2Korintus 3 - Bible en Guidar

Məɗɗaŋ wəza na wənmiyna meleketeni

¹ Ki zəm mədamsak əgagdakan dəvam sa? Awaniɓa mənam tat də wəray nawver sukum ɗerewel narban kiyəm azokum awaniɓa ətaf səvokum va ɗiy meɓɓet sa?

² Munokumtə letər namə, letər məverin a makramə, məs ɗiy pak asənaŋgə, aŋɗanəni.

³ Təstəs nan na letər na Kristu kənanaŋge, məpsəm sən wəza namə, məverin məza dit iŋkile nawveri ɓa, də Əmpəs na Maŋgəlva madarani. Məverni aket kalaɓɗe net gərmeŋge yi ɓa, aket kalaɓɗe na sluwi, makra ɗəfa.

⁴ Aski gegesiŋ an mərah səza Kristu aba Maŋgəlva.

⁵ Də əɓap nam sən kiyəm mədawɓap əɗɗa wəzas ɓa, əɓap nam səza Maŋgəlva ade.

⁶ Ndəni dəɗɗəm nawɓap əsam məɗɗaŋ wəza na wənmiyna meleketeni, məza səza an məverin dəveri ɓa, səza Əmpəsi, vi an məverin awbay ɗəfa, Əmpəs tam apsən zeŋgile sən ɗəfa.

⁷ Ya an wəza namta məverin dəver aket gərmeŋge tay də gagdaka hã mə Israyelɗe awɓap əzinən heret aka hara Moyis ɓa sən əwiɗ na haran məs anzi na ɓa dərəŋ na,

⁸ mbar kan wəza na Əmpəs asan də gagdak day di?

⁹ Vi an wəza na ətawwən narma ɗəf tay də gagdaka, wəza na təstəs wasan də gagdak hã dayə.

¹⁰ Vi zəga an də gagdak lahəŋ tay də gagdak ɓa, gagdak an nazzan adayək kiyən pelepele.

¹¹ Adan zəga məs anzi na ɓa arahək gagdaka, an məs nawsan faɗ waday də gagdaka.

¹² Adan kan mənam tat də əga vaska, mənam tat əziw ɓəlɓələ.

¹³ Məza va Moyis adaɗɗa məsərətkiya aka harani, vi mə Israyelɗe adawziyən heret, kawla əgrak na zəga an məs anzi na ɓa nak ɓa.

¹⁴ Ya əsən net attirke, vi hã pay dəpaŋka, an tay əŋɗanən wənmiyna məzvan na, məsərətkiya vanəs tay, dətor ɓa, vi addəv Kristu adawza.

¹⁵ Ya hã pay dəpaŋka, an tay əŋɗanən Moyis na, məsərətkiya tay əsərət mekreti.

¹⁶ Də əkkpaŋ aza Daya iyi məsərətkiya adawtoro.

¹⁷ Vi Daya iyi Əmpəsa, ya a təki məs Əmpəs na Daya asani, adaki əbit asani.

¹⁸ Mənam pak, məs mətor məsərətkiya səka haramə, gagdak na Daya tay ərba azam va asani. Məkkpaŋgək gagdak vanəs gagdak aka gagdaka; aski wəza na Daya, dəsan Əmpəsa.