2Milyeŋge 19 - Bible en Guidar

Hizkiya alək ula məskəleŋ Isaya

¹ Səza məlĩ Hizkiya aprəma, eŋgeretik lukutɗe nan karban na addəv tatwãhi, ndən gəm lukut na gəlabay azan kulo'u, yas ammbat addəv gəla na Yawe.

² Yaŋ aslin may Eliyakim daya naka gəla na məlyã, Sebna məzuvere gəm ɗiy məsɓet net məsdəlveŋge aza məskəleŋ Isaya, wətən Amos dit lukutɗe na gəlabay azeti,

³ dənah sənəngən na: «Vaŋki Hizkiya anahə: Dəpaŋki pay na tatwãh gəm nawzəmsahã, pay net wili yi, vi muzliya go'o yi nawgilyeni, gbogboŋ nanɗəsən kawan tay ɓa!

⁴ Awsən ɓa, kuzuŋ Yawe Maŋgəlva nok waprəm əpel na daya net məzəlpaŋ na məlĩ pakə, məs məlĩ na Asiri daya nan aslən vi kawran Maŋgəlva madarani. Awsən ɓa, kuzuŋ Yawe Maŋgəlva nok watawwən aka əpel an aprəmə. Akkam ammbet ɗiy en dəppaŋgə.»

⁵ Səza gewleɗ na məlĩ Hizkiya azzoŋ aza Isaya,

⁶ Isaya anah sit na: «Vaŋ kədawnah sənən daya nokum: Aŋki an Yawe anahə: Kəgeslne vi kəprəm əpel məs gewleɗ na məlĩ na Asiri arawənəŋ ɓa!

⁷ Wanəgul əɗɗum akani, waprəm wəna; wamil aka dələv nani. Wanəɗɗa ka kawbayən də masalam aka dələv nani.»

Saŋkerib amndanək kawsərŋgəsl Yuda

⁸ Daya net məpsənən zəga nawsa nak buryoku, arəh məlĩ na Asiri tay akki əgay də Libna, vi aprəmək na, ambatək sə Lakis

⁹ Yaŋ aprəm wən aka Tirhaka, məlĩ na Etiyopi na. Awle, agilik kawgay dənduko! Məlĩ na Asiri gabban yop slən ɗiy aza Hizkiya dawnah sit na:

¹⁰ «Mənah sən Hizkiya məlĩ na Yuda na: Maŋgəlva nok məs kədawbay vok akanəŋ ambəɗok dawnəh na: “Yerusalem abət na ava məlĩ na Asiri ɓa ɓa!”

¹¹ Nok kəprəmək va milyeŋge na Asiri aɗɗaŋ sitin dəlveŋge pakə: araygitinik humusu. Ya nok azok na wakəkõh sa?

¹² Meŋgilveɗ net ɗiy akohgitinik aka efiŋgiɗu araygənən Gozan, Haran, Resef dit mə Edenɗe dəssoŋ a Telasar iŋ na, meŋgilveɗ net akõhgitinik sa?

¹³ Ŋgahəŋ may məlĩ na Hamat, məlĩ na Arpat da, məlĩ na Layr, Sefarwayim Hena gəm Iva di?»

Əkkam na Hizkiya

¹⁴ Hizkiya letər səvet maslənɗe nek tafə, aŋɗani, atoŋ addəv Gəla na Yawe. Hizkiya appar aba Yawe.

¹⁵ Hizkiya akkam aba Yawe, amna: «Yawe Maŋgəlva na Israyel, istə aket kerubaɗe, istə kaka' Maŋgəlva aket milyeŋge naka dələv pakə, vi istə kəzəməɗ disiŋ də dəlvafuŋgu.

¹⁶ Yawe apak sləmok aprəma, akol horoko Yawe awla, aprəm əpel məs Senakerib aslənəŋ vi kawran Maŋgəlva madarani!

¹⁷ Gesiŋ, Yawe, məlyeŋge na Asiri azetinik ɗiy naka dələv də dələv net pakə.

¹⁸ Azgetik meŋgilveɗ net akoffo, vi meŋgilveɗ net Maŋgəlvaŋ ɓa, wəza na ɗəfəŋ kaka'ə, məzeɓit dit wəleŋɗe gəm girmeŋgeŋ. Azetinke.

¹⁹ Ya kakaŋ na, Yawe Maŋgəlva namə, akõhgəm səvani kamə, kiyva net milyeŋge naka dələv pak wasunkun na, istə Yawe Maŋgəlva kaka'ə.»

