2Milyeŋge 14 - Bible en Guidar

Amatsiya, məlĩ na Yuda

¹ Aka wəzva masula'a na Yo'as, wətən Yohakaz məlĩ na Israyel na, Amatsiya wətən Yo'as məlĩ na Yuda agəm məlyã.

² Tay də wəzva, kaklaw sula kiyən sle', gala apeŋ aka məlyã, azəmək məlĩ wəzva kaklaw sula kiyən vaytak a Yerusalem. Iya nat man na, Yoyadan, sə Yerusalem.

³ Agəɗək zəga nannek zə Yawe, ya va na Davit afəni ɓa hara, dekdek va na Yo'as afən agəɗə.

⁴ Gəleɗe-nettuyeŋge dəzan ɓa'e; ɗiy tahəŋ əzaɓaŋ-Maŋgəlva, tahəŋ əzlaŋ tursan addivit gəleɗe-nettuyeŋge.

⁵ Adan Amatsiya asɓan məlĩ nani, abeyik gewleɗ nan məs dəbaynən afən səka məlyã.

⁶ Dəbey kirtit məbayaŋ gəbayiŋ ɓa hara, va məverin addəv ɗerewel na mahenziŋ na Moyis, məs Yawe anah na: efiŋgiɗit kirin amtaŋ na aka batamit kirtit ɓa; may kirin aka batamit efiŋgiɗit ɓa; naway pak aka mambray nan adamta.

⁷ Ndəni yi'e dəbey məzəlpaŋ na Edom gabal kəlaw aka walaŋ na Bətuwa, gəm dəmõh Sela də wəgaya, alvan na, Yokte'el hã pay dəpaŋka.

⁸ Yaŋ Amatsiya aslən metiveɗ aza Yo'as wətən Yohakaz, wətən Yehu, məlĩ na Israyel, kawnah sən na: «Ade agay səmə!»

⁹ Yo'as, məlĩ na Israyel slən aza Amatsiya, məlĩ na Yuda, dawnəh na: «Nzewɗe na Liban slən aka wəlaŋga ɓəɓəl na Liban dawnəh na: “Apsənət wutuk sən wətu ka gulku!” Yaŋ zəga nawra na Liban ade ammusset nzewɗe neki.

¹⁰ Nəsənəka, kəskak wəla Edom, kəkkpaŋgək məs fərkã. Nok agagdakan kiyko, ya kan na, daɗah asok anokda! Vimi kədawtoŋgən kiyuk addəv tatwãh kawzan kiyuk isi sap dit ɗiy na Yuda di?»

¹¹ Amatsiya, dəprəm ɓa. Yo'as məlĩ na Israyel teki, agayaŋ də Amatsiya məlĩ na Yuda, a Betsemes na Yuda.

¹² Məzəlpaŋ na Israyel, arbaŋ sitinik məzəlpaŋ na Yuda, naway pak anzanək a gizlirke nanda.

¹³ Yo'as, məlĩ na Israyel, ampanək Amatsiya məlĩ na Yuda, wətən Yohakaz, dəhən Akaziya, a fərsəna a Betsemes, ndən pay a Yerusalem, aɓliw zlava na Yerusalem gap ammba metir səkat sula, təŋ səza maddamba na Efrayim hã mgbusl aza maddamba nawdoɗo.

¹⁴ Andek təbzeŋge na meleŋge dit en babarɗe pakə, zəgeɗ naddəv Gəla na Yawe pakgiti, zəgeɗ neŋgil ana məlĩ da gəm ɗiyi, yaŋ amil a Samari.

¹⁵ Madembirgit wəzeɗe na Yo'as, an agəɗə, də wəgay nan də Amatsiya, məlĩ na Yuda, məvertiŋ addəv ɗerewel na Wəza net milyeŋge na Israyel.

¹⁶ Yo'as zamə, məndəkni a Samari aweleŋgit milyeŋge na Israyel. Yerobo'am wətən dəgəm məlĩ a gəlani.

¹⁷ Amatsiya wətən Yo'as, məlĩ na Yuda, anziyək egge madaran, əzva kəlaw kiyən sle' dərɓaga əmta na Yo'as wətən Yohakaz, məlĩ na Israyel.

¹⁸ Madembərgit wəzeɗe na Amatsiya, məvertiŋ addəv ɗerewel na Wəza net milyeŋge na Yuda ɓa sa?

¹⁹ Mətuvuri yi wən akan a Yerusalem, ndən ɓak a Lakisi. Ndəɗaŋ slən ɗiy ammban a Lakis, abaynən adaka.

²⁰ Akanən aket pilseŋge, məndəkni a Yerusalem dit efiŋgiɗin, a walaŋgəla-metiŋ na Davit.

²¹ Ɗiy na Yuda pak agəmənək Azariya, aka tay də wəzva kəlaw kiyən sləre, aɗiynən aka məlĩ a gəla Amatsiya afəni.

²² Ndəni dərkan Eylat akkpaŋgan ka va na Yuda dərɓaga əmta na məlyã.

Yerobo'am II, məlĩ na Israyel

²³ Aka wəzva məkəlaw kiyən sle' na Amatsiya, wətən Yo'as, məlĩ na Yuda, Yerobo'am wətən Yo'as akkpaŋ məlĩ na Israyel a Samari, agəɗ wəzva kaklaw poɗo kiyən taka.

²⁴ Yaŋ agəɗ mbərayən a mahara Yawe; dədder səza mambray an Yerobo'am, wətən Nebat, atoŋgit ɗiy na Israyel addəvnəŋ ɓa.

²⁵ Amohũk kiyva na Israyel farəŋ pak təŋ sə Lebo-Hamat tek ŋgbusl a pehe na Araba, va əpel na Yawe Maŋgəlva na Israyel, anah də ma məskəleŋ nan Yonas wətən Amittay, məskəleŋ na Gad-Hefer.

²⁶ Yaŋ Yawe awla əzəmsahã na Israyel, əɓoŋ nan adayka; balam tay ɓa, ɗəf nakiyən tay ɓa, ya ɗəf nabbah sən Israyel maɓɓan tay ɓa.

²⁷ Yawe dənah navvuyon Israyel səka dəlvafuŋ ɓa. Də va Yerobo'am, wətən Yo'as akõhgiti.

²⁸ Madembərgit wəzeɗe na Yerobo'am, an agəɗə, də wəgay nan pak, akkpeŋgetik walaŋgəleɗe na Damas də Hamat, naka va na Yudaŋ sən Israyel, məvertiŋ addəv ɗerewel na Wəza net milyeŋge na Israyel ɓa sa?

²⁹ Yerobo'am zamə, azbetik efiŋgiɗin milyeŋge na Israyel. Zakarya, wətən dəgəm məlĩ a gəlani.