2Korintus 7 - Bible en Guidar

¹ Adan mənam tat də iynama vas na bayneŋgiɗwa, məbbur səm zəm səza ərnok na gəɓa zəm də an na əmpəs pakə, məsok səm zəm əssa salala gərrak addəv geslne na Maŋgəlva.

Ənnek na Pol

² Məpəl səm təki a mokrokum, ɗəf taka tay məgəɗ sən mbərayən ɓa, ɗəf taka tay məzan ɓa, ɗəf taka tay məppət ɓa.

³ Nədawnah vas na kawtaw wən akokumi ɓa, vi nənahək səkay na, mənokum tat a makramə, vi məsamgən matakə addəv əmta gəm addəv zeŋgile.

⁴ Nəppanək makraw gərak akokum, ənnek naw diyɗa yi vikum, makraw affetke, nəknahək də ənnek diyɗa addəv əzəm sahã namə.

⁵ Vi səza əgap nam a Makedoniya, ɗəf tay dərah əffeten zən ɓa. Məsərni mam də tive temtemi, dəppaka, əgaya; diŋgili, geslne.

⁶ Ya Maŋgəlva məzuɓətgit ɗiy aɓətgəmək də əgap na Titus.

⁷ Də əgap nani kaka ɓa, də ɓəɓəl məs arah səzokumə'e: aboton səmək əŋgla nokum vakvakə, əhəm nokum, əsok zukum ammbawa, avayək ənnek hã dayə.

⁸ Vi an nəssahan sukumuk zukum də letər nawa, nəkkpaŋgan na maw ɓa, ya an nəkkpaŋganək mawa, vi in tat ulan na, letərəŋ assahan sukumuk zukum pay siɗikke.

⁹ Ya kakaŋ na, in tat ənneken zuwa, məza vi məssahan sukum zukumi ɓa, vi məssahan sukum zukum kəɗiyaŋ marava yi. Məssahan sukumi zukum va Maŋgəlva aŋgələ, vi kədawrahaŋ zəga nawɓuh mokum akan sə kəlazam ɓa.

¹⁰ Vi əssahan zə ɗəf va Maŋgəlva aŋgəl na, awki əɗi marava nawka ɗəf aka əkõhõ, əɗi marava nan tay ɓa. Ya əssahan zə ɗəf va negge na, awki əmta.

¹¹ Mula zəga an əssahan zə ɗəf va Maŋgəlva aŋgəl agəɗ azokum: Va wəza an agəɗ azokum kəsokən zukum, əvvuyon mambraya, zukum tay nek də mbərayən ɓa, geslne, əŋgla vakvakə, kotoroku, əzga'a! Addəv zəga pak mənokum zək nokum kərbanənək na saksak kənanaŋgə.

¹² An nəver sukum vas na, vi wən na ɗəf məs dəraygən sən ɗəfi ɓa, vi ɗəf an məs məraygən səni ɓa'e, ya vi zukum məs kədawsokoŋ viyəm dərbəgən a ma horokum aba Maŋgəlva iyi.

¹³ Aski dəsɓamə, Mbəksa an dəsɓaməs na, mənnekək də ənnek na Titus əmpa, vi mənokum pak kəffeten sənənək maɗɗulani.

¹⁴ Vi nərbanək əkaɓ naw aban aka wən nokum wil dəduwən ɓa, va məpel sukum gegesiŋ pay pakə, an məs məkaɓ akan aba Titus arbək na gesiŋgi.

¹⁵ Əŋgla nan vikum diyɗayi sawɓa, tay əɗɗumon əɓe' nokum pakgukum, vi kətafən də geslne gəm də əkkere.

¹⁶ In tat ənneke vi addəv zəga pak fendeŋge nan aka wən nokum.