2Milyeŋge 20 - Bible en Guidar

Gbəgba' də wənzaɗ na məlĩ Hizkiya

¹ Aka pay nani, məlĩ Hizkiya azgək gbəgba' va namta. Məskəleŋ Isaya wətən Amos pay ulani, yas anah sən na: «Aŋki an Yawe anahə: Aman mok sən gəla noko vi akəmtə, kəmbəl na ɓa.»

² Yas Hizkiya akkpaŋgan haran dəza gəla akkaman Yawe, amna:

³ «Aw! Yawe, kamə aɗɗum na nədawək abok də gegesiŋ gəm makraw taka, gəm nəgəɗək moggon ama horoko.» Hizkiya ahəmək sawɓa.

⁴ Isaya, dəɓəl əgilyen sə daŋgəla metiŋ ɓa, Yawe apel sən dawnəh na:

⁵ «Amndok anah sən Hizkiya, məlĩ net ɗiy naw na: “Aŋki an Yawe Maŋgəlva na afuk Davit anahə: Nəprəmək əkkam noko, nulek sin noko. Wanənzaɗko; addəv əvoŋ hoku, wakəl addəv Gəla na Yawe.

⁶ Wanəzzeken əzva nok də əzva kəlaw kiyən sle'i. Wanəkõhguko, is də walaŋgəla-metiŋginəŋ səva məlĩ na Asiri; wanəga walaŋgəla-metiŋginiŋka, viwa gəm vi gawla naw Davit.”»

⁷ Isaya amna: «Məgəm uwa na sokoyo məktəmən!» Ndəɗaŋ gəm taka, məbasən aka yoro naka, ndən hənzaɗə.

⁸ Hizkiya anah sən Isaya na: «Miy dədarban na, addəv əvoŋ ma hoko'o na, Yawe wanzaɗwa gəm wanətoŋ addəv Gəla na Yawe di?»

⁹ Isaya amna: «Aŋki zəga narban suk dəde səza Yawe, kəsəngən na Yawe waknəh əpel an apeli na: mok aka zeŋgile dəlgən abe təl ɗəf zlakzlak kəlaw aka hara tive, awaniɓa dəddergən dirɓe təl ɗəf zlakzlak kəlawə?»

¹⁰ Hizkiya amna: «Əzzel na zeŋgile əmbat abe təl ɗəf zlakzlak kəlaw tay tuwãh ɓa, naw nəŋgəl na dəmndan dərɓe təl ɗəf zlakzlak kəlawə.»

¹¹ Məskəleŋ Isaya akkaman Yawe, addergən zeŋgile təl ɗəf zlakzlak kəlawə, amndagan səka hara tive na Akaz kəlawə.

Hizkiya tay ətef maslənɗe sə Babilon

¹² Pay dəpaska, Merodak-Baladan, wətən Baladan, məlĩ na Babilon, aslənək ɗerewelɗe gəm əvəl sən Hizkiya, vi aprəmək na azgək gbəgba'a.

¹³ Hizkiya annekik də əzza neti. Arban sitik gəla nawzaɓan ərəh nani, təbəz babara, meleŋge, tursanɗe gəm mẽl məs məŋgənən moggoni may gəla nazeɓet gulomɗe nani. Zəga tay təttaka səddəv əzaɓ nan məs Hizkiya dərban sit siŋgil ananda may səka dələv nan ɓa ɓa.

¹⁴ Məskəleŋ Isaya ade ərəh məlĩ Hizkiya yas attokon na: «Mi ɗiy vet anahaŋ sukun di? Səŋga azzoŋ di?» Yas Hizkiya azlan na: «Daga səka dələv faraɗa azzoŋgu, Sə Babilon.»

¹⁵ Isaya amna: «Ya mi awlaŋ addəv gəla nok di?» Hizkiya azlanək na: «Zəga an dəsan anawda pak awlanənka. Zəga tay məs nərban sit səddəv əzaɓ naw ɓa ɓa.»

¹⁶ Isaya anah sən Hizkiya na: «Aprəm əpel na Yawe:

¹⁷ Pay wade, zəga an dəsan addəv gəla noko də an efiŋgiɗuk akkalaŋ pak kawkani a Babilon. Zəga tay təttaka nappa ɓa, Yawe anahə.

¹⁸ Wagəmaŋ simmbet kirtuk məs dəgilyoŋ səddəvko en kəwə, karget dəssoŋgən məɗɗaŋ wəza ana məlĩ na Babilon.»

¹⁹ Hizkiya aɓsən Isaya na: «Əpel na Yawe kəpeləs na lewi.» Yas amsak ənah na: «Ya aka pay naw na, zazay də əssa fendeŋ dədawsan ɓa sa?»

²⁰ Madembirgit wəzeɗe na Hizkiya, makra nani gəm bobok arkə, məŋkpara abor nawki iŋkile a walaŋgəla-metiŋ pak məvertiŋ addəv ɗerewel na Wəza net milyeŋge na Yuda.

²¹ Hizkiya zamək. Manase wətən dəkkpaŋ məlĩ a gəlani.