2Milyeŋge 10 - Bible en Guidar

Va məbey ɗiy neŋgil ana Akab da

¹ Akab tay dit kirin mezeŋgleket kaklaw buhul a Samari. Yehu aver ɗerewelɗe, aslin azet deyeɗe na Samari, ɗiy məsɓeti gəm məzuɓeygitin kirtin Akab, dawnəh na:

² «Əgap na ɗereweləs azokum ləŋgə, adan kirtin daya nokum tahəŋ də mənokum gəm mawteɗ nawgaya, pilseŋge, walaŋgəla-metiŋ na korgu gəm zəgeɗ nawgaya,

³ Kulaŋgən an məs maɗɗula, məprəm ma təstəs səret kirtin daya nokum, kəɗinəngən aka mazaŋga na afəni, sissiŋ məgay ammba gəla na daya nokum.»

⁴ Ageslne'eŋgik diyɗa, aɓɗaŋ na: «Milyeŋge sula dəziweŋ aban ɓa, vasna mbarmbari mədawziw aban dərəŋ di?»

⁵ Daya naka gəla na məlyã, daya naka walaŋgəla-metiŋ, ɗiy məsɓeti gəm məzuɓeygitin kirtin məlĩ pakgiti, aslənaŋgək ənah sən Yehu na: «Belemɗe nok mənani, va kənah pak waməɗɗa. Məɗi na məlĩ maɓɓan ɓa. An kəwəl lew naɗɗa a mahorok pak aɗɗa.»

⁶ Ndən ver sit ɗerewel masulan əmpa dawnəh na: «An naw kənanəni, an wakəprəmən mawa, asna məgim kirtin məlĩ en kiwən pakə, mərsla kiyti, mazayin va kakaŋkəŋ na, miki su a Yizrel.» Kirtin məlĩ kaklaw buhuliŋ, muwɗeketiŋ anet ɗiy gugriɗ na walaŋgəla-metiŋ da, en məzuɓeygitini.

⁷ Adan ɗiy gugriɗ arihnin ɗerewelɗeski, andennik kirtin məlyã, arslanən kiyit ɗiy kaklaw buhul, akkpuɓnin kiyit addivit kəggəlɗe, aslin sənən a Yizrel.

⁸ Maslən adek ənah sən na, məkiytiŋ kiyit kirtin məlĩ neki. Yehu nak amna: «Məggbe' gəlet sula ama tive nawtoŋ a walaŋgəla-metiŋ hã ka pummo!»

⁹ Də pummo ndən vit ziw abet ɗiyi, anah sit na: «Kəɗɗaŋ mbərayən ɓa! Intə nətuvur wən aka daya naw nəbaya; ya eŋkiŋ pak naway dəbey di?

¹⁰ Məsən na, wəpel na Yawe tay dədawbətan afuŋ ɓa, an Yawe apel də ma gawla nan Eliya, aka gəla na Akab, anan Yawe agəɗə.»

¹¹ Yehu, abeyik ɗiy na Akab en dəppaŋ mederet sə Yizrel pakə, masənkeɗ nan dit məsdəlveŋge nan pak məza mbək sən madaran təttaka ɓa.

Tay əŋgroɓin deyeɗe na Yuda

¹² Ndən le' tive na Samari kawə. Tay aka tive a Bet-Eked-net-məzutəɗeŋɗe,

¹³ Yaŋ Yehu arih milmiŋgiɗ Akaziya, məlĩ na Yuda. Amna: «May nawa kənanən di?» Aɓɗaŋ na: «Milmiŋgiɗ Akaziya mənani. Wədasɗet kirtin məlĩ, mədaddamə gəm kirtət ma'ãykə.»

¹⁴ Amna: «Mərme medereti!» Armeninik mederet vaska, arslanən kiyit gəm azgetin addəv vov na Bet-Eked. Kaklaw poɗo kiyit sulaŋgə; ɗəf təttaka səmmbet tay dəkõh ɓa.

Yehu tay ələmsən Yonadab

¹⁵ Ndən sədak gas ərəh Yonadab wətən Rekab, məzəzzan abani. Yehu səɗ əsɗani, amna: «Mokrok bari də in va naw də is sa?» Yonadab azlan sən na: «Ha'aw!» Yaŋ anah sən əmpa na «An mestakay yi na, arma səm vamə.» Yonadab van təl səni. Yaŋ Yehu apeŋgin a maŋgavan aka mawta nani,

¹⁶ amna: «Ade də in, kulagən əŋgla naw də kotorok ammban vi Yawe!» Apeŋgeŋgik matak addəv mawta nawgay nani.

¹⁷ Agap a Samari, abey medembirgit kirtin Akab sə Samari, azet pak va Yawe anah sən Eliya.

