2Korintus 6 - Bible en Guidar

¹ Adan mənam tat aka wəza dəndəni. Mənam tat əkkamokum ka kədappanən mbəlembəle Kərəhaŋ səza Maŋgəlvaŋ əddan fit ɓa.

² Vi anahək na: Pay an dəslə, nəzlan sukko. Pay nawkõho, nərmak voko. Ya kakaŋki pay an dəslə kpakə, kakaŋki pay nawkohõ.

³ Tay an mədaɗɗa təttaka nawtaŋgbãygən ɗəf ɓa, vi heslepe adawsan aza wəza nam ɓa.

⁴ Addəv zəga pak mənam tat ərban dərəŋ na, məɗɗaŋ wəza na Maŋgəlva mənan də əɓəs diyɗa addəv tatwãhã, addəv vavyakə, addəv geslne.

⁵ Addəv ərga, a fərsəna, addəv hoyohoyo, addəv iya, addəv ərəh əleŋ tay ɓa, addəv əvoŋ də mãya.

⁶ Də əssa salala, də əsəna, də əɓəsa, də əɗɗa moggoni, də zeŋgile salala, də əŋgla məza də mataka taka ɓa,

⁷ də əpel an gesiŋ, də əɓap na Maŋgəlva, dit zəgeɗ na təstəs en nawgaya gəm en nawga kizəmə.

⁸ Addəv əɗi kiya awaniɓa addəv əzele, addəv əpel moggon akamə awaniɓa addəv əpel mbərayən akamə; məɗimi ka məwaŋ wəna, dəka addəv gesiŋ mənani.

⁹ Va məsənmi ɓa, mbaraka məsənmi; va ama əmta, mbaraka madaram mənani, məzga' səmi, ya məbaymi ɓa.

¹⁰ Mədan səmi gədəvmə ya mənam tat zəm nek pay pakə, va məssehẽŋɗe, ya mənam tat əɗɗa ɗiy diyɗa ka məsaryeɗi, va zəga tay avam ɓa, ya mənam tat də zəga pakə.

¹¹ Mam ahã'ək azokum ɗiy na Korintus, məkol sukumək makram viŋgi.

¹² Minan makram sukum ɓa, ya nokum, kinanənək mokrokum sən ki zukum.

¹³ Mərban səm əŋgla məstaka də an mərban sukum, inat əpel sukum va kirtuwa, nokum pak məkol mokrokum viŋgi'e.

Əzga' aka əsap dit məs dəsənən Maŋgəlva ɓa

¹⁴ Kədasapaŋ dit ɗiy məs dətafaŋ ɓa ɓa, əsap mi nawsan a walaŋ təstəs gəm mambraya awaniɓa əsap mi nawsan a walaŋ əkeɗeɗe də guzli di?

¹⁵ Əsler mi a walaŋ Kristu də Beliyal awaniɓa mi dəsapan ɗəf məs dətaf də ɗəf məs dətaf ɓa di?

¹⁶ Mi dəsapan Gəla na Maŋgəlva dit zəgeɗkamaŋgəlva di? Vi nam Gəla na Maŋgəlva madaran mənani, va Maŋgəlva anah na: Wanəsaw də gəla a waleŋti, wanəbbal a waleŋti Wanəsaw Maŋgəlva neti, wassoŋ ka ɗiy nawa.

¹⁷ Vini: Məgil sə waleŋti, muɗak dənɗaŋ Daya anahə. Kədawrəŋgənən zəga naw mə' ɓa, asna wanətafkum.

¹⁸ Wanəsaw ka Afukum, wakəssoŋ ka kirtu mezeŋleket dit məguluŋgiti. Daya afən zəga pak anahə.