2Milyeŋge 23 - Bible en Guidar

¹ Məlĩ aslənək əkkelet ɗiy məsɓet na Yuda dit en na Yerusalem pak azani.

² Yaŋ məlĩ atoŋ addəv Gəla na Yawe dit ɗiy na Yuda gəm en na Yerusalem pakə: məsdəlveŋge, məskəleŋɗe dit ɗiy pakə, muzliya hã gap metiŋgini. Aŋɗan sitik əpel naddəv ɗerewel na wənmiyna mərəhən addəv Gəla na Yawe naka.

³ Məlĩ aziw aka təki mərkan a disiŋ, amndak əziwgən wənmiyna aba Yawe, kazban Yawe, karme wəsəɓɗe nani, wəyak nani, mahenziŋɗe nan də makran taka gəm də megenegenen pakə, kaɗɗa əpel na wənmiyna məs məverin addəv ɗereweləŋka. Ɗiy pak atoŋgoŋguk addəv wənmiyna.

Wəzaɓan wəzba a Yuda

⁴ Məlĩ aɗiyək wən nan sən daya net məsdələveŋge Hilkiya, sit məsdəlveŋge meɓɓet gəm məgaŋ maddamba, dəgilgitingin zəgeɗ məɗɗet sən Ba'al dit en na Astera gəm net məzəlpaŋ na disiŋ pak səddəv Gəla na Yawe. Məgilgit sə Yerusalem, məzlet addivit wəleŋɗe a Kedron, məka moŋglo net a Betel.

⁵ Azetik məsdəlveŋge net zəgeɗkamaŋgəlva en milyeŋge na Yuda aɗi far nawzlaŋ tursan addivit gəleɗe-nettuyeŋge addəvit walaŋgəleɗe gugriɗ na Yuda gəm en tərwəsl ki Yerusalem pakə. Abayək ki wən nawzla tursan sən Ba'al, paya, təla, ngərzleɗi gəm sit məzəlpaŋ na disiŋ pakə.

⁶ Məgilgəni Astera səddəv Gəla na Yawe sə Yerusalem, məkan a lolohõ na Kedron, məzlan adaka, mətakaɗni va burɗuku, məggbo' burɗuk nan aket magamasɗe net ɗiy bumu.

⁷ Aɓzluwik gəleɗe net məpolkoyeɗ na tuya səddəv Gəla na Yawe, məs gil adawhõŋ lukutɗe na Astera.

⁸ Akiyik məsdəlveŋge naka dələv na Yuda pakə; arnoketik gəleɗe-nettuyeŋge məs məsdəlveŋge adawzlaŋ tursan aket adak təŋ sə Geba hã gap a Ber-Seba. Aɓzluwik gəleɗe-nettuyeŋge na maddambeɗe, an nawtoŋ də maddamba na Yosuwa daya na walaŋgəla-metiŋ, an naka zlaɓay an ɗəf tay ətoŋ də maddamba na walaŋgəla-metiŋ.

⁹ Hara kan na, məsdəlveŋge na gəleɗe-nettuyeŋge aɓapaŋ na əpeŋ a matuya na Yawe a Yerusalem ɓa; azəmaŋ na peŋ məza wuɗo a weleŋgit milmiŋgiɗit ɓa kaka'ə.

¹⁰ Arnokonək Tofet na walaŋ na Ben-Hinnom, vi ɗəf adawzla wətən mizilin may muguluŋgut aka iya na Molek ɓa.

¹¹ Abayək wən net pilseŋge, en milyeŋge na Yuda aziwgitin ama tive nawtoŋ addəv Gəla na Yawe aka iya na paya, go'o də giziŋ na Netan-Melek məs addəvit gəleɗe na maŋgava, azlek mawteɗ na pay də offo.

¹² Aɓzluwik matuyaɗe en naka təgbalka na gəla məzarŋgasla na Akaz məs milyeŋge na Yuda aɗɗaŋgə gəm matuyaɗe məs Manase agəɗ addəvit daŋgleɗ sula na Gəla na Yawe; məlĩ aɓzliwke, akrep sədaka, aggbo' moŋglo net a lolohõ na Kedron.

¹³ Məlĩ arnoketik gəleɗe-nettuyeŋge en na mahara Yerusalem dəka dəzəŋ na mossorgo metiŋ na kuɗupu məs Salomoŋ məlĩ na Israyel arkə aka iya nat Astera, zəga daryaw net mə Sidonɗe, Kemos, tuya na Mo'ab, Milkom, zəga daryaw net kirtin Ammon.

¹⁴ Akrepik serekɗe, abilik Astereɗi gəm məknəh gəlet dit sleŋsleŋɗe net ɗiy.

Əzaɓan əzba a Israyel

¹⁵ Vaska'e aɓzliw matuya na Betel, gəla-natuya an Yerobo'am wətən Nebat agəɗ nawtoŋgit mə Israyelɗe addəv mambrayəŋka; aɓzləwək təki nawzaɓ-Maŋgəlva gəm gəla- natuya pakə, azlak gəla-natuya, ndən takaɗ takaɗ ətakaɗən va burɗuku, azlak dədəka na Astera.

¹⁶ Yosiyas kpaŋ yaŋ awle magamasɗe aka mossorgo metiŋ adaka; yaŋ aslən wənde sleŋsleŋɗe səddəvit magamasɗe, azle aka matuya: vi karnokon va əpel na Yawe məs ɗəf na Maŋgəlva atəl ma nan lahəŋka.

