2Korintus 13 - Bible en Guidar

Əsəɓ an bayma faɗə də wəsɗa

¹ Təl mahoko'ən yaŋ nədazzaw anokumda. Ətaw wən pak waziw aka əpel net miziweɗe sula awaniɓa hoku.

² Nənahək səkayə, ya, in tat ənah dafsən, va kəmna in tat də nokum təl masula'ən, də in tat kakaŋ arokum ɓa, sit ɗiy en dəɗɗaŋ mambray daabəŋ gəm sit madammbirgit pakə, an nədek əmpa na, nəppet na ɓa.

³ Adan mənokum tat əkayan an dədarban na Kristu tay əpel addəvwa, məddakni azokum ɓa, ya də əɓapi addəvkum.

⁴ Gesiŋ məkkpani aka məzliwrihe aka məddakən. Ya kakaŋ na madarani də əɓap na Maŋgəlva. Gesiŋ nam pak məddakəm mənan addəv əsap nam dəndəni. Ya waməsam madaram dəndən də əɓap na Maŋgəlva azamə.

⁵ Mənokum sən kikum mula, addəv ətaf kənanən sa? Mənokum sən kikum məkosoni. Awaniɓa, nokum kəsənənək na Yesu Kristu tay addəvkum ɓa sa? An tay vas ɓa na, təstəs kənanən ɓa.

⁶ Ya in əɗɗumun na, wakəsənən na, nam təstəs mənani.

⁷ Əŋgla nam aba Maŋgəlva na, kədaɗɗaŋ mbərayən ɓa. Məde vi karban təstəs nam ɓa, vi kəɗɗaŋgən moggoni, də məsam məddakəm pakə.

⁸ Vi zəga tay mədawɓap əɗɗa nawtak gegesiŋ ɓa, abbər əɗɗa wəza ammba gegesiŋ ɓa.

⁹ Vi nam mənam tat ənneke, an mənam tat məddakmə ya nokum, mənokum tat gbogboŋgu. Aŋki əŋgla namə'e, ka kəsoŋgən təstəs an grakə.

¹⁰ Sən aski, nədawver zəgeɗis səka nəsaw faraɗa, vi pay nədazzaw na, nəŋgəl nətawgən wən nan də gagdak məs Daya avay nawɓaygukum məza nawraygukum ɓaŋ ɓa.

Əgrakən ( 13:11-13 )

¹¹ Məlmiŋgiɗwa, mənneki, məgay ammba əssa salala nokum. Məsəɓ sən zukum, məssoŋ əɗɗum taka, mənzi də zazaya. Asna Maŋgəlva afən əŋgla gəm afən zazay wasan də munokum.

¹² Məsɗan zukum də ərma zukum na zazaya. Ɗiy na Maŋgəlva pak asɗokumunko.

¹³ Mbəlembəle na Daya Yesu Kristu, əŋgla na Maŋgəlva, də əsap na Zeŋgile Salala dəssoŋ də munokum pakə.