1Yohanna 5 - Bible en Guidar

Əska wəla na ətafa ( 5:1-21 ) Əska wəla nam aka ənziya egge

¹ Ɗəf məs dətaf na Yesu iyi Kristu pak, nan Maŋgəlva duwa. Ɗəf məs dəŋglu afən pak waŋglu wətəni.

² Aza aŋki mədawsənən na məŋgliwik kirtin Maŋgəlva, də əŋglu Maŋgəlva gəm də əzbet mahenziŋɗe nani.

³ Vi aŋki Əŋglu Maŋgəlva, ərma mahenziŋɗe nani, mahenziŋɗe nan tahəŋ gədak ɓa,

⁴ vi məs Maŋgəlva awə pak waska wəla ənziya egge. Əska wəla aŋki dəska wəla ənziya egge, ndəni ətaf namə.

⁵ Naway məskə wəla ənziya egge an ɗəf dətaf na Yesu Wətən Maŋgəlva yi ɓa di?

Əpel məpel aka Yesu Kristu

⁶ Yesu Kristu, ndəni məs dəde dit iŋkile na baptem nani, gəm dit mbel na əmta nani, dit iŋkile kaka yi ɓa, dit iŋkile gəm dit mbeli, vi Əmpəs dədarbani, Əmpəs van ndəni gegesiŋgi.

⁷ Vi hokuŋ məs dədawpeleŋ akani.

⁸ Əmpəsa, iŋkile gəm mbeli, ndəɗaŋ hoku pak aka taka aziweŋgi.

⁹ Adan mənam tat ətaf əpel net ɗiy akan na, an Maŋgəlva apel akani dayə. Vi aŋki əpel an Maŋgəlva apel aka Wətəni.

¹⁰ Ɗəf məs dətaf Wətən Maŋgəlva, tay də an məpel akan vanəs a makrani. Ya ɗəf məs dətaf Maŋgəlva ɓa, nan akkpaŋganək ka məstepelke, vi dətaf əpel an Maŋgəlva apel aka Wətən ɓa.

¹¹ Aŋki an məpel akan vani: Maŋgəlva apsəmək zeŋgile an faɗə, zeŋgile vanəs addəv Wətəni yi.

¹² Ɗəf məs dətaf Wətəni, nan tay də zeŋgile; ɗəf məs dətaf Wətən Maŋgəlva ɓa, nan tay də zeŋgile ɓa.

Zeŋgile an faɗə

¹³ Nəver sukum wənəs na, vi kəsənnəngən na munokum tat də zeŋgile an faɗə, munokum məs də ətaf addəv iya na Wətən Maŋgəlva.

¹⁴ Sən aŋki mədawsam kiyəm foŋgo abani, an mənam tat əŋgla zəga avan dəka əŋgla nani, tay əprəmmə.

¹⁵ Adan məsənək na tay əprəməm addəv an məssohon pakə, məsənək na, mənam tat də an məs məŋgəl avani.

¹⁶ An ɗəf awlak məlmən əɗɗa mambraya, ya mambray nawkan aka əmtay ɓa, dəkkamə, Maŋgəlva wapsən zeŋgile. Sit ɗiy məɗɗaŋ mambray məs nawka ɗəf aka əmtay ɓa, mambray maɓɓan tay nawka ɗəf aka əmta, aka aski nənah na dəkkamə ɓa.

¹⁷ Məs dəslə ɓa pak mambrayi, ya mambray tay məs awka ɗəf aka əmta ɓa.

¹⁸ Məsənka an Maŋgəlva awə pak aɗɗa mambray ɓa, vi Wətən Maŋgəlva tay əgani. Ɗəf mbərayən arəŋgən na ɓa.

¹⁹ Məsənka nam səza Maŋgəlva məde, ya ənziya egge də wən nan pak tay addəv va Ɗəf mbərayən.

²⁰ Məsənka Wətən Maŋgəlva adeke, apsəmək maɗɗula vi məsəngən Maŋgəlva an gesiŋ. Ya mənam tat addəv Maŋgəlva an gesiŋ, addəv Yesu Kristu Wətəni, ndəni Maŋgəlva an gesiŋ gəm zeŋgile an faɗə.

²¹ Kirin nawa, məga zukum səzet zəgeɗkamaŋgəlva.