2Alabaraɗe Də Mabərkiziti 21 - Bible en Guidar

¹ Yosafat amtəka, azbetik efiŋgiɗni, məndəkən azet efiŋgiɗin a walaŋgəla-metiŋ na Davit. Yoram wətən dəgəm məlĩ a gəlani.

Əzəm məlĩ na Yoram

² Tay dit milmiŋgiɗin en kirtin Yosafat kpakə, ndəɗaŋ yeŋ may Azariya, Yehiyel, Zakarya, Azariya, Mikayel gəm Sefatiya. Pakis kirtin Yosafat məlĩ na Israyeləŋgə.

³ Afit apsitik zəgeɗ diyɗa sawɓa, təbəz babara, meleŋge, may zəgeɗ na sləma gəm walaŋgəleɗe gugriɗ na korgu a Yuda. Ya məlĩ na, apsən Yoram, vi ndəni daya nani.

⁴ Yoram asanək kan aka məlĩ na afəni, asəɓək dəwənnani; yaŋ abey milmiŋgiɗin baymet də masalam gəm deyeɗe meɓɓet na Israyel dayday.

⁵ Aka akkpaŋ məlĩ na, Yoram tay də wəzva kaklaw hoku kiyən sula, yas azəm məlĩ wəzva dədopoɗo a Yerusalem.

⁶ Yaŋ agəm təlit milyeŋge na Israyel, va ɗiy nana Akab da aɗɗaŋgə, vi guluk nan vat wətən Akab tə. Agəɗək zəga mbərayən ama hara Yawe.

⁷ Ya Yawe dəŋger kawzan zev Davit ɓa, vi wənmiyna məs aynə də Davit, vi anah sənək na, zevin dədawsan əzəm məlĩ faɗə.

⁸ Aka pay na Yoram yi, ɗiy na Edom aɓoŋgoŋ aka Yuda, aɗiyaŋ məlĩ neti.

⁹ Yoram kan mbat dit ɗiy gugriɗ nalpa nani, gəm mawteŋɗe nawgay nan baymeti; asil də dəfəɗa, abey mə Edomɗe məs dəsərŋgəslnən neki gəm deyeɗe net mawteŋɗe nawgay neti.

¹⁰ Hã pay dəpaŋka Edom tay məɓoŋgun aka məlĩ na Yuda. Dasək vani Libna pak aɓoŋguk akani, vi appan Yawe Maŋgəlva net efiŋgiɗni.

¹¹ Nan van agəɗək gəleɗe-nettuyeŋge aket mossorgoɗe gugriɗ na Yuda, atoŋgit ɗiy na Yerusalem əɗɗa polkoyo gəm azet ɗiy na Yuda.

¹² Yaŋ ɗerewel ade sən səva məskəleŋ Eliya də ənəh na: «An Yawe, Maŋgəlva na afuk Davit anah yaŋka: Adan kəgəm tive na afuk Yosafat ɓa, may tive na Asa məlĩ na Yuda ɓa,

¹³ yaŋ kəzban tive net milyeŋge na Israyel, kətoŋgən Yuda gəm ɗiy na Yerusalem əɗɗa polkoyo, va polkoyo na gəla na Akab, kəbey milmiŋgiɗuk na daŋgla na afuk dayday məs dəssoŋ də sləma day kikuŋ na,

¹⁴ asna, gəbay mətawa wabey ɗiy noko, kirtuko, gil noko, dit zəgeɗ nok pakə.

¹⁵ Is sən kiyuk kpak gbəgba'ɗe diyɗa warmukuni, gbəgba' na gədəv ɗəfa, hã herɗok kawgilyoŋ sən wən na gbəgba' vani, wawan zən va pay agil pakə.»

¹⁶ Yaŋ kan Yawe aɗyeŋget mə Filistiɗe dit Arabɗe dəssoŋ megget dit mə Etiyopiɗe aka Yoram.

¹⁷ Awakaŋ sənən dələv na Yuda, atoŋgoŋ addəvən; andenin zəgeɗ naddəv gəla na məlĩ baymeti, may gil nan dit kirtin dayday. Wətən tay məmbərsən abbər Yohakaz muzliya naret kirtin ɓa.

¹⁸ Dərɓaga wənəs pak na, Yawe argak azet herɗen də gbəgba' məs abbur ɓa.

¹⁹ Avoŋguk diyɗa, yaŋ də əgrak na wəzva masula'ən na, herɗen agilyoŋ sən gbəgba' vani, hã ndən zam addəv əzəmsahã diyɗa. Ɗiy nan dərdəsnən də offo va mərdəs dihiŋgiɗin ɓa.

²⁰ Tay də wəzva kaklaw hoku kiyən sula gala akkpaŋ məlyã, azəm məlĩ wəzva dədopoɗo a Yerusalem. Ɗəf tay dəhəm ammban gala amtə ɓa, məndəkən a walaŋgəla-metiŋ na Davit məza a weleŋgit magamasɗe net milyeŋge ɓa.