2Alabaraɗe Də Mabərkiziti 2 - Bible en Guidar

¹ Salomoŋ andək məslaŋ zəga gabal kaklaw buhul, məbaslaŋ gərmeŋge gabal kaklaw dədopoɗo dəɗɗaŋgən wəza aggərma gəm ɗiy gugriɗ nawla wəza net gabal hoku də səkat sləre.

² Salomoŋ aslənək aza Huram, məlĩ na Tir ənah sən na: «Kəbbah sənək afu Davit, kəslən sənək muguguleɗ na Liban narka gəla nani.

³ Awle naw maw aka ərka gəla aka iya na Yawe Maŋgəlva nawa. Dəsan səngən zaɓ nawzla sən tursan abani, nawɗi sən əvəl an ɗayɗayə gəm əvəl nawzla kurmbuɗuk na mompumo gəm na moskoyo, na pay naffete gəm na təlaper gəm wəzləreɗ temtem na Yawe Maŋgəlva namə, dəsangən vas faɗ a Israyel.

⁴ Ya gəla nədaŋgəla ərkaŋ na, wasan metiŋgini, vi Maŋgəlva nam metiŋgini daykiyit meŋgilveɗ pakə.

⁵ Ya naway nawwɓap ərkəsən gəla di? Vi disiŋ də disiŋ an balsən disiŋ pak atafən na ɓa. Naw nawa nan nərkəsəngən gəla an nawzlə sən tursan abani ɓa di?

⁶ Asna, aslən su məskokono naɗɗa wəza na meleŋge, na təbəz babara, na təbəz pepreŋge gəm na təbəz titire, ənɗer gabagaɗe: preŋpreŋ, pepreŋ witwiti, may kpuroh-kpuroh, may dəsən əzaɓ fotoɗe də vani. Dəgəɗgən wəza dit məsənaŋ wəza en nawray nawa, məs afu Davit aweli, məs dəssoŋ azaw a Yuda gəm a Yerusalem.

⁷ Aslən su muguguleɗ na Liban gəm wəleŋɗe lelewɗe gəm na saŋtal naggərəm na Libana'e. Nəsənək na, məɗɗaŋ wəza nok asənənək gabba əbəl wəleŋɗe na Liban; məɗɗaŋ wəza naw waddoŋ dit məɗɗaŋ wəza noko,

⁸ kawbəl suwən wəleŋɗe diyɗa, vi gəla nədaŋgəla ərkaŋ na, wasan metiŋgin lelew diyɗa.

⁹ Dəwəl sit məbzlaŋ wəleŋɗe gəm mərsletin na, wanipsit: haykəmari kilo gabal təl gabal sləre, haykəmari pepreŋ kilo gabal təl gabal sləre, zəga nawsa litir gabal səkat dədopoɗo, gəm mel litir gabal səkat dədopoɗo.»

¹⁰ Huram, məlĩ na Tir, azlan sənək Salomoŋ aver dəver, amna: «Yawe aŋgləwik ɗiy nani, ndəni aɗiyuk ka məlĩ neti.

¹¹ Huram amna: soko sən Yawe, Maŋgəlva na Israyel, məs dəzəməɗ disiŋ də dəlvafuŋ, vi apsənək wiyən də maɗɗula, məsən gabba zəga, məs əsən akan sən Davit. Məs dədarka gəla sən Yawe gəm gəla na məlĩ nani.

¹² Ya, yaŋ na, in tat əslən suk Huram-Abi, ɗəf məs dəsən wəza fok də fokə.

¹³ Wətət mə Danki, afən na, mə Tir dəsən əɗɗa wəza na meleŋge yi may na təbəz babara, na təbəz pepreŋge, na təbəz titire, əzaɓ zəgeɗ dit gərmeŋge, dit wəleŋɗe gəm əhəm gabagaɗe pepreŋɗe, pepreŋ va əffuyo na muŋgus, may pepreŋ ɗiwɗiw gəm əpokun babar va helege na leŋ; gəm əmpa asənək əzaɓ foto; waɓap əver zəga an ɗəf aŋgəl dəɗɗa səngən pakə. Dəgəɗgən wəza sap dit məsənaŋ wəza en nawray noko, gəm en məs afuk Davit aweli.

¹⁴ Yaŋ na, daya naw dəslən haykəmari, haykəmari dadabya, melẽ may mbazla məs apel wən nanəŋ sit gewleɗ nani.

¹⁵ Nam waməbəl wəleŋɗe məs wərayuk azet pak səggərəm na Liban, waminet kazget aket iŋkile a pehe, kawkesuk ɗaŋgarra hã a Yaffa. Sədak na wakəɓap əket a Yerusalem.»

¹⁶ Salomoŋ aŋɗetik melekeɗ məs dəssoŋ aka dələv na Israyel baymet, va Davit afən aŋɗeti, vasna, ɗiy vet tahəŋ gabal səkat də kaklaw sle' kiyit hoku də səkat sləre.

¹⁷ Yaŋ awel ɗiy nawsla zəga gabal kaklaw buhul səreti, məbaslaŋ gərmeŋge aggərma, gabal kalaw dədopoɗo, ɗiy gugriɗ nawla wəza gabal hoku də səkat sləre, vi dulanəngən wəza net ɗiyis pakə.