Isaya tay əprəman sən wəzlan na Yawe sən Hizkiya

²⁰ Isaya wətən Amos slən aza Hizkiya dawnəh na: An Yawe Maŋgəlva na Israyel anah yaŋka: «Nəprəmək an kəkkamaw aka wən na Senakerib, məlĩ na Asiri.

²¹ Aŋki an Yawe apəl akani: Waŋ gbuɓɓo na Siyon tat əzeloko, tat əmas akoko Senakerib, Yerusalem tat əɓlan kiyən galagala dərɓogoko.

²² Nawa kərə gəm nawa kərəm mama azan di? Aka nawa kəslan wəlok is horok le'gən nawkaɓ di? Aka Salala na Israyel yi.

²³ Də met maslənɗe nok kəran Daya. Yas kənah na: “Dit mawteɗ nawgay naw nəpeŋ aka dadwar kiyit mossorgoɗe gugriɗe, addak Liban, vi kawbəl wəleŋɗe ɓəɓəlɗe məɓeyti kawbəl wəleŋɗe məwele lelewɗe, wanəruf metteɓ man hã gap wəleŋɗe nan ngərəɓə.

²⁴ Nəso'ək vov net iŋkile, ya en na guw nədawsa, dawɗi təlu nədakkpe' iŋkile səket tiveɗ na Eziptə.”

²⁵ Kəprəm ɓa sa? Fari nəzaɓan as vani. Addivit əvoŋɗe dətoŋgoŋgu, kakaŋ na nəɗɗaka. Nəkika, vi kakkpeŋget walaŋgəleɗe gbogboŋɗe ka kpew net kiməskiɗe.

²⁶ Ɗiy dəssoŋ adak tahəŋ zit baybayə, geslne armeke tahəŋ dit wil areti, tahəŋ va kevile nawra gəm va kəvile dəgil aket təgbalkeɗe, va haykəmari mes doŋgoyoŋ ampan meza dəsəɓ ɓa.

²⁷ Ya an kəsokko, an kəgilke, an kədeke, gəm an kədəkgədəv akawa, nəsənka.

²⁸ Adan kədəkgədəv akawa, əkaɓ nok aprəmək a sləmawa, asna wanəgul ogono naw a məŋkunko gəm helze naw a moko wanəmndogok dəka tive an kəde akani.

²⁹ Aŋki dədarban suko Hizkiya: Əzvaŋka wakəzəmaŋ menteɗe, əzva masulani, wakəzəmaŋ zlalwã. Əzva ma hoko'ən, wakəzlgaŋgə, wakəkkalanəni, wakəmpaŋ megezlembirkeɗ nokum gəm wakəzəmənən uwa neti.

³⁰ En dəndəwəɗaŋ səddəv Yuda wassoŋ va suwer wəlaŋga afuŋgu, wawaŋ a disiŋ.

³¹ Ɗiy dəppaŋ wagilyoŋ sə Yerusalem gəm en dəndəwəɗaŋ aka gərəm na Siyon. Aski Yawe adaɗɗa addəv əŋgla nani.

³² Vini Yawe anah vaŋ aka məlĩ na Asiri na: Atoŋ na addəv walaŋgəla-metiŋginin ɓa, ahon na har adak ɓa, aziw na aban də baray ɓa, akkpot na dələv aban ɓa.

³³ Dəka tive an ade, wamndan dəkani. Atoŋ na addəv walaŋgəla-metiŋginiŋ ɓa, Yawe aɗiymani.

³⁴ Wanəga walaŋgəla-metiŋ vi kawkõhgəni, viwa gəm vi gawla naw Davit.»

Wəmbat net mə Asiriɗe, əmta na Saŋkerib

³⁵ Dəfəɗ nani, Maslay na Yawe argak dibirgiɗik na Asiri, abeyik ɗiy gabal səkat də kaklaw dodopoɗo kiyit sle'i. Səza addaŋgə ɗiy asilyoŋ na, ki gəbayit ɗiy kpohru!

³⁶ Senakerib məlĩ na Asiri, asimke, amndanək asan a Niniwe də gəla.

³⁷ Adan adappu' addəv gəla na Nisrok maŋgəlva nani, kirtin abaynən də masalam, may Adrammelek də Sareser, ndəɗaŋ ɓak ənzoŋ aka dələv na Ararat. Asarhadon, wətən dəkkpaŋ məlĩ a gəlani.