1Yohanna 3 - Bible en Guidar

Kirtin Maŋgəlva gəm kirtin Satan ( 3:1-24 ) Kirtin Maŋgəlva

¹ Mula əŋgla məs Afən apsəmə, vi kawyəm na Kirtin Maŋgəlva, ya vas mənani. Vini ənziya egge dəsənəm ɓa: vi dəsən Maŋgəlva ɓa.

² Bayneŋgiɗu na makrawa, kakaŋ na kirtin Maŋgəlva mənani, an va mədawsam abe na dərbə tagay ɓa. Ya məsənək na, an arbanək zəni, waməsam va ndəni, vi wamula va asani.

³ Ɗəf məs də əɗɗum vas akan pak wabbur zən va nan van asan mubburun.

⁴ Ɗəf məgəɗ mambray pak ki mahenziŋ adaggara'e, vi mambray əggar ki mahenziŋgi.

⁵ Kəsənənka Yesu Kristu ade na vi kavviyan mambray yi, ya nan mambray tay azan ɓa.

⁶ Ɗəf məs dəsler dəndən wapan əɗɗa mambraya, ya ɗəf məzəɗɗa mambraya dula ɓa, dəsən ɓa.

⁷ Kirin nawa, ɗəf adawzokum ɓa, ɗəf məzəɗɗa an təstəsə nan pak təstəsi, va Yesu Kristu asan təstəsə.

⁸ Məgəɗ mambray pak səza Diyabəl ade, vi far də ətəŋ nani Diyabəl tay əɗɗa mambraya. Sən aski Wətən Maŋgəlva ade vi dəɓzliwgin wəzeɗe na Diyabəl.

⁹ Məs Maŋgəlva awə pak aɗɗa mambray ɓa, vi zeŋve na Maŋgəlva tay addəvən, aɓap na əɗɗa mambray ɓa, vi Maŋgəlva duwa.

¹⁰ Aza aski kirtin Maŋgəlva dit kirtin Diyabəl adarbaŋgə: Ɗəf məs aɗɗa təstəs ɓa pak, dəde səza Maŋgəlva ɓa, də məs aŋglu məlmən ɓa pakə.

Əŋglu zə ɗəfa

¹¹ Aŋki alabara məs kəprəmaŋ far də ətəŋ nani, məŋglu səm zəmə,

¹² məza va Kaynu ɓa, ɗəf dəde səza Mbərayni yi. Atawək wəla məlməni, aka mi ataw wəlan di? Vi wəzeɗe nan mbəraytiŋgə, ya na məlmən na, təstəsəŋgə.

¹³ Kədaggətaŋ ɓa milmiŋgiɗwa, an ɗiy negge azelkumənək ɓa.

¹⁴ Namə, məsənək na məzarək səza əmta mətoŋguk addəv zeŋgile, vi mənam tat əŋgliw milmiŋgiɗmə. Məs tay də əŋgla ɓa pak addəv əmta asani.

¹⁵ Məzel məlmən pak, məbaygəbayi, ya kəsənnəka, məbaygəbay tay də zeŋgile an faɗ addəvən ɓa.

¹⁶ Də aŋki məsən zəga adawyaŋ əŋgla, Yesu Kristu appanək zeŋgilen vimə. Aslək nam pak məppangən zeŋgilem viyit milmiŋgiɗmə.

¹⁷ An ɗəf tay də arya naka dəlvəŋka, awlak məlmən tay də wəray na zəga, yaŋ aktu sən gəɓani dəbbah sən ɓa, mbarmbar əŋgla na Maŋgəlva adawsan aza ɗəfəs di?

¹⁸ Kirin nawa, mədaŋgla də əpel ɗar awaniɓa də ma ɓa, dəsan də wəza gəm də gegesiŋ.

Əssa ki ɗəf foŋgo aba Maŋgəlva

¹⁹ Vaŋki mədawsənən na mənam tat addəv gegesiŋ, geslne asan na a makram aban ɓa.

²⁰ An makram tay ənəh na mbərayəm mənani, Maŋgəlva yi day ki makramə, asənək zəga pakə.

²¹ Bayneŋgiɗu na makrawa, an makram dənah na mbərayəm mənani ɓa, asna waməziw aba Maŋgəlva kiyəm foŋgo.

²² Asna, an məssõh pak wamərah səvani, vi mənam tat ərme mahenziŋɗe nani, mənam tat əɗɗa an məs aŋgələ.

²³ Aŋki mahenziŋ nan vani: Mətaf səm iya na Yesu Kristu Wətəni gəm məŋglugən zəmə, vaski apsəm mahenziŋ nani.

²⁴ Ɗəf məs dədarmə mahenziŋɗe nani, nan tay addəvən, ndən tam addəvən, aza aski məsən na tay addəvmə də Əmpəs məs apsəmə.