2Korintus 5 - Bible en Guidar

¹ Vi məsənka, an gəla nam naka dələv məs gizlirke ɗarəŋ arayka, mənam tat də an Maŋgəlva arkə, gəla məs mərkan də va ɗəfi ɓa, nan tay faɗ a disiŋ.

² Vi addəv aŋkəŋka, mənam tat əŋɗəsa. Mam sirsiri aka əgul gəla nam an na disiŋ aka aŋkəŋka,

³ an gesiŋ an məggbukni zəga səzam zlaŋ na, məsam na zəm mekeleŋ ɓa.

⁴ Vi an mənam tat addəv gizlirkeŋka, mənam tat əŋɗəsa, əzəm sahã, sən maŋgəm əggbukun ɓa, abbər əgul akani, vi zeŋgile dəsərətəgən an namta.

⁵ Maŋgəlva sən kiyən dəɗɗəm sən aska, ndəni apsəm Əmpəs basə.

⁶ Vas kan na, pay pak mənam tat fendeŋge də əsənən na, an mənam tat addəv gəɓa zəmə, məsimgəm mənan faraɗa səza Daya,

⁷ də ətaf mədawdawa, məza də an haram adawla ɓa.

⁸ Ya mənam tat fendeŋge, mənam tat ulan lew nasme səddəv gəɓa zəməŋka kadassa a maŋgava Daya.

⁹ Vini, əŋgla nam na, kəta məsam aŋka, kəta məsimgimi, məsam lew ama harani.

¹⁰ Vi mənam pak waməziw aba ətawwən na Kristu, ka naway pak dərahgən aza va an agəɗ də gəɓa zəni, an moggoni, an mbərayni.

Kristu tay əslerem də Maŋgəlva

¹¹ Adan məsən geslne na Daya, mənam tat ərme ɗiy də əpele, appaka ta' mənan aba Maŋgəlva, in əɗɗumun na wanəsaw appaka ta' addəv əɗɗum nokumu'e.

¹² Məŋgəl əgagdakan zəm abokum əmpa ɓa, ya mam aka əpsukum tive kəssoŋgən zukum nek də mənamə, ka kərahaŋgən an nawzla a met ɗiy məzukaɓgən zit dəppaka məza də mekret ɓa.

¹³ Vi an məsamək va kiyəm tay ɓa, vi Maŋgəlva iyi. Ya an məsamək də maɗɗulamə, vikumi.

¹⁴ Vi əŋgla na Kristu tay əhumsukmə, mənam məs məsən gesiŋ na: Ɗəf taka amtək a gəlet ɗiy pakə, vas kan na hara əmta net ɗiy pak addəvni.

¹⁵ Amtək viyit ɗiy pakə, vi ɗiy en dəssoŋ mederet pak adassoŋ mederet na kiyit ɓa, dəssoŋgən sən an dəmtə gəm dəsil səka əmta viti.

¹⁶ Vasna, nam təŋ kakaŋka, ɗəf tay məsən va ɗəf ɓa, kəta məsənək Kristu va ɗəf zlaŋ, ya kakaŋ na, vas məsən əmpa ɓa.

¹⁷ An ɗəf tay addəv Kristu na, akkpaŋgək ɗəf meleketeni. Zəgeɗ məzvet pak atoŋgoŋko, zəgeɗ pak akkpaŋgək meleketeni.

¹⁸ Zəgeɗ pak səza Maŋgəlva azzoŋgu, ndəni dəslerem dəndə zək nan də Kristu gəm apsəm wəza nawslergit ɗiyi.

¹⁹ Vi Maŋgəlva tay addəv Kristu, əsleret ɗiy negge dəndə zək nani, məza əŋɗan sit heslepe net ɓa, yaŋ aɗi əpel nawsleret ɗiy addəvmə.

²⁰ Maslənɗe mənan kan aka iya na Kristu, Maŋgəlva dədawyukum də mamə. Mənam tat əkkomokum də iya na Kristu, məssoŋ məslerkum də Maŋgəlva.

²¹ Ndən məs dəsən mambray ɓa, akkpaŋgan ka məs dəgəɗ mambray vimə, vi namə, məkkpaŋgən təstəs na Maŋgəlva addəvni.