2Milyeŋge 21 - Bible en Guidar

Manase, məlĩ na Yuda

¹ Manase tay də wəzva, kəlaw kiyin sula gala akkpaŋ məlyã, wəzva kaklaw sle' kiyin sle' azəm məlĩ a Yerusalem. Iya nat man na Hefsi-Ba.

² Agəɗək zəga mbərayən a mahara Yawe, va zəgeɗ daryawɗe net ɗiy-ɗar en məs Yawe arɓehet səbet mə Israyelɗe.

³ Arketik gəleɗe-nettuyeŋge en Hizkiya afən aɓəsl neki. Arkək matuyaɗe sən Ba'al, ampək Astera va Akab məlĩ na Israyel agəɗə. Appu'uk abet məzəlpaŋ na disiŋ baymet agəɗ sit wəza.

⁴ Arket matuyaɗe addəv Gəla na Yawe, an məs Yawe apel lahəŋ akan na: «A Yerusalem nədawɗi iya nawa.»

⁵ Arkək matuyaɗe sit məzəlpaŋ na disiŋ, a daŋglaɗe sula na Gəla na Yawe.

⁶ Azlək wətən akoffo; awələk heligi, agəɗək tetele, awələk məsvefɗe gəm abotonək an əmpəsɗe anahaŋgə. Awanək əɗɗa mbərayən a mahara Yawe vi kawdan sən gədəvən.

⁷ Aziwgənək zəgakamaŋgəlva Astera an agəɗ addəv Gəla an məs Yawe anah sit may Davit də Salomoŋ wətən na: «Addəv Gəla əŋki gəm a Yerusalem, təki nəwel sə weleŋgit mahəlfaɗe na Israyel pak nədawɗi Iya naw ka faɗə.

⁸ An mə Israyelɗe armanənək an nəɗi sit gəm mahenziŋ məs gawla naw Moyis aɗi sit wən nanəŋka, nəmsak na əppet əmbat slorslor səka dələv məs nipsit efiŋgiɗtiŋ ɓa.»

⁹ Ya dəprəmnən ɓa, Manase mbo' əzet hã ndəɗaŋ toŋ əɗɗa mambray daykiyit ɗiy en na guw məs Yawe azet səbet mə Israyelɗe neki.

¹⁰ Yaŋ Yawe apel də met gewleɗ nan məskəleŋɗe, amna:

¹¹ «Vi zəgeɗ daryawɗe məs Manase məlĩ na Yuda agəɗiŋki, agəɗək mbərayən day ki an net mə Amorɗe aɗɗaŋ daabəŋ kiyən pakə, atoŋgənək Yuda əɗɗa mambray dit zəgeɗkamaŋgəlva nani,

¹² sən wənəski, Yawe Maŋgəlva na Israyel, anah na: “Wanəki əray aka Yerusalem də Yuda, ka ɗəf an dəprəm pak, sləman sula pak dəgəɗgən nzẽhẽ.

¹³ Wanəppar helege na Samari aka Yerusalem, gəm aka daŋgla na Akab. Wanəkəlɓət Yerusalem va adawkəlɓətaŋ həlu na way gəm ɗup əɗupni.

¹⁴ Wanəzget madembirgit ɗiy en nawray nawa; wanəppet avet məzuzelɗe neti, wakkpaŋgaŋ ka zəga nawrəh sə ma əgaya gəm zəga ka slu nampər net məzuzelɗe neti,

¹⁵ vi aɗɗaŋgək mbərayən a maharawa, tahəŋ ədan suwən gədəvwa, təŋ səza efiŋgiɗit agilyoŋ sə Eziptə, hã gap pay dəpaŋka.”»

¹⁶ Ya əmpa na, Manase abeyik ɗiy də mezlibezlibe na met diyɗa sawɓa, mbel net aknəhək walaŋgəla-metiŋ na Yerusalem, mbəksa mambray nan an atoŋgit ɗiy na Yuda wəɗɗa mbərayən a mahara Yawe.

¹⁷ Madembirgit wəzeɗe na Manase, an agəɗə, də mambray an agəɗ pak məvertiŋ addəv ɗerewel na Wəza net milyeŋge na Yuda.

¹⁸ Manase zamə, məndəkni addəv guli neŋgil ananda, Guli na Uzza. Ammon, wətəni dəkkpaŋ məlĩ a gəlani.

Ammon, məlĩ na Yuda

¹⁹ Də əzva kaklaw sula kiyən sula Ammon agəm məlyã, wəzva sula azəm məlĩ a Yerusalem. Iya nat man na, Mesullemet wətən Harus na Yotba.

²⁰ Agəɗək mbərayən a mahara Yawe, va na Manase afəni.

²¹ Azbanək tive an afən adaw pakə. Agəɗək wəza sit zəgeɗkamaŋgəlva məs afən agəɗ sit wəza, appu' abeti.

²² Appanək Yawe Maŋgəlva net efiŋgiɗni, dədaw aka tive na Yawe ɓa.

²³ Gewleɗ na məlĩ Ammon atuvuroŋgək wən akani: yas abaynən əŋgil ananda.

²⁴ Yaŋ ɗiy naka dələv van abeynin ɗiy en dətuvuroŋ wən aka məlĩ Ammon van beymeti, aɗiynən Yosiyas wətən ka məlĩ a gəlani.

²⁵ Madembirgit wəzeɗe na Ammon, də an agəɗ pak məvertiŋ addəv ɗerewel na Wəza net milyeŋge na Yuda ɓa sa?

²⁶ Məndəkni addəv magamas nani, Addəv Guli na Uzza. Yosiyas, wətən dəkkpaŋ məlĩ a gəlani.