2Alabaraɗe Də Mabərkiziti 7 - Bible en Guidar

Əzaɓ-Maŋgəlva temtem sən Yawe

¹ Səza Salomoŋ abay ma əkkaməs na, offo aprik sə disiŋ, azla əvəl nawzla kurmbuɗuku gəm əzaɓ-Maŋgəlva nawslere. Gagdak na Yawe aknəhək gəla.

² Məsdəlveŋge dəɓapən ətoŋ addəv gəla na Yawe van ɓa, vi gagdak na Yawe aknəhək gəla vani.

³ Mə Israyelɗe pak awlanənək, pay offo gəm gagdak na Yawe aprik aka gəla; ndəɗaŋ afuŋ də matakpret gbuduk hã mirbizit afuŋ aka təki məkkəɗən, yaŋ appu'oŋ agagdakanən Yawe: vi moggoni, vi moggon nan tay hã faɗə.

⁴ Məlyã dit ɗiy pak azaɓaŋgək-Maŋgəlva aba Yawe.

⁵ Məlĩ Salomoŋ azaɓək-Maŋgəlva dit wasliɗe gabal kaklaw sula kiyit sula, timeŋgiɗ sap dit gilew, gabal səkat də kaklaw sula, vaski məlĩ dit ɗiy pak akolən ma gəla na Maŋgəlva.

⁶ Məsdəlveŋge tahəŋ ama wəza neti, mə leviɗe tam dit zəgeɗ na gəlya məs məlĩ Davit azaɓ nawgagdakan Yawe ənəhaŋ na: «Vi moggon nan tay hã faɗə.» An Davit anahək dəgagdakanən Yawe; asna məsdəlveŋge uffoŋ mohõ abeti, mə Israyelɗe pak ziwziwi.

⁷ Yaŋ Salomoŋ apesl dədak daŋla naba gəla na Yawe, apsən əvəl nawzla kurmbuɗuk temtemi, səlhã na əzaɓ-Maŋgəlva temtem nawrəh zazaya. Vi matuya na təbəz pepreŋ məs Salomoŋ azaɓəŋ aɓap na ətaf əvəl nawzla kurmbuɗuk gəm əvəl na zəga na mabardaw may səlhã temtem ɓa.

⁸ Dasək na, Salomoŋ aɗɗak əzləra pay buhul sap dit mə Israyelɗe baymeti. Wəkkal van gədaki sawɓa, ɗiy azzoŋguk hã sə Lebo-Hamat gap lolohõ na Eziptə.

⁹ Aka pay madədopoɗo'ən aɗɗanən əkkal nagrakən, vi pay buhul aɗɗaŋ nawpesl matuya gəm pay buhul tam na əzləra.

¹⁰ Aka pay ma kaklaw sula kiyən hoku na təla mabuhulon na, ndən mbagit ɗiy əddoŋ a gizlirke net də zit nek gəm mekret ɗuf aka wən na moggon məs Yawe agəɗ sən Davit, sən Salomoŋ may sit mə Israyelɗe ɗiy nanəŋka.

Yawe arbanək zən aza Salomoŋ masulani

¹¹ Səza Salomoŋ abay ma ərka gəla na Yawe də gəla na məlyã, agrakək an aɗɗum naɗɗa addəvit gəleɗe sulegit pak də tiveni,

¹² Yawe arbanək zən aza Salomoŋ də dəfɗa, aɓsən na: «Nəprəmək əkkam noko; nətafək əwel təkiyəŋ, vi dəsangən ka gəla nawzaɓ su Maŋgəlva.

¹³ An nəmsanək disiŋ, buwən adawzi ɓa, an nəɗiyək wən nan sən zaray dəzəmgən zəga səka dəlva, an nəslənək gəbaymərma aket ɗiy nawa,

¹⁴ an ɗiy naw məs adawyaŋ də iya naw avoŋgənək kiyti, tay əkkamaŋgə, tay əkayawəni gəm amilyoŋ səka tive net mbəraynəŋka, naw wanəprəm hã sə disiŋ, wanəvvuyoŋ sit mambray neti, wanəbbur dələv neti.

¹⁵ Kakaŋ na, haraw tay kollo gəm sləmaw tay pakka ammba əkkam na təkiyəŋka.

¹⁶ Kakaŋ nəwelike, nəɗiyək gəlaŋ vi iya naw dəsangən adak faɗə, haraw də makraw wassoŋ akan pay pakə.

¹⁷ Ya nok na, an is tat ədaw abaw va afuk Davit adawə, də əɗɗa an nəɗi suk wən nani, an kərmek mahənziŋɗe naw dit tiveɗnanziya nawa,

¹⁸ asna wanəsɓan mazaŋga na məlĩ nok va nəziwgin də afuk Davit dawnəh na: Ɗəf na mazlalwok arslə na dawsan məlĩ aka Israyel ɓa.

¹⁹ Ya hara kan na, an kəmilyoŋguk səmmbawa, kəzgetinik mahenziŋɗe nawa gəm an məs nəɗi sukum abokum, yaŋ kəddoŋ kəɗɗaŋ wəza sit meŋgilveɗ meɓɓeti, kəppu'oŋ abeti,

²⁰ Asna wanəzargukum səka dələv məs nəpsukum, wanəzlambrakan gəla məs nəɗi ammba iya naw nak faraɗa səzawa. Asna, wanəkkpaŋgan ka zəga na mamba gəm va zəga nawmas akan aweleŋgit ɗiy pakə.

²¹ Pay ɗiy adawtoŋgoŋ kəlaza gəla, məs dəsan naggət akan lahəŋ nak na, wagəɗ sit gərəŋgə, ka ndəɗaŋ kassohõnən mazit na: Vimi Yawe aɗɗa zef wən aŋ sən dəlvəŋ may sən gəlaŋ di?

²² Kawzlan siti kan na: Vi azganən Yawe, Maŋgəlva net efiŋgiɗit məs digilgit səka dələv na Eziptə; yaŋ azbetin meŋgilveɗ meɓɓeti, appu'oŋ abeti, ndəni aki ərayəŋ pak aketi.»