2Milyeŋge 24 - Bible en Guidar

¹ Gala pay nani, Nabukodonozor, məlĩ na Babilon, asilik əgaya; Yoyakim asanək ammba van gap wəzva hoku, ndən həmndak ɓoŋ akani.

² Yawe aslin ngaɓeɗ net mə Kaldiyeɗi, net mə Aramɗe, net mə Mo'abɗe, net mə Ammonɗe, ake aka Yuda vi kawzan va əpel na Yawe anah də met məɗɗaŋ wəza nan məskəleŋɗe.

³ Dəka wəpel na Yawe kaka'i as pak agəɗ aka Yuda, vi kawzargən faraɗa sə maharani vi mambray na Manase an agəɗ pakəŋka,

⁴ gəm viyit mbel net ɗiy en də mezlibezlibe na met aziyə məs aknəh Yerusalem dənɗaŋ məs Yawe dəŋgəm əvvuyon ɓa.

⁵ Medembirgit wəzeɗe na Yoyakim, də an agəɗ pak məvertiŋ addəv ɗerewel na Wəza net milyeŋge na Yuda.

⁶ Yoyakim zamə. Yoyakin, wətən dəkkpaŋ məlĩ a gəlani.

⁷ Məlĩ na Eziptə dəda ɗah kiyən əgilyen səka dələv nan əmpa ɓa, vi məlĩ na Babilon agimik dəlveŋge na məlĩ na Eziptə pak təŋ səka lolohõ na Eziptə hã gap aka məlpa Efrat, kiva na məlĩ na Eziptə pakə.

Yoyakin, məlĩ na Yuda: wəke net ɗiy aka balam maddaabəŋ

⁸ Yoyakin tay də wəzva kəlaw kiyən dodopoɗo, pay akkpaŋ məlyã, azəmək məlĩ a Yerusalem təla hoku. Iya nat man na Nehusta, wətən Elnatan na Yerusalem.

⁹ Agəɗək zəga mbərayən a mahara Yawe səɗek va afən agəɗə.

¹⁰ Gala pay nan na, məzəlpaŋ na Nabukodonozor, məlĩ na Babilon, azzoŋ aka Yerusalem. Məsərŋgəslni walaŋgəla-metiŋ.

¹¹ Nabukodonozor, məlĩ na Babilon sən kiyən adek aka walaŋgəla-metiŋ dit gewleɗ nan asərŋgəslnəni.

¹² Yaŋ Yoyakin, məlĩ na Yuda agil aka məlĩ na Babilon, ndəni, mani, gewleɗ nani, deyeɗe nan dit deyeɗe nalpa nani. Aka əzva madodopoɗon nawzəm məlĩ nani məlĩ na Babilon arma.

¹³ Va Yawe anahə, akkporuk wəzaɓ naddəv Gəla na Yawe, də an naddəv gəla na məlĩ pakə; akrepik zəgeɗ na meleŋge, en Salomoŋ, məlĩ na Israyel, agəɗ addəv Gəla na Yawe pakə.

¹⁴ Akek ɗiy na walaŋgəla na Yerusalem aka balam pakə, deyeɗe pakə, məzəlpaŋ ɗiy gabal kəlaw məketi, məzaɓaŋ zəgeɗ dit məvotoŋ zəgeɗ nawkəɗəsl maddambeɗe; məssehẽŋɗe nemmbet ɗiy naka dələv van dəppaŋ kaka'ə.

¹⁵ Akak Yoyakin aka balam a Babilon, dət ma məlyã, gil na məlyã, deyeɗe net məzəlpaŋ nani, ɗiy tektek naka dələv vani; ake sə Yerusalem aka balam a Babilon.

¹⁶ Məsaryeɗ pak aɗɗaŋgək gabal buhulu, məvotõŋ dit məzaɓaŋ zəgeɗ nawkəɗəsl maddembaɗe, tahəŋ gabalə, məzəlpaŋ en tektek pak məlĩ na Babilon akek aka balam ananda.

¹⁷ Məlĩ na Babilon aɗiyək Mattanya mazzan aka məlĩ a gəlani, ndən dədəɗgən iya nan na, Sedekiya.

Sedekiya, məlĩ na Yuda

¹⁸ Sedekiya agəɗək əzva kaklaw sula kiyən taka gala akkpaŋ məlyã, azəmək məlĩ a Yerusalem wəzva kəlaw kiyən taka. Iya nat man na Hamutal, wətən Yeremiya na Libna.

¹⁹ Agəɗək mbərayən a mahara Yawe va an Yoyakim agəɗ pakə.

²⁰ Zəgas agəɗ a Yerusalem gəm a Yuda na, vi Yawe adə gədəv hã gap ndən ndol əndolit faraɗa səbani. Sedekiya aɓoŋguk aka məlĩ na Babilon.