2Korintus 8 - Bible en Guidar

Əvəl sit məkristuɗe na Yuda ( 8:1—9:15 ) Əvəl də makra taka

¹ Milmiŋgiɗmə, mam aka ərban sukum wən na mbəlembəle məs Maŋgəlva agəɗ a waleŋgit məzutafaŋ na Makedoniya.

² Də məslet dit tatwãhɗe temtem zlaŋ, ənnek net diyɗa də sahã net diyɗaŋ awanək arya na əvəl də makret taka.

³ Va aza ərəh neti, anəziw aka wən nani, aɗiyaŋgək də əŋgla net day ki ərəh neti.

⁴ Akkamamənək diyɗa də əssohom tive nawsap əɗɗa wəza ammbet ɗiy na Maŋgəlva.

⁵ Adayək ki an məɗɗum səni. Də əŋgla na Maŋgəlva, appanənək zit daabəŋ sən Daya siske səmə.

⁶ Vini məhhaɗan Titus dəgrakangən wəza na əvəl də makra taka van a nokumda va atəŋga.

⁷ Adan mənokum tat də zəga pak ɗiyɗa diyɗa, ətafa, əsən əpele, əsəna, əsok zukum gəm əŋgla məs məsilgin a walaŋkum na, məssoŋ dayə'e addəv əvəl də makra takaŋka.

⁸ Kaska wəlokumi nədawnəh vaskəs ɓa, də alabara na əsok zə ɗəf net ɗiy meɓɓet nədaŋgla əsla gegesiŋ na əŋgla nokum.

⁹ Vi kəsənənək mbəlembəle na Daya nam Yesu Kristu: Də asan məsarya zlaŋ, aɗiyək zən va məs sahã vi wən nokum, vi kakkpaŋgokum məsaryeɗ də sahã nani.

¹⁰ Ya əɗɗum naw nədawnəh aka wənəska, vi watər azokum, əɗɗa kəɗɗani kaka ɓa, mənokum tat də əŋgla nani, kətəŋnən na dabyaŋga səkayə.

¹¹ Kakaŋ na məkgrakan əɗɗani, vi əgrak na an kiynaŋ naɗɗa dəsləgən də əŋgla nanə'e va aza ərəh nokum.

¹² Vi an əsok zə ɗəf tay, wataf də ula an navamə məza ula an tay avam ɓa ɓa.

¹³ Vi kəssoŋgən addəv tatwãh ka ɗiy mbirit dənnekeŋgini ɓa, vi zəga van dəlgən dakadakay.

¹⁴ Addəv pay an kakaŋkəŋ na, meŋgesl ərah nokum wabbah sit en məs də wəraya, vi meŋgesl ərah net tam dəbbah sukumgən pay kəssoŋ də wəraya, dəsangən dakadaka.

¹⁵ Va məver na: Ɗəf an dəkkal diyɗa, dərah day ɓa. Məs dəkkal siɗɗike, tay dəkkpap sən ɓa.

Titus dit beyneŋgiɗin

¹⁶ Soko sən Maŋgəlva məs dəpsən əsok zə ɗəf sən Titus məstaka də an nam vikum.

¹⁷ Atafək an məɗɗumu, an dədayki əsok zən əmpa na, ambatək də əŋgla nan anokumda.

¹⁸ Məslən məlməm məs ɗiy na məzutafaŋ pak adagagdakanən vi wəza na Alabara Nenek məs adarban dəndəni.

¹⁹ Aski kaka ɓa, ya məzutafaŋ awelinke'e, ka dəlhamgən a malaka də wəza nawvəl də makra taka məs məppan səm wəza nan ammba gagdak na Daya zək nani, gəm karban va məsok zəmə.

²⁰ Mənam tat əzi zəmə, vi ɗəf adawzelen wəza məgəɗ dit koɓeɗ məkkelit gbeŋ mipsim avaməŋ ɓa.

²¹ Vi nam mənam tat əzga sləma aka əɗɗa zəga moggon ama hara Daya kaka ɓa, ama heret ɗiy pakə'e yi.

²² Məslənək məlməm maɓɓan dənɗaŋ, məs məsla nazan dit zəgeɗ temtemi, ɗəf məsok zən pay pakə. Kakaŋ na tay əsok zən dayki lahəŋka, vi appanək əɗɗum nan gərak akokum.

²³ Titus na, ɗəf məs mədabbal gəm mədaɗɗa wəza dəndən vikumi. Məlmiŋgiɗəm dəddoŋ dəndən tamə, maslənɗe net məzutafaŋgəŋgə, gagdak na Kristu wəŋ.

²⁴ Mərban sit əŋgla nokum. Asna kikum mədawɗi abetəŋ warbə ama heret məzutafaŋ pak na gesiŋgi.