2Milyeŋge 17 - Bible en Guidar

Hose'a, məlĩ na Israyel; əgəm na Samari

¹ Aka wəzva na Akaz, makəlaw kiyin sula aka məlĩ na Yuda, Hose'a, wətən Ela, asan məlĩ a Samari, aka Israyel, wəzva vaytakə.

² Agəɗək mbərayən a mahara Yawe, ya tay va net milyeŋge na Israyel dətoŋgoŋ daabəŋ kiynəŋ ɓa hara.

³ Salmanasar, məlĩ na Asiri, adek wəgay dəndəni, Hose'a aɓe' sənka, yaŋ adawrək sən nzalaka aza əzva.

⁴ Yaŋ məlĩ na Asiri nak arəh na, Hose'a atəpək man dawslən ɗiy aza Sõ, məlĩ na Eziptə, dəki sən nzalaka sən məlĩ na Asiri va əzva ɗayɗay ɓa. Yaŋ məlĩ na Asiri arma Hose'a, aɓruk azgan a fərsəna.

Wəskot na Samari ( 17:5-41 )

⁵ Yaŋ məlĩ na Asiri ambat wəgay də dələv van pakə; asərŋgəsl Samari wəzva hoku.

⁶ Aka wəzva mavaytakan na Hose'a aka məlĩ yi, məlĩ na Asiri amõh Samari, ake mə Israyelɗe a Asiri. Azi aka va na Hala, aka va na Gozan, dədaki məlpa Habor adawtoŋgo, gəm a walaŋgəleɗe gugriɗ na Mediya.

Zəga an dəzan dələv na məlĩ na Israyel

⁷ Wən nan agəɗ na, vi mə Israyelɗe aɗɗaŋ mbərayən aka Yawe Maŋgəlva net məs dəgilgit səka dələv na Eziptə səva Farawən məlĩ na Eziptə gəm vi tahəŋ əgeslne'eŋ sitin meŋgilveɗ meɓɓeti.

⁸ Azbetinik mahenziŋɗe net ɗiy-ɗar en məs Yawe arɓehet səbet mə Israyelɗe, dit mahenziŋɗe en milyeŋge na Israyel aɗiyaŋ sən kiyti.

⁹ Mə Israyelɗe aɗɗaŋgək zəga moggoni ɓa aba Yawe Maŋgəlva net də ma haɗamma, arkaŋgək gəleɗe-nettuyeŋge a walaŋgəleɗe net gugriɗ pakə, addəv gəla na ɓeɓele may a walaŋgəleɗe na korgu;

¹⁰ ampaŋgək serek gəm Astereɗi aket mossorgoɗe məɓeyit pakə, gəm ammba wəlaŋga hirik hirik pakə;

¹¹ azlaŋgək tursan adak aket gəleɗe-nettuyeŋge va net ɗiy-ɗar məs Yawe arɓah səbeti. Aɗɗaŋgək zəgeɗ mbəreyit nassan zə Yawe.

¹² Aɗɗaŋgək wəza sit tuyeŋge, məs Yawe anah na: «kədaɗɗaŋ zəga vas ɓa naka!»

¹³ Yawe, akol sit slemet mə Israyelɗe dit mə Yudeɗ də met məskəleŋɗe gəm məzulaŋ pakgit, dawnəh na: «Məmil səka tive nokum mbəraynəŋka, mərme wəsəɓɗe nawa, wəzga'ɗe naw va mahenziŋ an nəɗi sit wən nan sit efiŋgiɗkum, gəm nəgapgən sukum də met məɗɗaŋ wəza naw məskəleŋɗe.»

¹⁴ Ya dəprəmnən ɓa, aɓɓəlanənək kiyit va net efiŋgiɗit məs dətafnən Yawe Maŋgəlva net ɓeŋki.

¹⁵ Azgetinik mahenziŋɗe nan də wənmiyna nan məs aynan dit efiŋgiɗti gəm wən an aprəman siti; yaŋ azbanən zəga ɗarə, akkpaŋgaŋ tam va zəga ɗarə, gəm azbetin ɗiy-ɗar en tərwəsl kiyiti məs Yawe aɗi sit wən nan na kədaɗɗaŋ va net ɓa naka.

¹⁶ Appetinik wəsəɓɗe na Yawe Maŋgəlva neti, avotoŋguk kirit wasliɗe sula; ampaŋgək Astera, appu'oŋguk abet məzəlpaŋ na disiŋ gəm aɗɗaŋ wəza sən Ba'al.

¹⁷ Azletinik kirtit mezeŋgleket dit muguluŋgit akoffo; awlaŋgək heligi, askaŋgək pəɗe. Appanənək zit sən əɗɗa mbərayən a mahara Yawe kawdan sən gədəvni.

¹⁸ Gədəv Yawe adək diyɗa aket mə Israyelɗe; arɓahetik faraɗa sə maharani. Dəpəl an mazlalwã Yuda yi kaka ɓa ɓa.

¹⁹ Mə Yudeɗ dayday dərmenin wəsəɓɗe na Yawe Maŋgəlva net ɓa'e; azbetinik mahenziŋɗe məs mə Israyelɗe aɗiyaŋgə.

²⁰ Yawe azganək mahəlfa na Israyelɗe baymani, arbisitik wili; appetik ammba vet məɗɗaŋ popoho hã gap arɓehet səbani.

²¹ Vi Israyel arslak kiyən səza zev Davit, aɗiyənək Yerobo'am wətən Nebat ka məlyã, Yerobo'am azetik mə Israyelɗe səmmba Yawe, atoŋgit əɗɗa mambray metiŋgini.

