2Milyeŋge 1 - Bible en Guidar

Uɗak na dəlva ( 1:1—17:41 ) Məskəleŋ Elisa 1:1—8:15 Maŋgəlva tay ətawwən aka ədaw na Akaziya

¹ Yaŋ Mo'ab aɓoŋ aka Israyel dərɓaga əmta na Akab.

² Akaziya abətək səket ɓeɓeleɗ naddəv gəla nan məzarŋgasla na Samari, argək diyɗa sawɓa. Aslən maslənɗe, yaŋ aɓsit na: Məddoŋ məssõhõn su Ba'al-Zebub, maŋgəlva na Ekron, kawsənən an wanəmbəl səka gbəgba'əŋka.

³ Yaŋ maslay na Yawe, anah sən Eliya mə Tisbe na: «Asil dok ələmsit maslənɗe na məlĩ na Samari, anah sit na: “Vasna Maŋgəlva tay a Israyel ɓa yi, hara kəddoŋgən əska həlik aza Ba'al-Zebub maŋgəlva na Ekron əŋ sa?

⁴ Ya vini Yawe anah vaŋka: Zəga nawvoŋ kəsok akanəŋka, kəsil na səkan ɓa, vi sessel wakəmtə zamə”!» Yaŋ Eliya ambatə.

⁵ Maslənɗe nek buryok aza məlyã, yaŋ assohẽt na: «Vimi kəmilyoŋ di?»

⁶ Azlan sənən na: «Ɗəf adek ələm səmə, amna: Məmndoŋ məddoŋ aza məlĩ məs dəslənkum kənah sənəngən na: An Yawe anah yaŋka: Vasna Maŋgəlva tay a Israyel ɓa yi ka kəsləngən əssohõn Ba'al-Zebub maŋgəlva na Ekron əŋ sa? Vi askəska kəsil na səka zəga nawvoŋ məs kəsok akanəs ɓa, wakəmtə.»

⁷ Yaŋ aɓsit na: «Mbarmbari ɗəf dəde ələm sukum van gəm dəpel sukum wən vaskəs di?»

⁸ Aɓsənən na: «Ɗəf də lukut na deɓeke azani, miynan dadakan də kətu.» Yaŋ amna: «Eliya na Tisbe yi!»

Akaziya ayaganək ərma Eliya

⁹ Məlĩ Akaziya aslən daya na ŋgaɓa net məzəlpaŋ kaklaw sle' dit məzəlpaŋ nan kaklaw sle'i. Ndən peŋ azani, tay ɗewwe aka dadwar ki mossorgo metiŋ, yaŋ aɓsən na: «Ɗəf na Maŋgəlva, məlĩ amnah: Apriki!»

¹⁰ Yaŋ Eliya azlani, aɓsən daya net kaklaw sle' naka: «An ɗəf na Maŋgəlva nan na, offo dəprik sə disiŋ dəzəmuk dit ɗiy nok kaklaw sle'iŋki!» Offo pirik sə disiŋ azla ndən dit məzəlpaŋ nan kaklaw sle'i.

¹¹ Ndən həmndak slən daya net kaklaw sle' maɓɓan dit ɗiy nan kalaw sle' azani; yaŋ agəm əpele, aɓsən na: «Ɗəf na Maŋgəlva, an məlĩ anah yaŋka: Agəm zuk apriki!»

¹² Yaŋ Eliya azlani, aɓsən daya net kaklaw sle' naka: «An ɗəf na Maŋgəlva nan na, offo dəprik sə disiŋ dəzəmuk dit ɗiy nok kaklaw sle'iŋki!» Offo na Maŋgəlva apirik sə disiŋ azla ndən dit məzəlpaŋ nan kaklaw sle'i.

¹³ Amndan əslən daya net kaklaw sle' mahoko'o dit ɗiy nan kaklaw sle'i. Yaŋ daya net kaklaw mohoko'o nak apeŋ azani, ndən guduk aba Eliya akkaman dawnah sən na: «Ɗəf na Maŋgəlva, kamə kəta zeŋgilew də an net ɗiy kaklaw sle gewleɗ nokiŋ dəwəl a mahorok va zəga moggoni!

¹⁴ Offo aprikik sə disiŋ azlek deyeɗe net kaklaw sle' maddaabəŋ sula dit ɗiy neti, ya kakaŋ na, zeŋgilew dəwəl a mahorok va zəga moggoni!»

¹⁵ Maslay na Yawe aɓsən Eliya na: «Aprik dəndəni kəgeslne' viyən ɓa.» Ndən le' pirik dəndən aza məlyã,

¹⁶ yaŋ apel sən na: «An Yawe anah yaŋka: Kəslin maslənɗe aza Ba'al-Zebub maŋgəlva na Ekron əska helik na, Maŋgəlva tay a Israyel nadda əssõh man ɓa yi sa? An vaski na, kəsil na səka zəga nawvoŋ məs kəsok akanəs ɓa, wakəmtə zamə!»

¹⁷ Yaŋ amtə va əpel na Yawe anah də ma Eliya. Adan wətən tay ɓa, Yoram dəzəm məlĩ a gəlani, aka əzva masulan na Yoram, wətən Yosafat, məlĩ na Yuda.

¹⁸ Medembirgit wəzeɗe na Akaziya en agəɗə, məvertiŋ addəv ɗerewel məzupel aket milyeŋge na Israyel ɓa sa?