1Yohanna 4 - Bible en GuidarGegesiŋ gəm əzlzlaɓa ( 4:1-6 ) Əmpəs na Maŋgəlva gəm əmpəs na Məzuzele 1 Bayneŋgiɗu na makrawa, kədawtafən əmpəs awandi pak ɓa; mule əmpəsɗe vet lewlewi, kawsənən an səza Maŋgəlva azzoŋgu, vi məskəleŋɗe na uwawən agulyoŋguk diyɗa ammba dəlva. 2 Aza aŋki kədawsənnən Əmpəs na Maŋgəlva: Əmpəs an məzunəh na Yesu Kristu adek də gəɓazəni na, na Maŋgəlva yi; 3 Ya əmpəs an dəsən Yesu ɓa, na Maŋgəlva yi ɓa. Askəs nan na məzuzel na Kristuwi yi məs kəprəmaŋ na tay əzzani naki. Ya tay egge gəgaŋ səkay. 4 Ya nokum na kirtuwa, na Maŋgəlva kənaŋgə, kəskanənək wəleti; vi an dəsan addəvkum adayək ki an dəsan egge. 5 Net səgge azzoŋgu, ndəni adawpeleŋ əpel negge ndəni mammba dələv adaprimti. 6 Ya nam na Maŋgəlva mənani. Ɗəf dəsən Maŋgəlva waprəmmə; ɗəf an na Maŋgəlva yi ɓa, aprəməm ɓa. Səza aski mədawsən Əmpəs na gegesiŋ də əmpəs na əza. Wəza na əŋgla ( 4:7-21 ) Maŋgəlva əŋgla yi 7 Bayneŋgiɗu na makrawa, məŋglu səm zəmə, vi əŋgla səza Maŋgəlva ade. Ɗəf məs də əŋgla pak Maŋgəlva dəwa, asənək Maŋgəlva. 8 Ɗəf məs aŋgla ɗiy ɓa, dəsən Maŋgəlva ɓa, vi Maŋgəlva əŋglayi. 9 Də aŋki Maŋgəlva arban əŋgla nan a walaŋmə: Maŋgəlva aslənək wətən an gəɗeŋgəɗeŋ aka dəlva, vi məsamgən madaram dəndəni. 10 Aŋki əŋgla, mənamtə məŋglu Maŋgəlva ɓa, ndəni dəŋglumə, yaŋ aslən Wətən kavviyan mambray namə. 11 Bayneŋgiɗu na makrawa, adan Maŋgəlva aŋglumək vas na, nam pak aslək məŋglugən zəmə. 12 Ɗəf tay dula Maŋgəlva ɗah ɓa. Ya an mənam tat əŋglu zəmə, asna Maŋgəlva tay addəvmə, əŋgla nan wasan gərrak addəvmə. 13 Aza aŋki mədawsənən na mənam tat addəvən, tay addəvmə: apsəmək səza Əmpəs nani. 14 Ya nam mulaka, mənam tat ənəh na, Afən aslənək wətən ka məkõhgəni. 15 Ɗəf dənah na Yesu Wətən Maŋgəlva yi, Maŋgəlva tay addəvən, tay addəv Maŋgəlva. 16 Ya məsənək əŋgla na Maŋgəlva vimə, mətafka. Maŋgəlva əŋgla yi: dəsan addəv əŋgla, addəv Maŋgəlva asani. 17 Də aski əŋgla asan gərrak a walaŋmə. Vi məsamgən kiyəm foŋgo aka pay nawtaw wəna. Vi va nan asani, vas mənan aka dəlvəŋka. 18 Geslne tay addəv əŋgla ɓa, əŋgla an gərrak azgan geslne, vi geslne tay sap də əzəm sahã. Ɗəf an də geslne, əŋgla tay gərrak addəvən ɓa. 19 Nam mədawsam də əŋgla na, vi ndəni dəŋgluwəm daabəŋ. 20 An ɗəf tay ənəh na: «Nəŋgluwək Maŋgəlva» yaŋ adawzel məlməni, məwə wəni. Vi ɗəf məs aŋglu məlmən məs adawla ɓa, aɓap na əŋglu Maŋgəlva məs awlan ɓa ɓa. 21 Mahenziŋ an mərah səvan yaŋka. Ɗəf məzəŋglu Maŋgəlva dəŋglu məlməne'e. |
All right reserved
Bible Society of Cameroon