2Milyeŋge 22 - Bible en Guidar

Əzəm məlĩ na Yosiya ( 22:1—23:30 ) Yosiyas, məlĩ na Yuda

¹ Yosiyas tay də əzva dodopoɗo aka akkpaŋ məlyã, azəmək məlĩ a Yerusalem əzva kaklaw hoku kiyən taka. Iya nat man na, Yedida wətən Adaya na Boskat.

² Agəɗək an dəslə a mahara Yawe, adawək aka təl Davit afəni, dəslokor dəka dəzəŋ may dəka zlaɓay ɓa.

Daya net məsdələv tay ərəh ɗerewel na mahenziŋ

³ Aka wəzva makəlaw kiyən dodopoɗo na Yosiyas aka məlyã, aslən məzuver Safan wətən Asalya na Mesullam, addəv Gəla na Yawe, də wənah na:

⁴ «Dok aza daya net məsdəlveŋge Hilkiya, dəsapangən əŋɗa net koɓeɗ məkiyit addəv Gəla na Yawe, en məgaŋ maddamba atafaŋ səvet ɗiyi.

⁵ Dəpsit avet ɗiy məzəɗɗaŋ wəza, sit migil wəza na Gəla na Yawe, dəfaɗ sitingən məɗɗaŋ wəza məzuzaɓanən təki dəpɗak naddəv Gəla:

⁶ Məntaraŋ wəleŋɗe, mulaŋ wəza dit mərkaŋ gəleɗe, vi dəlbahaŋgən wəleŋɗe dit gərmeŋge məzaɓit nawzaɓan Gəla.

⁷ Ɗəf adassohẽt an aɗɗaŋ dit koɓeɗ mipsit ɓa, vi də təstəs adaɗɗanəni.»

⁸ Daya net məsdəlveŋge Hilkiya anah sən Safan məzuver na: «Nərəhək ɗerewel na mahenziŋ səddəv Gəla na Yawe!» Hilkiya apsənək ɗerewel nak sən Safan, aŋɗani.

⁹ Safan məzuver pay gas ərəh məlyã, botbotgən sən wən nan vaŋka: «Məɗɗaŋ wəza nok aziyninik koɓeɗ mərəhit addəv Gəla na Yawe, məpsiti mulaŋ wəza na gəla na Yawe vani.»

¹⁰ Safan məzuver aboton sən məlĩ dawnəh na: «Məsdələv Hilkiya apsuwək ɗerewel.» Safan aŋɗanək aba məlyã.

Yosiyas dət məskəlaŋgək Hulda

¹¹ Adan məlĩ aprəm wən naddəv ɗerewel na mahenziŋ, ndən lukutɗe nan ngarngargiti.

¹² Yaŋ anah sit may, məsdələv Hilkiya, Ahikam wətən Safan, Akbor wətən Mikaya gəm Safan məzuver də Asaya gawla na məlĩ də wənah na:

¹³ «Məddoŋ məkkaman Yawe ammbawa, ammba ɗəf titir dəwənnani gəm ammba Yuda pak aka wən na əpel naddəv ɗerewel mərahnəŋka; ədagədəv na Yawe metiŋgini akamə, Yawe adək gədəva, vi efiŋgiɗim dəprəmnən wən məverin naddəv ɗerewel mərəhnəŋ pak ɓa.»

¹⁴ Məsdələv Hilkiya, Ahikam, Akbor, Safan gəm Asaya, addoŋgək azat məskəleŋgək Hulda, ga məgə lukutɗe na wəza adawyaŋ na Sallum, wətən Tikwa na Haras, aka ki gəla na Yerusalem meleketentə. Yaŋ apeleŋ sətəni,

¹⁵ tənah sit na: «An Yawe Maŋgəlva na Israyel anah yaŋka: Mənah sən ɗəf dəslənkum azawəŋ na:

¹⁶ “An Yawe anah yaŋka: Wanəki əray aka təkiyəŋka gəm aket ɗiy naddəvən, kaknahan va əpel naddəv ɗerewel məs məlĩ na Yuda aŋgəɗəŋ pakə.

¹⁷ Adan azgawən firik ambataŋ əzlaŋ tursan sit meŋgilveɗ meɓɓeti, vi kawdan su gədəvu də wəza na veti. Makraw afyõhũk aka təkiyəŋka, affet na ɓa!”

¹⁸ Ya sən məlĩ na Yuda məs dəslənkum əssohõn Yawe na, yaŋ an kəlnahaŋ sənəni: “An Yawe Maŋgəlva na Israyel anah yaŋka: Kəprəmək əpelis lewlewi,

¹⁹ adan arəŋgən mokroko, kəvoŋgən kiyuk aba Yawe, aka kəprəm an nəpel aka təkiyəŋ dit ɗiy nakan pakə, təkiyəŋ wasan ki məski də mefɗeke akani, yaŋ kəŋgeret lukutɗe noko, kəhəm abawa; lewi yi, nəprəməka Yawe aɗiymani;

²⁰ Vini wanəppok kəmtəgən na zazay əzbet efiŋgiɗuko, horok awla na əray dədazzan aka təkiyəŋ ɓa.”» Hilkiya daya net məsdəlveŋge dit maslənɗe nek aki sənənək əpel na Yawe sən məlyã.