2Korintus 9 - Bible en Guidar

Əbbah viyit məzutafaŋgə

¹ Aka an dəwəl sən əbbah sit ɗiy salala na, wəray tay nawver sukum ɓa.

² Vi nəsənək əŋgla nokum. Nəɗiyək kikum abet ɗiy na Makedoniya dawnah sit na: Ɗiy na Akaya aslanək zit far na dəbyaŋga. Zukum məs kəsokoŋgəŋ afɗahanək vadaysa net ɗiy na Maŋgəlva.

³ Nəslin sukumək milmiŋgiɗmə, vi kikum məs məɗiyəŋ aka wənəs adawsan ɗar mekeleŋ ɓa. Vi kəssoŋgən məsla zukum va nənahə.

⁴ Vi an ɗiy na Makedoniya alhawənək na adawrəhkumən məza kəslanən zukum ɓa ɓa, ka adassan zəga net wil akam ɓa, va ənəh na wil nokum!

⁵ Nulak kan na, aslək nəhheɗetgin milmiŋgiɗmə vi dəddoŋgən daabəŋ kiyu anokumda, dəkkalanəngən əvəl nokum kinaŋ naɗɗa, vi dəsangən məkkalan ləŋgə va əvəl də mokrokum taka məza də mokrokum sula sula ɓa.

⁶ Məɗɗumon na: Ɗəf məs dəslgə siɗikke, siɗikke adawbəla, ɗəf məs dəslgə diyɗa, diyɗa adawbəla.

⁷ Naway pak dəɗi va aynan a makrani, məza də əɓuh mani awaniɓa na gagay ɓa. Vi Maŋgəlva ɗəf an məzəpsən də ənnek adaŋgla.

⁸ Maŋgəlva waɓap əknahkum də mbəlembəle nan temtemi, vi kəssoŋgən də zəga məs dəslə pak pay pakə, kərahaŋgən diyɗa əmpa naɗɗa wəza moggoni.

⁹ Va məver na: Awɗakəka, apsit məzurayɗe. Təstəs nan wasan hã faɗə.

¹⁰ Ndəni məzəpsən zeŋve sən məzəslga gəm way ka zəga nawzəma, wapsukum zeŋve, wawan zeŋve nokum, waɓaygən wəza na təstəs nokum.

¹¹ Wakəssoŋ məsaryeɗ na zəga pak də əvəl temtem məs nawpeŋginin əɗɗa soko sən Maŋgəlva sə kəlazamə.

¹² Vi wəza na əbbahəs wəray net ɗiy salala adaɗɗa kaka ɓa, waki əfet diyɗa aka Maŋgəlva'e.

¹³ Də ula wəza moggon nokuməska, wagagdakanən Maŋgəlva vi əɓe' nokum məs kədarbaŋ dawɓe' sən Alabara Nenek na Kristu gəm əvəl nokum məs kəsapaŋ dənɗaŋ gəm dit ɗiy pakə.

¹⁴ Ya net warbanən əŋgla net də əkkam zit soksok ammbokum vi mbəlembəle məs Maŋgəlva apsukum diyɗaŋka.

¹⁵ Soko sən Maŋgəlva vi əvəl nan məs nawpeli ɓa.