2Milyeŋge 25 - Bible en Guidar

Wəskot na Yerusalem ( 25:1-30 )

¹ Addəv əzva mavaytakan na əzəm məlĩ nan də əvoŋ kəlaw na təla makəlawani, Nabukodonozor məlĩ na Babilon zəknan pay dit məzəlpaŋ aka Yerusalem, aziw abani; akkpotoŋ dələv kiyən tərwəslə.

² Məsərŋgəslni walaŋgəla-metiŋ hã gap wəzva makəlaw kiyən taka na Sedekiya aka məlyã.

³ Də əvoŋ vaytak na təla mapoɗoni, may na ngaryã adek a walaŋgəla-metiŋ; way nawzəm net ɗiy tay aka dələv nan ɓa.

⁴ Mətilikni zlava na walaŋgəla-metiŋ. Adan dəfəɗ atiri, məzəlpaŋ na Yuda asmaɗaŋgək kəla memeŋgle məs haran ta' aka guli na məlyã, də mə Kaldiyeɗ asərngəslnən walaŋgəla-metiŋ pak agəmənək tive na Araba.

⁵ Yaŋ məzəlpaŋ net mə Kaldiyeɗ azbanən məlyã, arufnən a təki məpəlayya na Yeriko; məzəlpaŋ nan pak kuya' səzani.

⁶ Armanənək məlyã, akanən aza məlĩ na Babilon a Ribla. Atawnən wən akani.

⁷ Mətaw wəlet kirtin Sedekiya ama harani. Nabukodonozor aɓəhək hara Sedekiya kpaŋgən daŋgarə, miynan dit ngiyamɗe na təbəz pepreŋ sula yas akanən a Babilon.

Əmõh na Yerusalem; əsimgit ɗiy aka balam təl masula'ən

⁸ Aka təla masle'eni, də lumu taka na təla, də əzva makəlaw kiyən vaytak na Nabukodonozor aka məlĩ na Babilon, Nebuzaradan, daya net məzugaŋ məlĩ na Babilon, gawla na məlĩ na Babilon ade a Yerusalem.

⁹ Azlak Gəla na Yawe, gəla na məlyã, gəleɗe na Yerusalem pakə, azlek gəleɗe net ɗiy gugriɗ pak də offo.

¹⁰ Məzəlpaŋ net mə Kaldiyeɗ məs dəzbanən daya net məzugaŋ məlyã, aɓzlunənək zlava dətərwəsl Yerusalem pakə.

¹¹ Nebuzaradan, daya net məzugaŋ məlĩ akek ɗiy na walaŋgəla-metiŋ dəppaŋ pakə, məs dəppanən ki zit sən məlĩ na Babilon dit en dəssoŋ a walaŋgəla-metiŋ pakə.

¹² Daya net məzugaŋ appetik ɗiy en məssehẽŋɗe, vi dinseŋningən gədəvit megezlembirkeɗ dit gulyeŋge.

¹³ Mə Kaldiyeɗ akrapinik dədəkeɗ na təbəz pepreŋ na Gəla na Yawe, ŋgefleŋɗe də gebbet na təbəz pepreŋ naddəv Gəla na Yawe, akanən təbəz pepreŋ van a Babilon.

¹⁴ Kasliɗe, ziginɗe, slõhoŋɗe, hiŋgiɗ na way dit zəgeɗ na təbəz pepreŋ naɗɗa wəza na Yawe pak andeninke.

¹⁵ Daya net məzugaŋ nak andek zəgeɗ na meleŋge may na təbəz babara: masərgeɗ dit hiŋgiɗ naksu' zəga dənɗaŋ.

¹⁶ Dədəkeɗ sula, ŋgefleŋ gidili'e, də gebbet nawɗiyit Salomoŋ agəɗ na Gəla na Yawe əŋ zəgeɗ na təbəz pepreŋgis pak, məɓapi əsla gagdak net ɓa.

¹⁷ Əɓay na dədəka an maddaabəŋ na tay metir vaytakə; daŋgbarga na təbəz pepreŋ tay akani, əɓay na dangbarga taka pak tay metir taka taka də mani, gazway dit weweɗe aman pak na təbəz pepreŋ tahəŋ ki dangbarga van tərwəslə. Dədəka masulani, tay dit gazweyɗe nan məstaka va an dadaabəŋ.

¹⁸ Daya net məzugaŋ na məlĩ nak armak Seraya məsdələv metiŋ na Gəla na Maŋgəlva, Sefaniya masulani, gəm məgaŋ maddamba hoku.

¹⁹ Armak daya net məzəlpaŋ taka gəm maslayɗe na məlĩ sle' en na walaŋgəla-metiŋ, məzuvere, daya net məzəlpaŋ məndə ɗiy aka wəza naka dələv vani gəm ɗiy kaklaw sləre; ɗiyis pak sə walaŋgəla-metiŋ əŋgə.

²⁰ Nebuzaradan daya net məzugaŋ ake a Ribla aza məlĩ na Babilon.

²¹ Məlĩ na Babilon arbə siti, abey a Ribla aka dələv na Hamat. Vaski kan məke ɗiy na Yuda səka dələv net faraɗa.

Gedaliya, guverner naka dələv na Yuda

²² Ɗiy en məppet aka dələv na Yuda en məs Nabukodonozor məlĩ na Babilon apələ. Aɗi Gedaliya wətən Ahikam dəhən Safan ka guverner aketi.

²³ Adan deyeɗe net məzəlpaŋ dit ɗiy net aprəmən na, məlĩ na Babilon aɗiyək Gedalya va guverner, yaŋ azzoŋ aza Gedaliya a Mispa. Yismayel, wətən Netaniya, Yohanan, wətən Kareya, Seraya, wətən Tanhume an na Netofa, gəm Ya'azaniya wətən mə Ma'aka.

²⁴ Gedaliya, asway sitik ɗiy neki, yaŋ aɓsit na: «Kəgeslne'eŋ sitin gewleɗ net mə Kaldiyeɗiŋ ɓa, məssoŋ aka dəlva, məgəɗ wəza sən məlĩ na Babilon, wasan moggon azokum.»

²⁵ Ya aka təla mabuhulon na, Yismayel wətən Netaniya, dəhən Elisama, nan mazlãywã məlĩ yi, adek a Mispa dit ɗiy kəlaw; abaynənək Gedaliya zamə, gəm mə Yudeɗ dit mə Kaldiyeɗ na Mispa ananda adak pakə.

²⁶ Yaŋ ɗiy dəwənnet memeɗeŋge dit ɗiy gugriɗe gəm ɗiy gugriɗ net məzəlpaŋ pak ambataŋ a Eziptə, vi geslne armek sit mə Kaldiyeɗi.

Məlĩ na Babilon tay ula sasãh Yoyakin

²⁷ Aka əzva makaklaw hoku kiyən buhul səza məka Yoyakin məlĩ na Yuda aka balam, aka təla makəlaw kiyən sula də əvoŋ kaklaw sula kiyən buhul na təla, Evil-Merodak məlĩ a Babilon, aka əzva an agəm məlyã, awlak sasãh Yoyakin məlĩ na Yuda, agilgin sə fərsəna.

²⁸ Agəɗ sənək moggoni, aɓaygənək mazaŋga na məlĩ nan daykiyit milyeŋge meɓɓet nazan a Babilon.

²⁹ Addəɗet sinik lukutɗe na fərsəna, azəmək way ɗayɗay aban pay nanziya nan egge pakə.

³⁰ Əzəm nan an ɗayɗayə, məlĩ dədapsən səvan pay pak pay nanziya egge nan pakə.