2Alabaraɗe Də Mabərkiziti 4 - Bible en Guidar

¹ Azaɓək matuya na təbəz pepreŋge, zezek nan metir kəlaw, slosloprok nan metir kəlaw, əɓay nan tam metir sle'.

Gefleŋ gəm kasliɗe na təbəz pepreŋge

² Ahəsək ŋgefleŋ məhurzluŋgo na təbəz pepreŋge; slosloprok na gədəvən agəɗək metir sle'i, əɓay nan agəɗək metir sula də man, tərwəsl nan agəɗək metir kəlaw kiyən sle'.

³ Ammba ŋgefleŋ van sulək na, azaɓək medgeɗgeɗe; aza metir taka pak medgeɗgeɗe kaklaw sula. Məɗɗeti vas ɓəlot ɓəlot sula sulək məhisit məstaka də ŋgefleŋ vani.

⁴ Məkrəkni yi ŋgefleŋ van aket medgeɗgeɗe kəlaw kiyit sula, məzeɓit də təbəz pepreŋge. Hoku səmmbeti, heret sek kəla disiŋ, hoku mbrit ulaŋ dəmmba pay na moskoyo, hoku meɓɓet heret kəla dohoŋ, hoku əmpa ulaŋ dəmmba pay nampum. Gebbet pak diŋgili, ŋgefleŋ metiŋgin aket kərəkka.

⁵ Gbigbim nan agəɗək gba slosloprok na va ɗəfa. Məvãni man va əffuyo na darŋgbayã. Gədəvən wagəm wataf litər gabal kaklaw sula.

⁶ Yaŋ məzaɓ əmpa, ŋgefleŋ kəlawə; məɗi sle' səzet aka dəzəŋ na Gəla na Maŋgəlva, sle' mambirgit aka zlaɓay nani, ammba wəza naskoɓ embesleke: adaki adaskoɓin zəgeɗ naɗɗa əvəl nawzla kurmbuɗuku. Dit iŋkile naddəv ŋgefleŋ metiŋgin nek tamə, məsdəlveŋge adaskoɓnən embesleke səzeti.

Əŋɗa net zəgeɗ na təbza

⁷ Azaɓək zəgeɗ kəlaw na meleŋge nawɗi lalamɗe aketi, va an dəslə, yaŋ aɗi addəv Gəla na Maŋgəlva, sle' dəka dəzəŋ, sle' dəka zlaɓay.

⁸ Azaɓək tabəlɗe kəlawə, aɗi addəv Gəla na Maŋgəlva, sle' dəka dəzəŋ, sle' dəka zlaɓay. Azaɓək hiliŋgiɗ na meleŋge səkatə.

⁹ Arslək daŋgla net məsdəlveŋge gəm daŋgla metiŋgin dit maddambeɗe nani, akkəɗ təbəz pepreŋ azet maddambeɗe veti.

¹⁰ Aɗiyək ŋgefleŋ nak ama Gəla na Maŋgəlva dəka zlaɓay, dəmmba pay nampum də dohoŋ.

¹¹ Huram agrakək əzeɓ mesteɓeɗi, ziginɗe nawnda moŋglo may hiliŋgiɗ nakso' zəga, yas agrakək wəza net zəgeɗ nawgəɗ sən məlĩ Salomoŋ addəv Gəla na Maŋgəlva:

¹² dədəkeɗ sula dit daŋgbargeɗ aketi, gəm gazwayɗe sula nawsərət aket daŋgbargeɗ naket dədəkeɗ neki,

¹³ weweɗe səkat poɗo, məgulet azet gazwayɗe sula neki, ədor net weweɗe sula aza gazway taka pak kawsərətit aket daŋgbargeɗ naket dədəkeɗ neti.

¹⁴ Avotuk gokkoɗe nawɗi ŋgefleŋɗe net aketi,

¹⁵ ŋgefleŋ taka pak medgeɗgeɗe kəlaw kiyit sula ammbani,

¹⁶ ya mesteɓeɗi, ziginɗe nawnda moŋglo, təbəz ma yorkokku, Huram-Abi aɗɗek zəgeɗis pak də təbəz pepreŋ sən məlĩ Salomoŋ vi gəla na Yawe.

¹⁷ Aka va na Yurden, awalaŋ Sukot də Sereda, adaki məlĩ ahis zəgeɗ vet addəv vov a dərma.

¹⁸ Salomoŋ aɗɗek zəgeɗ vet diyɗa sawɓa, hã məɓapi əsən gagdak na təbəz pepereŋ ɓa.

¹⁹ Salomoŋ aɗɗek zəgeɗ naddəv Gəla na Maŋgəlva gərakə: matuya na meleŋge, tabəlɗe nawɗi peŋɗe an məpsən Maŋgəlva aketi,

²⁰ zəgeɗ nawɗi lalamɗe dit lalamɗe net ŋgo'sa, kasɗet va məsərək aba təki an salala diyɗa, net pak na meleŋge saksakə.

²¹ Uffuyẽɗi, lalamɗe gəm mərmaɗe, pakgit na meleŋge saksakə,

²² Slohoŋɗe, hiliŋgiɗ nakso' zəga, mawaya, məzaŋzaŋɗe pak na meleŋge saksakə, maddamba na gəla van dit maddambeɗe nan na kəleŋgil də təki an salala diyɗa dit maddambeɗe na Gəla na Maŋgəlva, pak na meleŋge məɗɗeti.