²² Mə Israyelɗe asɗekenənək mambray na Yerobo'am agəɗ pakə; dəmzlahaŋ səkan mbəzlasa ɓa,

²³ Hã gap Yawe arɓehet səban va anah də met məɗɗaŋ wəza nan məskəleŋɗe. Məketiŋ mə Israyelɗe səka dələv net faraɗa a Asiri hã gap pay dəpaŋka.

Wətəŋ net mə Samariɗe

²⁴ Məlĩ na Asiri, aki ɗiy sə Babilon, sə Kut, sə Awa, sə Hamat, gəm sə Sefarwayim, aze wəziyit a walaŋgəleɗe gugriɗ na Samari, a gəlet mə Israyelɗe. Agəmənək təki a Samari, assoŋ a walaŋgəleɗe gugriɗ pakə.

²⁵ Də wətəŋ əssa net adaka, awgeslne'eŋ sənən Yawe ɓa, Yawe aslən ɓooliɗ aket yaŋ əbeynini.

²⁶ Apeleŋ sənən məlĩ na Asiri dawnəh na: «Ɗiy na guw kəki a walaŋgəleɗe gugriɗ na Samari əŋna, dəsənən tive na maŋgəlva naka dələv van ɓa. Yaŋ maŋgəlva van aslin ɓooliɗ aketi, tay əbeynəni, adan dəsənən tive na maŋgəlva naka dələv van ɓa.»

²⁷ Yaŋ məlĩ na Asiri, aɗi wən nan dawnəh na: «Məkə taka səret məsdəlveŋge kəkiyaŋ sədakiŋki, dəlgən əsan adaka, dəmbat dəsan adak dəyagan sitgin tive nazban maŋgəlva naka dələv vani.»

²⁸ Məsdələv taka səret en məket sə Samari nak adek əsan a Betel; tay iyeget va adawgeslne' sənən Yawe.

²⁹ Də as pak na, ɗiy-ɗar aɗɗaŋgək meŋgilveɗ neti, atuknin addəvit gəleɗe-nettuyeŋge məs mə Samariɗe arkaŋgə. Ɗiy na guw veti, aɗɗannək naway pak a walaŋgəla-metiŋ a təki məs assoŋgu:

³⁰ ɗiy na Babilon aɗɗaŋ Sukkot-Benot; ɗiy na Kut, Nergal; ɗiy na Hamat, Asima;

³¹ mə Aviɗe agagdakanənək tuya Nibhaz gəm Tartak; mə Sefarwayɗe tahəŋ əzban əzle kirtit akoffo sən Adrammelek də Anammelek, meŋgilveɗ na Sefarwayim.

³² Dəppanən əgeslne' sən Yawe ɓa, agəmaŋgək məsdəlveŋge net gəleɗe-nettuyeŋge səret ɗiy neti'e, dəzaɓaŋgən-Maŋgəlva aka wəya net addəvit gəleɗe-nettuyeŋge.

³³ Dawgeslne' sən Yawe pak tahəŋ əɗɗaŋ wəza sit meŋgilveɗ net va matuya net ɗiy na təki məs azzoŋ sədaka.

³⁴ Hã pay dəpaŋ tahəŋ əɗɗaŋ va azet tiveɗnanziya net farə: awgeslne'eŋ sənən Yawe ɓa; aɗɗaŋ va əpelɗe na ənziya na Yawe ɓa, matuya yi dəkkpaŋ ka neti, azbetin mahenziŋɗe, tiveɗnanziya də mahenziŋ məs Yawe aɗiy sit wən nan sit kirtin Yakob, məs apsən iya nan na Israyeləŋ ɓa.

³⁵ Də Yawe aziwgin wənmiyna dənɗaŋ lahəŋka, aɗi sit wən nan lahəŋ dawnəh na: «Kədawgeslne'eŋ sitin meŋgilveɗ meɓɓet ɓa, kədappu'oŋ abet ɓa, kədaɗɗaŋ sitin wəza ɓa, kədawzaɓaŋ sitin Maŋgəlva ɓa.

³⁶ Sən Yawe məs dəgilgukum səka dələv na Eziptə də wəɓap metiŋgin, gəm də van le'gəni, anan kədawgeslne'eŋ sənən kaka'ə, aban kədappu'oŋgu; anan kədawzaɓaŋ sənən Maŋgəlva.

³⁷ An aziwgin naɗɗa, dit tiveɗnanziya, mahenziŋ gəm an aɗi naɗɗa, aver vikum kərmeningin pay pakə; kədawgeslne'eŋ sitin meŋgilveɗ meɓɓet ɓa.

³⁸ Kədazgətaŋ ki wənmiyna nəziwgən də mənokuməŋ ɓa: kədawgeslne'eŋ sitin meŋgilveɗ meɓɓet ɓa.

³⁹ Sən Yawe Maŋgəlva nokum, kədawgeslne'eŋ kaka'ə, ndən dədawkõhgukum səvet məzuzelɗe nokum zlaŋgə.»

⁴⁰ Dəprəmnən ɓa; yaŋ adaɗɗaŋ va matuyet adaɗɗaŋ farə.

⁴¹ Va ɗiy-ɗariŋ ageslne'eŋ sənən Yawe dazbetin maŋgilveɗ neti'e. Va efiŋgiɗit aɗɗaŋgə, kirtit dit dəhiŋgiɗit pak vas adaɗɗaŋ hã dəpaŋka.