2Korintus 11 - Bible en Guidar

Pol dit maslənɗe muwaŋ wəna

¹ Va a kəɓəsnən vadərwa naw kaka na, ya mənokum tat əɓəswən lahə.

² Nəknahək də kotorok nokum a makraw va Maŋgəlva asan də kotoroku. Vi nədahkumuk sən ɗəf təttaka, ana Kristu, kawkukum sən va waŋ ŋgbuɓɓo salala.

³ Va dohõ ambəɗat Hawwa də kuket nani, geslne tay ədu na, maɗɗulokum adawray kappan moggoni gəm salala na Kristu ɓa.

⁴ Vi an ɗəf maɓɓan adek anokumda, arban sukumək Kristu məza an məs mərban sukumi ɓa, awaniɓa kətafənək əmpəs temme məza an məs kərahaŋgi ɓa, awaniɓa Alabara Nenek maɓɓani məza an məs kətafaŋgi ɓa, mənokum ənnek dəndən lewlewi.

⁵ Nəsənək gesiŋ nəgəs azet maslənɗe en məs tay va ndəɗaŋ ɓes ɓa.

⁶ Kuzuŋ tay məs nəsən addəv əpel ɓa, ya tay vas addəv əsən ɓa, addəv zəga pak, mərban sukumək zəga pakə.

⁷ Awaniɓa mambray nəgəɗ in sən kiyu, nəɓegən ki zu ka nokum kəɓayaŋgən vi mərban sukum Alabara Nenek na Maŋgəlva na mekeleŋ sa?

⁸ Nəyetik məzutafaŋ meɓɓet də ətaf əya naw vi kawgəɗ sukum wəza.

⁹ Ya aka nəsaw anokumda na, də wərayu asan zlaŋ, ɗəf tay nəyan ɓa. Vi an dəkkpap su pak milmiŋgiɗu dəzzoŋ sə Makedoniya aknahanənka, ya addəv zəga pak in sən kiyu nəsaw sukum va zəga nawsla akokum ɓa. Nəgak zuwa, wanəga zuwa.

¹⁰ Də gegesiŋ na Kristu na makrawa, kawɗamani gagdak nawəs aka va na Akaya ɓa.

¹¹ Vimi di? Vi nəŋgəlukum ɓa sa? Maŋgəlva asənka!

¹² An məs nədaɗɗa, anan nədaɗɗa'e, vi kawtak met ɗiy məzukayaŋ batam nawgagdakan zit dawla zit məstaka də mənamə.

¹³ Vi maslənɗe muwaŋ wənəs məɗɗaŋ wəza na vuruməŋ, aɗinək zit ka maslənɗe na Kristu.

¹⁴ Zəga naggət akan ɓa, vi Satan sən kiyən tay əɗi zən va maslay na əkeɗeɗe'e.

¹⁵ Vini, tay naɗɗa gərəŋ akan an məɗɗaŋ nan tay əɗinən zit va məɗɗaŋ wəza na təstəs ɓa. Əgrak net wasan məstaka də wəza neti.

Wəzəmsahã na Pol aka wəza na maslən

¹⁶ In tat əmsa ənaha: Ɗəf adawɗiyu ka dərwa ɓa. Ya an vaski na, mətaf na dərwa nan vani, vi nəkaɓgən tam siɗikke aka wən nani.

¹⁷ An nədawnəhəŋ na, an məs Daya aŋgəli ɓa, ya va addəv kiyu tay ɓay, addəv aski əkaɓ asan kpakə.

¹⁸ Adan ɗiy diyɗa adawkaɓaŋ an na gəɓa ziti. Naw pak wanəkaɓə.

¹⁹ Munokum məs maɗɗulokum naka, mənokum tat əbbah sit dərweŋge də zukum neki.

²⁰ Vi mənokum tat əɓəs əkkpaŋgokum belemɗe, əzəmkum, əppətkum, əzelokum, əvərkum a tapaslaykum.

²¹ Wil tay əduwən dawnəhən: Məddakək aka aska. Ya an tay ɗəf awda kiyən na, naw pak wanədakiyu əpel va na dərwa.

²² Mə Ibriɗeŋ sa? Naw pakə! Mə Israyelɗeŋ sa? Naw pakə! Zev Abraham sa? Naw pakə!

²³ Məɗɗaŋ wəza na Kristu wəŋ sa? Anəpel va na dərwa: In dayə. Addəv əya, in dayə; əssa a fərsəna, in dayə; ərəh ərga, in day pelepele. Addəv mandara namta, naw təl ɓaɓayə.

²⁴ Təl sle nərah ɗoŋroŋ kaklaw hoku kiyən vaytak vaytak səvet mə Yudeɗi.

²⁵ Təl hoku ɗiy na Rom avərwən də zleŋge. Təl taka məsku dit gərmeŋge. Təl hoku bəlay aggbo'u aret iŋkile. Təl taka nəsaw dəfəɗ də kapay pak a pehe.

²⁶ Nədawək malaka də təlu ɗayɗayə. Nəsawək a ma mandara net məlpeŋge, mandara net məvoŋgoŋ tive, mandara net hilfiŋgiɗwa gəm mandara net ɗiy-ɗari, mandara na walaŋgəla-metiŋ, mandara na kapta-muyã, mandara na pehe, mandara net milmiŋgiɗu en muwaŋ wəna,

²⁷ addəv wəza gəm addəv iya, haraw ɗozloŋgo pay pakə; addəv mãy dit meme, əɗɗa meme pay pakə; addəv əda na səmyã gəm əssa zə ɗəf mekeleŋ,

²⁸ Mbəksa zəgeɗ meɓɓeti, ya an dədagərəŋgaw pay pak na, ndəni əɗɗum aka əsap net məzutafaŋ pakə.

²⁹ Naway məddakən di, ya naw məddaku nan ɓa sa? Naway dəskot di, ya naw assaw ɓa sa?

³⁰ An aslək nawkaɓ na, asna anəkaɓ də əddak nawa.

³¹ Maŋgəlva Afən Daya nam Yesu məs nawgəɗ sən soko pay pak asənək na, wən nədawa ɓa.

³² A Damas, daya na kivadələv na məlĩ Aretas aɗiyək əga walaŋgəla-metiŋ vi karmuwa.

³³ Ya də təki məppan foŋgo naza zlava, məpriggu də baŋla addəv kekele, yas nəkõh səvani.