Yehu tay əbay wən na əzaɓ-Maŋgəlva sən Ba'al

¹⁸ Yehu kakelgit ɗiy pakə, aɓsit na: «Akab dəgagdakan Ba'al tektek ɓa, Yehu nan wagagdakan diyɗa.

¹⁹ Kakaŋ na, miye su məskəleŋɗe na Ba'al, məzəɗɗaŋ sənən wəza gəm məsdəlveŋge nan pakgiti, ɗəf adawbew ɓa, vi maw aka əzaɓ-Maŋgəlva gədak sən Ba'al. Ɗəf an dəbew na, asan na madaran ɓa.» Mbara pepet Yehu agəɗ vi kawzet məɗɗaŋ wəza sən Ba'al.

²⁰ Yehu amna: «Məyə əkkal na pay vi Ba'al!» Mətəli ma nakkala,

²¹ Yehu aslənək maslənɗe aka dələv na Israyel pakə. Məgdukoŋ sənən Ba'al pak azzoŋko; ɗəf tay dəbew dəde ɓa ɓa. Ndəɗaŋ toŋ addəv gəla na Ba'al, gəla aknahək mbefi.

²² Yehu aɓsən ɗəf mərəm lukutɗe na wəza na: «Agilgit lukutɗe, apsit məɗɗaŋ wəza na Ba'al dəwən neti!» Ndən vit git sit lukutɗe neki.

²³ Yehu pay də Yonadab, wətən Rekab addəv gəla na Ba'al. Anah sit məɗɗaŋ wəza na Ba'al na: «Məkayani, məsəŋglani, məɗɗaŋ wəza na Yawe adassoŋ arokum aŋ ɓa, vi dəsangən na ɗiy məɗɗaŋ wəza na Ba'aləŋ kaka'ə.»

²⁴ Ndəɗaŋ toŋ kawzaɓ-Maŋgəlva gəm əvəl nawzla kurmbuɗuku. Mbara Yehu aziyik zel kaklaw dodopoɗo appaka, anah sit na: «An ɗəf sərokum apələk ɗəf təttaka əkõh səret ɗiy en nəpəl avokumiŋki, zeŋgileni a gəla zeŋgile ɗəf vani.»

²⁵ Səza aggraknən əɗɗa əvəl nawzla kurmbuɗuku, Yehu anah sit məgaɗe dit mərmaŋ barayɗe na: «Mətoŋ məbeye, təttaka dayday adawkõh ɓa!» Abəletinik də masalam. Dərɓaga andoltin a maksaf, məgaɗe dit mərmaŋ barayɗe, amndoŋ a walaŋgəla-metiŋ, a təki gəla na Ba'al asani;

²⁶ yaŋ agilginin serek səddəv gəla na Ba'al, azlanəni.

²⁷ Yaŋ akrapnən serek na Ba'al naka, aɓzlunən gəla na Ba'al zəknani, arkaŋ manzləra, tay adak hã pay dəpaŋka.

Yehu, məlĩ na Israyel

²⁸ Yehu azanək Ba'al sə Israyel.

²⁹ Hara na Yehu dəppan əzban zəv mambray na Yerobo'am, wətən Nebat, atoŋgit mə Israyelɗe əɗɗa mambray dəndəŋ ɓa: kirtit wasliɗe na meleŋge en na Betel dit en na Dan.

³⁰ Yawe anah sən Yehu na: «Vi an kəgəɗəŋ moggoni, təstəs kəɗɗa a maharawa, an na makraw kəgəɗ aka gəla na Akab, kirtuk wassoŋ aka məlĩ na Israyel, gap seyit dihiŋgiɗuk poɗo.»

³¹ Ya Yehu dəzban mahenziŋ na Yawe Maŋgəlva na Israyel də makran taka ɓa, dədder səza mambray an Yerobo'am atoŋgit mə Israyelɗe addəvnəŋ ɓa.

³² Gala dəpaski, Yawe atəŋ ərras dələv na Israyel. Hazayel arbə sit səket meŋgeɗe na Israyel pakə.

³³ Təŋ səma Yurden, səmmba pay nampum, dələv na Galad dəwənnani, dəlveŋge na Gad, na zev Ruben də an na zev Manase. Sə Arower nakat lolohõk na Arnon hã gap Galad də Basan.

³⁴ Madembirgit wəzeɗe na Yehu, an agəɗə gəm wəzeɗe gugriɗ məs agəɗ pak məvertiŋ addəv ɗerewel na Wəza net milyeŋge na Israyel ɓa sa?

³⁵ Yehu amtəka, andəknənək a Samari. Yohakaz, wətən dəgəm məlĩ a gəlani.

³⁶ Yehu azəmək məlĩ aka Israyel, əzva kaklaw sula kiyən dodopoɗo a Samari.