2Milyeŋge 2 - Bible en Guidar

Maŋgəlva aslanək Eliya a disiŋ, Elisa agəm gəlani

¹ Aka Yawe aslan Eliya addəv barkataŋ a disiŋ na, Eliya van də Elisa asilyoŋ sə Gilgal, tahəŋ əmbataŋ matakə.

² Eliya aɓsən Elisa na: «Asok aŋka kamə, vi Yawe aslənwək a Betel.» Elisa azlan sən na: «Yawe madarani, zeŋgilok madarani, nəppok na kpak ɓa!» Yaŋ asəreheŋ a Betel.

³ Kirtit məskəleŋɗe viteŋ sə Betel aza Elisa, aɓsənən na: «Kəsənək na, dəpaŋ Yawe waslan daya nok aka makapal dəkoko sa?» Amna: «Naw pak nəsənka; məɓətə!»

⁴ Eliya aɓsən Elisa na: «Asok aŋka kamə, vi Yawe aslənwək a Yeriko.» Elisa azlan sən na: «Yawe madarani, zeŋgilok madarani, nəppok na kpak ɓa!» Yaŋ addoŋ a Yeriko.

⁵ Kirtit məskəleŋ na Yeriko azzoŋguk aza Elisa, aɓsənən na: «Kəsənək na, dəpaŋ Yawe waslan daya nok aka makapal dəkoko sa?» Amna: «Naw pak nəsənka; məɓətə!»

⁶ Eliya aɓsən Elisa na: «Asok aŋka kamə, vi Yawe aslənwək a Yurden.» Yaŋ azlan sən na: «Yawe madarani, zeŋgilok madarani, nəppok na kpak ɓa!» Yaŋ addoŋ sulagiti.

⁷ Kirtit məskəleŋ kaklaw sle' addoŋ aziweŋ abet ɓuhho, ya ndəɗaŋ sula nek tam aziweŋ ama Yurden.

⁸ Yaŋ Eliya aggbuk lukut nani, aktəm arge iŋkile, ndəɗaŋ wəɗak dahãdahã. Aggaraŋ sulagit dəka təki məklakani.

⁹ Adan adaggaraŋgə, Eliya aɓsən Elisa na: «Assõhu, miy kəŋgəl nəgəɗ sukgən tak məgəmwi səzok tagay ɓaŋ di?» Elisa amna: «Kamə, kəta əmpəs nok dəde təp sula akawa!»

¹⁰ Amna: «Zəga tatwãh kədassõhõ. An kuluwək pay adawslawən səzoko, asna wasan suk vaska, an vaski ɓa na, asna agəɗ na ɓa.»

¹¹ Adan adawmbataŋ də wəzga meŋ, mawta na offo yaŋ dit pilseŋge na offo, yaŋ awɗeketin səza ziti; Eliya peŋ a disiŋ addəv barkataŋ.

¹² Adan Elisa awla, ndən vaŋvəl: «Əbba nawa! Əbba nawa! Mawta nawgay na Israyel dit məpeŋgeŋ pilseŋge nani!» Siske na dula əmpa ɓa. Yaŋ arme lukutɗe nani, aŋgeret sek sula.

¹³ Yaŋ allam lukut na Eliya dəbət səkki van naka, ndən həmndak tek ziw a mabuzgum na Yurden.

¹⁴ Agəm lukut na Eliya dəbət səkki van nak arge iŋkile, yaŋ amna: «Aŋgay Yawe Maŋgəlva na Eliya əŋdi?» Ndən tam du' ərge iŋkile, ndəɗaŋ wəɗak dahãdahã, Elisa dəgarə.

¹⁵ Kirtit məskəleŋ na Yeriko təm ulanən abeti, yaŋ aɓɗaŋ na: «Əmpəs na Eliya asanək aka Elisa.» Yaŋ azzoŋ kawləm səni, ndəɗaŋ guduk afuŋ abani

¹⁶ aɓsənən na: «Yaŋ kan na, gewleɗ nok tahəŋ dit məzəlpaŋ kaklaw sle'i. Appet dəmbataŋ əkayan daya nokəŋka. Kuzuŋ əmpəs na Yawe, akak əzgan aka taka naret mossorgoɗe gugriɗe, awaniɓa aka walaŋ maɓɓan soko.» Yaŋ amna: «Kəslənaŋ ɗəf ɓa.»

¹⁷ Ndəɗaŋ tilit tək azani hã wil de' ədanəni, yaŋ amna: «Mislin kana!» Aslənaŋ ɗiy kaklaw sle', akayanən addəv əvoŋ hoku, məza gas ərəhnən ɓa.

¹⁸ Ndəɗaŋ buryok azani, tay ɗewwe a Yeriko, aɓsit na: «Nənah sukum na kəddoŋ ɓa ɓa sa?»

Elisa tay əbbur vov net iŋkile na Yeriko

¹⁹ Zel na Yeriko anahaŋ sənən Elisa na: «Awle yaŋ walaŋgəla-metiŋ asanək lewi va daya naw adawlani ya iŋkile tahəŋ nek ɓa hara, dəlvafuŋ pak amtəka.»

²⁰ Aɓsit na: «Məki su kasli meleketeni, məzi bətu addəvni!» Yaŋ aki sənəni.

²¹ Ndən vit mbat dəka heret iŋkile neki, andol bətu dawnəh na: «Vaŋ Yawe anahə: Nubburik iŋkile veti; akiyaŋ na əmta ɓa, dəlvafuŋ asan na məmtən əmpa ɓa.»

²² Iŋkile nek kpaŋgaŋ neki hã gap pay dəpaŋ va əpel na Elisa, an apeli.

Maŋgəlva tay ətawwən aket kirin dəmasaŋ aka Elisa

²³ Ndən peŋ sədak mbat a Betel. Aka tive daddan na, kirin mezeŋgleket memeɗeŋɗe viteŋ sə walaŋgəla-metiŋ, amasaŋ akani, aɓsənən na: «Dok səŋka məfosl kini! Dok səŋka məfosl kini!»

²⁴ Ndən kpaŋgən haran dərɓagani, təm uleti, araygit də iya na Yawe. Yaŋ zəgeɗ darawit muguluŋgit adawyaŋ na Ursə sula agilyoŋ səddəvit wəleŋɗe, abeketin kirin kaklaw poɗo kiyit sula səreti.

²⁵ Yaŋ ambat sədak aka mossorgo metiŋ na karmel sədak ndən buryok a Samari.