2Alabaraɗe Də Mabərkiziti 5 - Bible en Guidar

¹ Adan Salomoŋ agrak wəza na Gəla na Yawe na, akiyik zəgeɗ en Davit, afən apsən Daya: təbəz babara, meleŋge may zəgeɗ temtemi, aɗi addivit mehẽɗ naddəv Gəla na Maŋgəlva vani.

Tay əɗinən akoti nawsler addəv Gəla-na-Maŋgəlva

² Yaŋ Salomoŋ akkelet ɗiy məsɓet na Israyel dit ɗiy gugriɗ net mahəlfaɗe gəm migil gəlaɗe net kirtin Israyel a Yerusalem, vi kawslan akoti na wənmiyna na Yawe sə marba walaŋgəla na Davit, məs adawyaŋ na Siyon.

³ Yaŋ kan mə Israyelɗe akkalaŋ aba məlĩ pay na wəzləra aka təla mabuhuloni.

⁴ Adan ɗiy məsɓet na Israyel pak agapaŋgə, mə leviɗe kan hembit əslanən akoti.

⁵ Yas aslanən akoti məstaka də gizlirke nalma də Maŋgəlva gəm zəgeɗ na matuya məs dəssoŋ addəv gizlirke vani, məsdəlveŋge mə leviɗe dəkenini.

⁶ Məlĩ Salomoŋ dit ɗiy na Israyel, asapaŋgək baymet aba akoti, azaɓaŋ-Maŋgəlva dit timeŋgiɗi, may wasliɗe hã ɗəf awɓap əŋɗet ɓa, kawsənni əŋɗa net ɓa.

⁷ Siskiŋ na, məsdəlveŋge atoŋgənən akoti na wənmiyna na Yawe a təki məzaɓan səni, a təki salala diyɗa, ammba persleket kerubaɗe.

⁸ Persleket kerubaɗe tay pəparra aka təki məs məzaɓan sən akoti, vi dəssərətəngən akoti van dit zleŋɗe nawslani.

⁹ Zleŋɗe vet zekiŋ; kiyit tay ula səza akoti an ɗəf tay a maddamba na təki salala diyɗa ya an səppakay na awlaŋ ɓa; akoti vanəs tay adak hã pay dəpaŋka.

¹⁰ Zəga tay addəv akoti van abbər kiyit kalaɓɗe sula məs Moyis ataf sə Horeb ezi addəvnəŋ ɓa, aka Yawe aynan wənmiyna dit mə Israyelɗe aka agilgit sə Eziptə.

¹¹ Səza məsdəlveŋge agulyoŋ səddəv gəlamatuya na, məsdəlveŋge məs dəssoŋ adak baymet, askoɓənək embesleke səzeti, məza əzban na, may nawaŋ daabəŋ di ɓa.

¹² Mə leviɗe məyaŋ gəlya pak: Asaf, Heman, Yedutun, dit kirtiti, gəm hilfiŋgiɗit meɓɓet na, aguloŋguk lukutɗe babarɗe lelekeɗekɗe; Tahəŋ ziwziw dəmmba pay nampum na matuya əbeynin ndayɗe, gaŋgaraɗe dit gəzləŋtəndəŋɗe. Məsdəlveŋge en dəsənaŋ əffon mõhõ tahəŋ səkat də kaklaw sula a meŋgeveti.

¹³ Mohõŋɗe də wəlet məyaŋ gəlya aɗəmək kawgagdakan də əɗi ki Yawe. Adan mohõŋɗe, ndayɗe, zəgeɗ nasmay temtem gəm gəlya aɗəmaŋ əgagdakan Yawe dawnəh na vi moggoni, vi moggon nan tay hã faɗə na, gəla na Yawe aknahək də ernene.

¹⁴ Məsdəlveŋge dəɓap əziweŋ agəla wəza net əmpa ɓa sit erneneski, vi gagdak na Yawe aknahək Gəla na Maŋgəlva.