2Alabaraɗe Də Mabərkiziti 8 - Bible en Guidar

Wəzeɗe temtem na Salomoŋ

¹ Səɓɓa wəzva kaklaw sula məs Salomoŋ arka gəla na Yawe də gəla nani,

² Arketik walaŋgəleɗe gugriɗ məs Huram apsəni, azi mə Israyelɗe adak də gəla.

³ Yaŋ Salomoŋ ambat əgay də Hamat-Soba, aska wəlani.

⁴ Arkak Tadmor a kapta-muyã gəm walaŋgəleɗe gugriɗ baymet məs arkə nakkalan zəga a Hamat.

⁵ Arkak Bet-Horon na disiŋ gəm Bet-Horon na fuŋ, walaŋgəleɗe na korgu dit maddambaɗe gəm zəgeɗ nawslaketti.

⁶ Gəm əmpa Ba'alat dit walaŋgəleɗe məs adakkalan zəga nan adaka, may en adawziwgit mawteŋɗe net pilseŋge nawgay nan adaka, dit en məs arkə gazlaŋ net pilseŋge nan adaka. Salomoŋ arkak an makran aŋgəl pak a walaŋgəla na Yerusalem vani, aka gərəm na Liban, gəm aka dələv an dədawzlan aban pakə.

⁷ Ɗiy en dəppaŋ pak, va mə Hitɗe, mə Amorɗe, mə Perziɗe, mə Hiviɗe dit mə Yebusɗe, net mə Israyelɗeŋ ɓa.

⁸ Səmmbet kirtit en dəppaŋ dərɓeget aka dəlva, məs mə Israyelɗe dəzetin ɓa na, Salomoŋ akek aka wəza na balam hã pay dəpaŋka.

⁹ Səret mə Israyelɗe na, tay an məs Salomoŋ aɗi va balam aka wəza nan ɓa, vi net na, ɗiy nawgayəŋgə, deyeɗe net məŋkoroŋ pilseŋge gəm deyeɗe net mawteŋɗe nawga dit ɗiy nakani.

¹⁰ Ɗiy gugriɗ naba məlĩ Salomoŋ yeŋki, ɗiy səkat sula də kaklaw sle', dəssoŋgən də gagdak aket ɗiyi.

¹¹ Salomoŋ agilgətək wətən Farawən sə walaŋgəla-metiŋ na Davit, təmbat addəv gəla an mərkə səta. Vi anahək na: «Guluk naw təsat na addəv gəla na Davit məlĩ na Israyel aka batamu ɓa, vi gəleɗe məs akoti na Yawe asan addivtiŋ na, salalaŋgə.»

¹² Yas kan Salomoŋ adə əvəl nawzla kurmbuɗuk temtem sən Yawe aka matuya na Yawe məs arkə aba gəla nawtoŋ a daŋgla,

¹³ ədan də pay nani, əzban aza mahenziŋ Moyis aɗi aket payɗe naffete, aka əzləra na təlaper gəm aket əzləreɗ gugriɗ hoku naddəv əzva: əzləra na peŋ məza wuɗo ɓa, əzləra na lumu taka buhul gəm əzləra net guɗukɗe.

¹⁴ Aɗɗak va an afən Davit aziwgin wən nani, aɗiyik məsdəlveŋge aka wəza net də mabərki ziti, siske na, mə Leviɗe aka wəza nawgagdakan Yawe gəm naɗɗa wəza abet məsdəlveŋge va məɗiyən addəv wəsɓəta pakə, məgaŋ maddambeɗe muɗaket aza maddamba pak də mabərki ziti; vi aski mahenziŋ na Davit ɗəf na Maŋgəlva.

¹⁵ Dəmzləhaŋ səka mahenziŋ na məlĩ təttaka zlaŋ ɓa, səka an dəwəlsən wən net məsdəlveŋge gəm mə leviɗe may zəga awandi pak na maha ɓa.

¹⁶ Vaski wəza na Salomoŋ pak adaw də tiven təŋ səza pay məɗi gabba Gəla na Yawe, vaski Gəla na Yawe agrakə.

¹⁷ Yas kan, Salomoŋ ambat a Esiyon-Geber gəm a Eylat ama pehe, aka dələv na Edom.

¹⁸ Yaŋ məlĩ Huram aslənsin bəlayɗe gəm ɗiy məɗɗaŋ wəza en dəsənnən wən na pehe də vet gewleɗ nani. Azzoŋ dit gewleɗ na salomoŋ a Ofir, andaŋ meleŋge kilo gabal kəlaw kiyən hoku sədaka, akisənən məlĩ Salomoŋ.