¹⁷ Yaŋ amna: «Serek miy nədawla ndak di?» Ɗiy na walaŋgəla-metiŋ anahaŋ sənən na: «Magamas na ɗəf na Maŋgəlva məs dəde sə Yuda, dətəl ma net zəgeɗ kəgəɗ sən matuya na Betel əŋki.»

¹⁸ Yaŋ amna: «Məppani, ɗəf adawrəŋgit sleŋsleŋɗe nan ɓa!» Appetinik sleŋsleŋɗe nan dit sleŋsleŋɗe na məskəleŋ dəde sə Samari pakə.

¹⁹ Gəm azetik gəleɗe-nettuyeŋge məs dəssoŋ addəvit walaŋgəleɗe gugriɗ na Samari pakə, en milyeŋge na Israyel aɗɗaŋ vi kawdan sənən gədəv Yawe. Agəɗ sitik va agəɗ sit a Betel dekdeki.

²⁰ Atawək wəlet məsdəlveŋge net gəleɗe-nettuyeŋge dəssoŋ adak dəpas pak aka matuya, azlek sleŋsleŋɗe net ɗiy aketi. Ndən buryok a Yerusalem.

Ɗiy na Yuda tay əɗɗaŋ wəzləra na Pakə

²¹ Məlĩ aɗiyək wən nan sit ɗiy pak də wənah na: «Məɗɗa wəzləra na Pak na Yawe Maŋgəlva nokum, va məverin addəv ɗerewel na wənmiyna.»

²² Wəzləra na Pak dəgəɗ ɗah vas, təŋ səza pay net mətawaŋwən adawzəmaŋ məlĩ aka Israyel hã gap pay net milyeŋge na Israyel dit en na Yuda assoŋ ɓa.

²³ Aka əzva na Yosiyas makəlaw kiyən dodopoɗo aka məlĩ yi məɗɗa Pak na Yawe, a Yerusalem vaskəska.

Əbayma əzəm məlĩ na Yosiyas

²⁴ Əmpa na, Yosiyas azetik məpeleŋ dit məsvefɗe, mulaŋ heligi, terafim gəm zəgeɗkamaŋgəlva dit zəgeɗ daryawɗe naka dələv na Yuda də Yerusalem pakə, vi əpel na mahenziŋ an məverin addəv ɗerewel an məsdələv Hilkiya arah səddəv Gəla na Yawe.

²⁵ Məlĩ tay va ndən daabəŋ kiyən məs dəman haran aza Yawe də makran taka, də megenegeni, də gbogboŋ nan va mahenziŋ na Moyis ɓa. Tay dəsəɗ dərɓagan, va ndən ɓa'a.

²⁶ Də as pak makra Yawe dəffet səka ədagədəv nan aka Yuda ɓa, vi ədagədəv Manase adan sənəŋ ɓa.

²⁷ Yawe amna: «Yuda dayday, wanərɓahan sə maharaw faraɗa, va nərɓahan Israyel, wanəzgan Yerusalem walaŋgəla-metiŋ nəweləŋka, Gəla məs nənah na: Adak iya naw adawsan əŋka.»

²⁸ Madembirgit wəzeɗe na Yosiyas, də an agəɗ pak məvertiŋ addəv ɗerewel na Wəza net milyeŋge na Yuda.

²⁹ Pay ənziya nan egge, Farawən Neko, məlĩ na Eziptə, alək aza məlĩ na Asiri aka məlpa Efrat. Məlĩ Yosiyas asil kawləm səni, yaŋ abay a Megiddo, səza awla ləŋgə.

³⁰ Adan amtə, gewleɗ nan aslanən aka mawta nawgay sə Megiddo, akanən a Yerusalem. Andəknən addəv magamas nani. Ɗiy naka dələv nan agəmnən Yohakaz wətən Yosiyas, appay sənən mẽlẽ, aɗiynən aka məlĩ a gəla afəni.

Milyeŋge na Yuda en madidirɓe ( 23:31—24:20 ) Yohakaz, məlĩ na Yuda

³¹ Yohakaz tay də əzva kaklaw sula kiyən hoku, gala akkpaŋ məlyã, azəmək məlĩ təla hoku a Yerusalem. Iya nat man na Hamutal, wətən Yeremiya na Libna.

³² Agəɗək mbərayən aba Yawe va net efiŋgiɗni.

³³ Farawən Neko, aynanək a Ribla aka dələv na Hamat, vi adawzəm məlĩ a Yerusalem ɓa. Yas aɗi wən nakkal nzalaka aka dəlva, təbəz babar kilo gabal hoku, meleŋge kilo kaklaw hoku.

³⁴ Farawən Neko aɗiyək Eliyakim wətən Yosiyas aka məlĩ a gəla afəni, addəɗan iya nan ka Yoyakim. Na Yohakaz na, agəm aka a Eziptə, amtə adaka.

³⁵ Yoyakim apsənək təbəz babar də meleŋge sən Farawən; vi kawfaɗ an Farawən aɗi sit na, atawək təbəz babar də meleŋge aket ɗiy naka dələv nani, ɗəf pak aza wərəh nani, kapsən Farawən Neko.

Yoyakim, məlĩ na Yuda

³⁶ Yoyakim tay də əzva kaklaw sula kiyən sle', gala akkpaŋ məlyã, azəmək məlĩ a Yerusalem wəzva kəlaw kiyən taka. Iya nat man na, Zebudda wətən Pedaya na Ruma.

³⁷ Agəɗək mbərayən a mahara Yawe, səɗek va net efiŋgiɗni.