2Milyeŋge 11 - Bible en Guidar

Atali tat əmõh məlĩ a Yerusalem

¹ Səza Atali, ma Akaziya tula na, wətət amtəka, ndət le' mbo' mbo' əzan zev məlĩ beymeti.

² Yehoseba wətən məlĩ Yoram, məlmən Akaziya, təgəmək Yo'as wətən Akaziya, təgəm sə weleŋgit kirtin məlĩ nawbay kəta, təɗi dət ɗak məzəzgələn addəv gəla net zəgeɗ nawvoŋgo: aɗamanənək sə maharat Atali, tərah əbayən ɓa.

³ Asanək dət ɗak məzəzgələn addəv gəla na Yawe, wəzva sləre haɗamma, nat Atali tat əzəm məlĩ aka dəlva.

Əɗi Yo'as aka məlyã

⁴ Wəzva məbuhuloni, Yoyada slən əkeyet deyeɗe naket məgaŋ məlĩ səkat səkatɗe naret mə Kariɗe pak dit en məzənzoŋgu, məkiyit go'o azan addəv Gəla na Yawe. Aziwginək wənmiyna dənɗaŋ gəm aswaygitik addəv Gəla na Yawe, sissiŋ arban sit wətən məlĩ vani.

⁵ Yaŋ aɗi sit wən nani, amna: «An kədaɗɗaŋ yaŋka: kuɗakaŋgən gəlan hoku, gəlan taka dədaɗɗa wəza pay naffete, nawga gəla na məlyã,

⁶ gəlan masula'ən, dəziwgən ama maddamba na Sur, gəlan mahoko'ən tamə, dəziwgən ama maddamba dərɓeget məzənzoŋgu, kəddəɗanəngən zukum əga Gəla na məlyã.

⁷ Uɗak nokum gəlan sula məs tahəŋ də wəza pay naffet ɓa, dəganəngən Gəla na Yawe, a maŋgava məlyã.

⁸ Kəssoŋgən ki məlĩ tərwəslə, naway pak də zəgeɗ nalpa nan avani. Ɗəf dəde dəza wədor nokum pak məbay zamə. Məssoŋ də məlĩ va agili gəm va adawtoŋ pakə.»

⁹ Yaŋ deyeɗe net səkatɗe aɗɗanən va Yoyada məsdələv aɗi sit wən nan pakə. Daya pak andek ɗiy nani, məs dədaɗɗaŋ wəza pay naffete, en məzəprikeŋ səmani, addoŋ aza məsdələv Yoyada.

¹⁰ Məsdələv apsitik tulhẽŋge dit gulomɗe na məlĩ Davit naddəv Gəla na Yawe sit deyeɗe net məzəlpaŋ səkat pakə.

¹¹ Məzugaɗe pak zəgeɗ nalpa net avet kãwə, aziweŋ aka va dəzəŋ gap dəka va zlaɓay na Gəla, go'o də gəlamatuya gəm Gəla na Maŋgəlva, vi kawtərwəsl məlĩ addak təkiya.

¹² Yaŋ agilgin wətən məlĩ naka, aɗup sən kulpupu na məlĩ dit zəgeɗ narban məlyã. Məɗini ka məlyã, məpesl səni mẽl akani, sissiŋ arganən veti, aɓɗaŋ na: «Məlĩ dəsan hã faɗə!»

¹³ Atali təprəmək gogoyo net ɗiy məzəzzoŋ dənze; ndət mbat azet ɗiy addəv Gəla na Yawe.

¹⁴ Ndət təm na: məlĩ yaŋ ziwwe aka təki məzaɓən a disiŋ va ɗaɗayə; deyeɗe dit ɗiy məffoŋ gozloreɗ tahəŋ go'o də məlyã, ɗəf titir naka dələv nan pak tay ənneken zəni gəm əffon gozloro yaŋ Atali təŋgeret lukutɗe nata, təŋgəslək vaŋvəl na: «Ətuvur wəni yi! Ətuvur wəni yi!»

¹⁵ Məsdələv Yoyada, aɗi wən nan sit deyeɗe net məzəlpaŋ səkat pak də wənah sit na: «Məgilgət səka wədoro! Ɗəf an dəzbat pak kawbayni də masalam!» Vi məsdələv anah na: «Adawbaytən addəv Gəla na Yawe ɓa.»

¹⁶ Armətənka, akətənək eŋgil ana məlĩ da də təki pilseŋge adawtoŋgoŋgu, adaki məbayta.

¹⁷ Məsdələv Yoyada, aziwgənək wənmiyna a walaŋ Yawe də məlyã gəm ɗiy, vi dəssoŋgən ka ɗiy na Yawe; gəm a walaŋ məlĩ dit ɗiy.

¹⁸ Ɗiy naka dələv nan pak addoŋguk addəv gəla na Ba'al, aɓzlunənka, akrepin gəla matuyaɗe gəm zeŋgilet meŋgilveɗ nan tutu', abayən Matan məsdələv na Ba'al, abet gəla matuyaɗe. Yaŋ məsdələv Yoyada aɗi məgaŋ Gəla na Yawe,

¹⁹ ndəni ande deyeɗe net səkatɗe gəm mə Kariɗe pakə, məgaŋ məlĩ məwele, məgaŋ gəla na məlyã gəm ɗiy naka dələv nan pakə; aprikginənək məlĩ səddəv gəla na Yawe də maddamba net məgaŋ gəla na məlyã atoŋgoŋ addəv gəla na məlyã. Yo'as, asanək aka mazaŋga net milyeŋge.

²⁰ Ɗiy naka dələv nan pak zit anneke. Walaŋgəla-metiŋ asanək addəv zazaya. Atali na, nat məbayti də masalam addəv gəla məlyã.