgeɗi yi; ama wəzva pak, tay əfaɗ nzalaka dit kirit timeŋgiɗ gabal səkatə, ndergeyẽɗ məs zeŋze gabal səkat sən məlĩ na Israyel.

⁵ Adan Akab amtə na, məlĩ na Mo'ab ɓoŋ aka məlĩ na Israyel.

⁶ Məlĩ Yoram vit dəpas sə Samari, əmbat ula Israyel dəwən nan baymani.

⁷ Ndən tek slən aza Yosafat məlĩ na Yuda də wənah na: «Məlĩ na Mo'ab aɓoŋguk akawa. Wakəŋgəm əzzok əbbah su əgay də Mo'ab sa?» Yaŋ amna: «Wanəde; ina istə, ɗiy nawa nokəŋgə, pilseŋge nawa nokəŋgə.»

⁸ Yaŋ amna: «Tive mawani mədawgəm di?» Amna: «Tive na kapta-muyã na Edom.»

⁹ Məlĩ na Israyel, na Yuda gəm na Edom, agəmənək tive. Adawaŋgək gap əvoŋ buhulu, iŋkile nawsa net məzəlpaŋ dit en net zəgeɗ memeyẽɗ nammbet akkpapaŋka.

¹⁰ Məlĩ na Israyel amna: «Aw! Kuzuŋ Yawe yi dəkkin milyeŋge hokuŋ kapsit avet ɗiy na Mo'ab.»

¹¹ Yosafat amna: «Məskəleŋ na Yawe tay aŋ məssõhõngən Yawe ɓa sa?» Taka səret məɗɗaŋ wəza na məlĩ na Israyel amna: «Elisa, wətən Safat tay aŋka, gawla na Eliya na makrani.»

¹² Yosafat amna: «Əpel na Yawe tay dəndəni.» Yosafat məlĩ na Israyel, də an na Edom tek azani.

¹³ Elisa aɓsən məlĩ na Israyel na: «Miy aka walaŋgu də is di? Dok azet məskəleŋɗe na afuk dit en nat moko.» Məlĩ na Israyel aɓsən na: «Owwo! Vi wasan Yawe dəkkin milyeŋge hokiŋ kappet ava Mo'ab.»

¹⁴ Elisa aɓsən na: «Va Yawe Məzuɓappak na disiŋ məs nədawziw aban asan madarani, va vi wil na Yosafat məlĩ na Yuda ɓa, kəta nəsilgən na haraw kawluk təmsa ɓa, nəzgə na sləma akok nawluk təmsa ɓa!

¹⁵ Ya məki su məbay gazaŋvəl aŋ kakaŋka!» Adan məbay gazaŋvəl atəŋ əbay gazaŋvəl nani, va Yawe asanək aka Elisa.

¹⁶ Amna: «An Yawe anah yaŋka: Dəso'oŋ vovɗe diyɗa a lolohõk kəŋkə!

¹⁷ Vi vaŋ Yawe anahə: Kulaŋ na səmyã ɓa, kulaŋ na buwən ɓa, lolohõk kəŋ watəknah dit iŋkile, wakəsaŋ mənokum, gibekɗe nokum, gəm zlogomeɗ dit korɗe nokumu.

¹⁸ As pak gəsi a mahara Yawe: wapsukum Mo'ab kãw avokum.

¹⁹ Kəzetingin walaŋgəleɗe gugriɗ na korgu, walaŋgəleɗe na sləma pakə, kəbilningin wəleŋɗe məzuwaŋ pakə; kəsukningin heret iŋkile pakə; kəreygitingin gulyeŋge mogget dawndol gərmeŋge addəvti.»

²⁰ Dəmpummo, aka pay naɗɗa əvəla, iŋkile yeŋ əzzoŋ dəka tive na Edom, dələv mbef dit iŋkile.

²¹ Ɗiy na Mo'ab pak aprəmənək na, milyeŋge tahəŋ əzzoŋ wəgay dənɗaŋgə: məyay məlaw gulom pak dit en dədayaŋ kiyti, yas aziweŋ aket meŋge.

²² Ndəɗaŋ le' pum də pummo, pay tay iwiɗ aket iŋkile səkay, ɗiy na Mo'ab awlenin iŋkile pərreŋ va mbel abeti.

²³ Aɓɗaŋ na: «Mbeləŋgə! Wasan milyeŋge nek abayanənək zit dit masalamɗe; yaŋ abəlanən ziti. Kakaŋ na, popoho kana mə Mo'abɗe!»

²⁴ Ndəɗaŋ pay go'o də dibirgidik net mə Israyelɗe. Mə Israyelɗe asilyoŋ abeyini, ndəni mə Mo'abɗe anzoŋ səbeti; azbetinke, azanənək walaŋgəla na Mo'ab.

²⁵ Aɓzliwnin walaŋgəleɗe gugriɗe, naway pak azgək gərəm a guli moggoni, aknəhnəni, asukinik heret iŋkile pakə, abilnin wəleŋɗe nawzəm pakə. Abbər gərmeŋge na Kir-Hereset dəppaŋgə, ɗiy en də mabəŋbiŋgeɗ avet azzoŋ əsərŋgəsləŋ abeynini.

²⁶ Adan məlĩ na Mo'ab awla əgay adayək kini, andə ɗiy səkat buhul məlawaŋ masalam, karɗiya dəka məlĩ na Edom kəta, ya dəɓapnən ɓa.

²⁷ Ndən gəm wətən an daya nani, məs nawzəm məlĩ a gəlani, adə əvəl nawzla kurmbuɗuk aka zlava dəndəni. Mə Israyelɗe adaŋgək gədəv diyɗa, ndəɗaŋ mbat səzan aka dəlva anetda.