2Milyeŋge 12 - Bible en Guidar

Yo'as, məlĩ na Yuda

¹ Yo'as tay də wəzva buhul gala akkpaŋ məlyã.

² Addəv əzva mabuhulon na Yehu aka məlĩ yi Yo'as akkpaŋ məlyã, wəzva kaklaw poɗo azəm məlĩ a Yerusalem. Iya nat man na, Sibiya na Ber-Seba.

³ Yo'as agəɗək zəga moggon a mahara Yawe pay ənziya nan egge pakə, vi məsdələv Yoyada dəyagan səni.

⁴ Gəleɗe-nettuyeŋge dəzaŋ gərak ɓa hara; ɗiy tahəŋ əzaɓaŋ-Maŋgəlva də wəzla tursan addivit gəleɗe-nettuyeŋge.

Yo'as tay ərkan gəla na Maŋgəlva

⁵ Yo'as aɓsit məsdəlveŋge na: «Koɓeɗ net zəgeɗ salala pak məs adawkiyaŋ addəv gəla na Yawe, koɓeɗ en dədaɗɗaŋ wəza, nzalaka naka ərəh na ɗəfa, dit koɓeɗ en ɗəf aɗɗum də makran aki addəv Gəla na Yawe,

⁶ məsdəlveŋge dəndenin ka neti, naway pak səvet ɗiy en asənə, net dəzaɓanən təki dəpɗak naza Gəla a təki asan pakə.»

⁷ Ya hã gap wəzva na məlĩ Yo'as kaklaw sula kiyən hoku, məsdəlveŋge nek dəzaɓanən təki dəpɗak temtem naza Gəla nak ɓa.

⁸ Məlĩ Yo'as dah iya məsdələv Yoyada, dit məsdəlveŋge meɓɓeti, aɓsit na: «Vimi kəzaɓanən Gəla dəpɗak nak ɓa di? Təŋ səza dəpaŋka, kədawtafaŋ koɓo səvet masənkeɗ nokum əmpa ɓa, vi sən Gəla dəpɗak kədawɗiynəni.»

⁹ Məsdəlveŋge atafənək adawtafnən koɓo səvet ɗiy ɓa, may adassoŋ nawzaɓan Gəla dəpɗakəŋ ɓa.

¹⁰ Məsdələv Yoyada gəm akoti, ndən vov ɓap aka mani, ta' əɗiyin a maŋgava gəlamatuya dəka dəzəŋ, də təki ɗiy adawtoŋgoŋ addəv Gəla na Yawe, məsdəlveŋge məgaŋ ma tive əziynin koɓeɗ məkiyit addəv Gəla na Yawe pak addəvən.

¹¹ An awleninik koɓeɗ akkalaŋgək diyɗa addəv akoti naka, məzuver na məlĩ də daya net məsdəlveŋge, əndenin əŋɗet koɓeɗ naddəv Gəla na Yawe neki.

¹² Ndəɗaŋ əpsitin koɓeɗ nek avet məzulanən wəza nawzaɓan Gəla na Yawe, ɗiy məs mipsit wəza na Gəla van avet əfaɗ sitin məntaraŋ wəleŋɗe, məzərkanən gəm məzəɗɗanən wəza na Gəla na Yawe,

¹³ net mərkaŋ gəla dit məslmetin gərmeŋge gəm kalbih wəleŋɗe dit gərmeŋge məslmeti, kawzaɓan təki dəpɗak aza Gəla na Yawe, də an dədawgilyen nawzaɓan Gəla van pakə.

¹⁴ Ya vi gəla na Yawe na, məɗɗay ŋgefleŋɗe na təbəz babar ɓa, slohõŋɗe ɓa, hiliŋgiɗ ɓa, gozloreɗ ɓa, zəga na təbəz tay məɗɗan dit koɓeɗ məkiyit addəv Gəla na Yawe eŋ ɓa.

¹⁵ Sit məzuganən wəza adapsitini, ndəɗaŋ əzaɓan Gəla na Yawe dənɗaŋgə.

¹⁶ Ɗəf tay məzəɗɗum nassohõn wən net koɓeɗis a met məgaŋ wəzaŋ ɓa, vi tay əɗɗanən wəza net təstəsə.

¹⁷ Koɓeɗ nawzaɓ-Maŋgəlva nawzaɓan wəna dit en nawzaɓ-Maŋgəlva naskoɓ mambraya, net məkiyti addəv Gəla na Yawe ɓa; net sit məsdəlveŋge.

Wəbayma əzəm məlĩ na Yo'as

¹⁸ Hazayel, məlĩ na Aram, ambatək əgay də Gat, amohũko. Hazayel aziyək haran kadda əgay də Yerusalem.

¹⁹ Yo'as, məlĩ na Yuda, agimik zəgeɗ en may efiŋgiɗin Yosafat, Yoram, Akaziya, milyeŋge na Yuda, aɗiyaŋ ta' sən Yawe dit en ndən sən kiyən aɗi ta', meleŋge naddəv Gəla na Yawe də an naddəv gəla na məlĩ pak aslin sənək Hazayel məlĩ na Aram, yas al ɓa' səza Yerusalem.

²⁰ Madembirgit wəzeɗe na Yo'as, an agəɗ pak məvertiŋ addəv ɗerewel na Wəza net milyeŋge na Yuda ɓa sa?

²¹ Gewleɗ nan asilgənənək wəna, atuvuroŋguk wən tuvur tuvuru. Abaynən Yo'as a Bet-Millo aka tay ipriken a Silla.

²² Gewləɗ nan, may Yozabad, wətən Sime'at, gəm Yehozabad, wətən Somer, dəbaynən amtə. Andəknən dit efiŋgiɗin a walaŋgəla-metiŋ na Davit. Amatsiya, wətən dəgəm məlĩ a gəlani.