2Korintus 10 - Bible en Guidar

Əhãy na Pol ammba gagdak nan məs wəza na maslən apsəni ( 10:1—13:10 ) Pol tay əhay ammba wəza nani

¹ Ya in Pol zək nawa, in tat əsɓokum də makra zazay gəm moggon na Kristu, in məs nədawɓegən kiyu an in tat də mənokum, ya ɓəl an ɓa' nan də mənokum.

² In tat əkkamokum, kədaɗɗaŋ ka nərbangən ɓəɓəl naw də zu soksok an nədek anokumda, aket en mədaŋ kiyit ənahaŋ na: Va aza əŋgla na gəɓa zəm mədawdawaŋka ɓa.

³ Gesiŋ, va ɗəf mədawdawa, ya va ɗəf mədawgay ɓa.

⁴ Vi zəgeɗ nawgay nam na, na gəɓa zə ɗəfəŋ ɓa, əɓap net səza Maŋgəlva iyi, naɓzliw korguɗe. Ndəni mədawzet əɗɗumɗe,

⁵ gəm zəga məzutak əsən Maŋgəlva pakə. Mənam tat ərma əɗɗum pak kawkiyən dəɓe' səngən Kristu.

⁶ Məzaɓanək zəm kazga sən əggbak ma pak an əɓe' nokum asanək gərakə.

⁷ Mula zəgeɗ va adarbanən zit ama horokum. An ɗəf atafək na, nan na Kristu wi, dəɗi akan sən kiyən na, va asan na Kristu nam pak vas mənani'e.

⁸ An in tat əkaɓ vi gagdak məs Daya asəm vi nawɓaygukum məza nawraygukum ɓaŋ na wil aduwən na viyən ɓa.

⁹ Maw tay aka nəgilgin va ɗəf nawgeslnegukum dit letərɗe naw ɓa.

¹⁰ Vi tay ənahaŋ na, letərɗe nan wən net gədaki də gbogboŋgəŋ. Ya an zək nan tay də mənam na, məddakni, əpel nan nawzeleni.

¹¹ Ɗəf məzupel vas dəɗi akan lewlew na: Vaski əpel nam addivit letərɗe nam an faraɗa mənani, vas mədawsam addəv wəza an mənam tat də mənokum.

¹² Gesiŋ mədana kiyəm əwel zəm va day awaniɓa əsla zəm dit ɗiy meɓɓet məzuɗiyən ki zit tusso ɓa, net tay əslanən zit də zəga nawsla zəga net tusso gəm əslanən ki zit də zək neti, gabba zəga tay adaprəmaŋ ɓa!

¹³ Nam məɗi na ki zəm daykiyit meŋge ɓa, ya an mədaɗɗa wəza dəndən na, tivenanziya məs Maŋgəlva aɗi səm nawgapgəm hã azokumi.

¹⁴ Mətoŋ na kiyit meŋge nam va məgap anokumda ɓa ɓa, vi məgapək gesiŋ anokumda də Alabara Nenek na Kristu.

¹⁵ Əkaɓ nam dətoŋ kiyit meŋge kawziw aka wəza net ɗiy meɓɓet ɓa, ya mənam tat də əga, ətaf nokum tay əddan abe, tay əɓay əmbat abe abe a walaŋkum va aza tivenanziya namə,

¹⁶ də ərban Alabara Nenek a təki an bal sukum, məza əɗi əkaɓ nam aka wəza an məɗɗan səkay a guli net ɗiy meɓɓet ɓa.

¹⁷ Ya, ɗəf məzukaɓa, dəɗi əkaɓ nan addəv Daya.

¹⁸ Vi ɗəf məzukaɓgən ki zəni adawtafaŋ wən nan ɓa, an Daya aɗi kini.