2Milyeŋge 13 - Bible en Guidar

Yohakaz, məlĩ na Israyel

¹ Aka əzva na Yo'as, wətən Akaziya aka məlĩ na Yuda makaklaw sula kiyən hoku, Yohakaz, wətən Yehu agəm məlĩ aka Israyel a Samari azəm məlĩ wəzva kəlaw kiyən buhul.

² Agəɗək mbərayən a mahara Yawe; azbanək mambray na Yerobo'am, wətən Nebat məs atoŋgit ɗiy na Israyel əɗɗa mambray dəndəni, dədder səkan ɓa.

³ Gədəv Yawe adək aka Israyel diyɗa, appanək ammba va Hazayel məlĩ na Aram gəm ammba va Ben-Hadad, wətən Hazayel pay pakə.

⁴ Vasna, Yohakaz azzayanək makra Yawe, Yawe aprəm sənəka, vi awlak əzəmsahã na Israyel məs məlĩ na Aram adawzəmgəni.

⁵ Yawe apsənək məzukõh sən Israyel; Mə Israyelɗe akõhoŋguk səmmba va Aram. Səza dəpaski mə Israyelɗe assoŋ a gizlirke anetda va lahəŋka.

⁶ Də as pak, dəddereŋ səza mambray na gəla na Yerobo'am, atoŋgit mə Israyelɗe əɗɗa mambray dəndənəŋ ɓa, ampanənək tilit addəvən ɓəlɓələ; gəm Astera tay ziwwe a Samari

⁷ Məzəlpaŋ tahəŋ dəppaŋ sənən Yohakaz, abbər kiyit məpeŋgeŋ pilseŋge kaklaw sle'i, mawteɗ nawgay kəlawə, gəm məzəlpaŋ mədawaŋ də tilit gabal kəlaw ɓa, vi meɓɓet pak məlĩ na Aram azetike: akkpeŋgetik va burɗuk nawndapani.

⁸ Madembirgit wəzeɗe na Yohakaz, en agəɗə dit zəgeɗ gugriɗ en agəɗ pak məvertiŋ addəv ɗerewel net milyeŋge na Israyel.

⁹ Yohakaz zamə, məndəkən a Samari. Yo'as, wətən dəgəm məlĩ a gəlani.

Yo'as, məlĩ na Israyel

¹⁰ Aka wəzva makaklaw hoku kiyən buhul na Yo'as aka məlĩ a Yuda, Yo'as, wətən Yohakaz, agəm məlĩ aka Israyel a Samari, azəm məlĩ wəzva, kəlaw kiyən sləre.

¹¹ Agəɗək mbərayən a mahara Yawe; dədder səza mambray na Yerobo'am wətən Nebat atoŋgit mə Israyelɗe addəvnəŋ ɓa, ampak tələn addəvən.

¹² Madembirgit wəzeɗe na Yo'as, agəɗ pak dit en meɓɓeti gəm də gurom nan agay də Amatsiya məlĩ na Yuda, məvertiŋ addəv ɗerewel net milyeŋge na Israyel ɓa sa?

¹³ Yo'as zamə, Yerobo'am asanək aka mazaŋga na məlĩ nani. Məndəkni Yo'as a Samari azet milyeŋge na Israyel.

Kəleŋ na Elisa an bayma

¹⁴ Elisa azəgək gbəgba' nawbayni. Yo'as məlĩ na Israyel, ambatək azani, ahəmək akan ɓe'e, amna: «Əbba! Əbba! Is kaka', gba mawteɗ dit pilseŋge nawgay na Israyel kənani!»

¹⁵ Elisa anah sən na: «Agəm bəle dit herɗe!» Yas Yo'as agəm bəle dit herɗe.

¹⁶ Elisa anah sən məlĩ na Israyel na: «Anslin bəle!», Ndən te' ənslinin. Elisa aɗi van aka va məlyã,

¹⁷ yaŋ amna: «Akol ma təkifoŋgo na kəlammba pay nampum!» Yo'as kol əkolən. Elisa anah sən na: «Ahõni!», Ndən pa' əhõni. Elisa amna: «Har naska wəla na Yawe yi, har naska wəlet mə Aramɗe yi. Wakərbə sit mə Aramɗe a Afek, hã kakãh əzeti.»

¹⁸ Yaŋ amna: «Ande herɗe!» Ndən hãs əndeti. Aɓsən məlĩ na Israyel na: «Arga dəlva afuŋ!» Ndən du'du' təl hoku, ziwi.

¹⁹ Ɗəf na Maŋgəlva nak adək gədəv akani, amna: «Va kərgak təl sle' may sləre kəta na, wakəbay Aram hã mbo' əzan kakãhə. Kakaŋ na, təl hoku kədaska wəlan kaka'ə.»

²⁰ Elisa zamə, məndəkni yi. Ya ama wəzva pak ngaɓa net məzəlpaŋ na Mo'ab əzzoŋ ətoŋgoŋ aka dələv na Israyel.

²¹ Aka ɗiy adawndəkaŋ ɗəfa, awlaŋ ngaɓa net məzəlpaŋgə, ndəɗaŋ ɗəf nak firik əzgan addəv magamas na Elisa, ndəɗaŋ teki. Səza ɗəf nak ane' azet sleŋsleŋɗe na Elisa; ndən mbəl le' ziw aka təlni.

Əska wəla aket mə Aramɗe

²² Pay ənziya na Yohakaz egge, Hazayel, məlĩ na Aram asərək ma Israyel pay pakə.

²³ Yaŋ Yawe agəɗ sit moggoni, awla sasẽhti, akkpaŋgək azet vi wənmiyna nan də Abraham, də Isak gəm də Yakob; dəŋgəl əzet kakãh ɓa: hã kakaŋka dəzget faraɗa sə maharan ɓa.

²⁴ Hazayel, məlĩ na Aram zamə, Ben-Hadad wətəni dəgəm məlĩ a gəlani.

²⁵ Yo'as, wətən Yohakaz, amohĩk walaŋgəleɗe gugriɗ en Ben-Hadad wətən Hazayel amõh lahəŋ səva Yohakaz, afəni. Yo'as, askak wəla Ben-Hadad təl hoku, amndegetik walaŋgəleɗe na Israyel pakgiti.