2Korintus 1 - Bible en Guidar

Ətoŋ addəvən ( 1:1-11 ) Wəsɗa

¹ Səza Pol maslən na Yesu Kristu də əŋgla na Maŋgəlva gəm məlməm Timote sit ɗiy na Maŋgəlva na Korintus gəm sit en salala baymet a Akaya dəwənnani.

² Mbəlembəle gəm zazay na Maŋgəlva Afəmə, də an na Daya nam Yesu Kristu dəsan akokum.

Pol tay əsokon Maŋgəlva

³ Soko sən Maŋgəlva Afən Daya nam Yesu Kristu, Afən ulasahã, Maŋgəlva məsɓan ɗəf pakə.

⁴ Ndəni məzəsɓam addəv əzəm sahã nam pakə vi məɓaɓgən əsɓet en dəssoŋ addəv əzəm sahã pak də əsəɓ an mənam sən kiyəm mədawrəh səva Maŋgəlva.

⁵ Va əzəm sahã na Kristu asan diyɗa ammbamə, vaski yi'e əsəɓ nam asan diyɗa səza Kristu.

⁶ An məsərni mamə, wasan sukum əsɓa gəm əkõhõ. An məsɓami, vi kasɓokumi ka kəɓəsəgən əzəmsahã məs mədawzəməŋki yi'e.

⁷ Əga nam vikum tay ɓəlɓələ, vi məsənka munokum tat əsap də mənam addəv əzəmsahã namə, kəsapaŋka'e addəv əsɓəs namə.

⁸ Milmiŋgiɗmə, məŋgəl kəssoŋgən slamma ɓa, Tatwãh məs dəteh akam a Asiyaŋ azəmgəmən sahã diyɗa sawɓa hã dayki əɓap namə, məppanək əɗɗum nassa madaramə.

⁹ Mənam sən kiyəm məttəmanək na mətawni wən nawbaymə, agəɗ vas na, vi mədawɗi əɗɗum nam aka zəm abbər aka Maŋgəlva məs nawsilgit ɗiy məmtit ɓa.

¹⁰ Ndən dəkõhgəm səma əmta metiŋgiska, ya wakõhgəmə'e, akani məɗi əga namə, wakõhgəm əmpa'e.

¹¹ Munokum tat əɗɗa wəza sapə'e ammbam də əkkama, vi mərahgən əvəl na mbəlembəle səzet ɗiy diyɗa ka ɗiy diyɗa dəfeteŋgən aka wən namə.

Pol gəm Gəla na Maŋgəlva a Korintus ( 1:12—7:16 ) Pol tay əddəɗan an adaɗɗum naɗɗa

¹² Vi zəga nawkaɓ nam na, ndəni an əɗɗum na makram adarba, məsamək egge, sasak a walaŋkum də moggoni gəm də təstəs na Maŋgəlva məza əziw aka maɗɗula na ɗəf titir abbər aka mbəlembəle na Maŋgəlva ɓa.

¹³ Zəga maɓɓan tay mədawver sukum abbər ki an kədaŋɗaŋgə awaniɓa məs kəsənaŋ lewlew ɓa, in əɗɗumon na wakəsənən lewlew hã gərakə,

¹⁴ adan kəsənən kiyən kiyən na, mənamtə zəga nawkaɓ nokum va nokum kəssoŋ zəga nawkaɓ nam pay na Daya nam Yesu.

¹⁵ Də gegesiŋ vaski nəŋgəl nəmbatgən anokumda daabəŋ vi kərahaŋgən mbəlembəle masulani,

¹⁶ siske na nəmbatgən sə nokumda a Makedoniya ka nəmilgən sə Makedoniya əmpa a nokumda, kəɗɗaŋgən an naɗɗa pak ammba malaka naw a Yude.

¹⁷ Də iynan naɗɗa vasna, tay ula va əsmay nədasmay sa? Awaniɓa an nəɗɗum naɗɗa na əŋgla na gəɓa zə ɗəfi hara nənahgən na ha'aw, ha'aw gəm owwo, owwo sa?

¹⁸ Maŋgəlva nawtaf wən nani, əpel nam azokum na, ha'aw gəm owwoy ɓa.

¹⁹ Vi Yesu Kristu Wətən Maŋgəlva mərban wən nan anokumda, iyna, Silvin gəm Timote, tay ha'aw gəm owwo ɓa, ha'awi kaka'ə.

²⁰ Iynama na Maŋgəlva temtem pak ha'aw net addəvni. Vi dəndəni mədawnəh na Amin sən Maŋgəlva, vi gagdak nani.

²¹ Ndəni məzəɓɓəlamə də mənokum addəv Kristu gəm məzupesl mẽl akamə, Maŋgəlva iyi.

²² Ndəni dəɗi tampon nan akamə gəm aɗi Əmpəs nan a makram va zəga nawtaf taf basə.

²³ Maŋgəlva yi miziwe nawa, ndəni nawtawwən aka zeŋgilewa. Nəmil a Korintus ɓa na vi nədawyokum ɓa yi.

²⁴ Məŋgəl məzəmgən məlĩ aka ətaf nokum ɓa, ya məsapək addəv ənnek nokum, vi kəziwweŋgik ɓəlɓəl addəv ətafa.